భార్యకు చెప్పకుండా టీకా వేసుకున్న ఢిల్లీ డాక్టర్.. వైరల్ అవుతోన్న భార్యభర్తల ఫోన్ సంభాషణ!
ఢిల్లీకి చెందిన ఓ ప్రముఖ వైద్యుడు కోవిడ్ -19కి టీకా వేసుకుని, భార్య నుంచి చీవాట్లు తిన్న ఘటన ఇప్పుడు సోషల్ మీడియాలో వైరల్ అవుతోంది. ఈ భార్యభర్తల మధ్య జరిగిన ఫోన్ కాల్ సంభాషణ.. నెటిజన్లను కడుపబ్బా నవ్విస్తోంది. అది ఇప్పుడు ట్విట్టర్‌లో వైరల్ అయ్యింది. కార్డియాలజిస్ట్, పద్మశ్రీ గ్రహీత తన భార్య నుంచి వచ్చిన ఫోన్ కాల్‌ను రికార్డ్ చేశారు. టీకా డోస్ తీసుకున్నట్టు ఆయన ధ్రువీకరించగా.. ‘మీరు నన్ను ఎందుకు తీసుకెళ్లలేదు.. నాకు అబద్దం చెప్పొద్దు?’అని అమె పదే పదే ప్రశ్నించడం వీడియోలో ఉంది. ఆయన ఎంతగా చెబుతున్నా వాటిని ఆమె వినిపించుకోకపోవడం విశేషం. భార్యభర్తల సంభాషణ వీడియో వైరల్ కావడంతో స్పందించిన డాక్టర్ అగర్వాల్.. ఈ కఠినమైన సమయంలో సంతోషంగా ఉందని, అందరూ వ్యాక్సిన్ తీసుకోవాలని ఆయన కోరారు. ‘ట్విట్టర్‌లో చక్కెర్లు కొడుతున్న నా వీడియో గురించి తెలుసు... ఈ కఠినమైన సమయాల్లో ప్రజలకు ఒక క్షణం ఆహ్లదం అందించినందుకు నేను సంతోషిస్తున్నాను.. నవ్వు అన్నింటికీ ఉత్తమ ఔషధం.. మీరు నా వల్ల నవ్వును ఆస్వాదించారు.. నా ఆరోగ్యం, భద్రత పట్ల నా భార్యకు ఉన్న ఆందోళన తప్ప మరొకటి కాదు.. మీకు అవకాశం వచ్చినప్పుడు టీకా తీసుకోవాలని ప్రతి ఒక్కరినీ కోరుతున్నాను.. ఈ సంభాషణ టీకా ప్రాముఖ్యతపై లక్షలాది మందికి అవగాహన కల్పించిందని తెలుసుకోవడం నాకు ఆనందంగా ఉంది.. డాక్టర్‌గా ఇది నా లక్ష్యం. టీకా తీసుకోకపోవడం పెద్ద నవ్వుల విషయం అని మీరందరూ అంగీకరిస్తారని నేను కచ్చితంగా అనుకుంటున్నాను’ అని డాక్టర్ అగర్వాల్ తన ప్రకటనలో పేర్కొన్నారు. పోస్ట్‌చేసిన వీడియోలో తన భార్యతో డాక్టర్ అగర్వాల్ తాను ఇప్పటికే టీకా తీసుకున్నానని, ఆమె సోమవారం వేస్తారని అన్నారు. ఫోన్‌లో భార్యతో మాట్లాడుతూ.. నేను టీకా పరిశీలించడానికి వెళ్లాను.. వారు వేసుకోమని చెప్పడంతో తీసుకున్నా’ అని అన్నారు. దీనికి డాక్టర్ అగర్వాల్ భార్య అగ్గిమీద గుగ్గిలం అయ్యారు.. ఆయన చెప్పిన వివరణ వినిపించుకోకుండా నన్నెందుకు మీతోపాటు తీసుకెళ్లలేదు.. నాకు అబద్దాలు చెప్పకండి అంటూ ఆమె ఆగ్రహం వ్యక్తం చేశారు. అప్పుడు.. ఈ సంభాషణ ట్విట్టర్‌లో లైవ్ వస్తోందని ఆమెకు చెప్పి ముగించడానికి డాక్టర్ ప్రయత్నించారు. దీనికి ఆమె స్పందిస్తూ, నేను ఇప్పుడే ప్రత్యక్ష ప్రసారం చేస్తాను.. మిమ్మల్ని వీధిలో పెడతాను అని సమాధానం ఇచ్చారు. భార్యాభర్తల మధ్య జరిగిన సంభాషణ నెట్టింట వైరల్ అవుతోంది.
By January 28, 2021 at 11:22AM
No comments