వివాహేతర సంబంధం.. ఊహించని రీతిలో భార్యాభర్త, ప్రియురాలి మృతి
వివాహేతర సంబంధాలు తీవ్ర పర్యవసనాలకు దారి తీస్తాయని చాటి చెప్పే ఘటన ఇది. పెట్టుకున్న మహిళతో కలిసి భర్త బైక్ మీద ఆమె సొంతూరు వెళ్లాడని తెలియడంతో.. క్షణికావేశంలో భార్య పురుగు మందు తాగింది. ఈ విషయం తెలిసి వెనక్కి తిరిగొస్తుండగా.. బైక్ మీద కూర్చున్న మహిళ బ్రిడ్జి మీది నుంచి నదిలో దూకి చనిపోయింది. నీళ్లలో మునిగిపోతున్న ప్రేయసిని కాపాడే క్రమంలో ఆ వ్యక్తి కూడా ప్రాణాలు వదిలాడు. అనంతరం పురుగు మందు తాగిన భార్య చికిత్స పొందుతూ హాస్పిటల్‌లో తుదిశ్వాస విడిచింది. ఈ ఘటన జిల్లాలో చోటు చేసుకుంది. ప్రకాశం జిల్లా జనకవరం పంగులూరు మండలం చందలూరుకి చెందిన వేణు, ధనలక్ష్మి దంపతులకు ముగ్గురు పిల్లలున్నారు. జీవనోపాధి కోసం వీరు అద్దంకి పట్టణానికి మకాం మార్చారు. చీమకుర్తి మండలం నాయుడుపాలెం గ్రామానికి చెందిన ఓ మహిళతో వేణుకు పరిచయమైంది. అది కాస్తా వివాహేతర సంబంధంగా మారింది. అప్పటికే ఆ మహిళకు కూడా పెళ్లయ్యింది. వీరిద్దరి విషయం తెలియడంతో ఇద్దరి ఇళ్లలో గొడవలయ్యాయి. దీంతో వేణుతో వివాహేతర సంబంధం పెట్టుకున్న మహిళ కుటుంబం నాయుడుపాలెం నుంచి హైదరాబాద్‌కు షిఫ్ట్ అయ్యింది. ఇటీవలే ఆ మహిళ అద్దంకి వచ్చింది. సోమవారం వేణుతో కలిసి బైక్ మీద తన సొంతూరైన నాయుడుపాలెం వెళ్లింది. వేణు భార్య ధనలక్ష్మీకి ఈ విషయం తెలియడంతో ఆమె మనస్తాపానికి గురై పురుగు మందు తాగింది. నీ భార్య ఆత్మహత్యాయత్నం చేసిందని స్థానికులు ఫోన్ చేసి చెప్పడంతో.. వేణున బైక్‌ను వెనక్కి తిప్పాడు. ఈ క్రమంలో.. ఆందోళనకు గురైన అతడి ప్రియురాలు గుండ్లకమ్మ నదిపై ఉన్న బ్రిడ్జి మీది నుంచి నీళ్లలోకి దూకి ప్రాణాలు వదిలింది. ఆమెను కాపాడే ఉద్దేశంతో నీళ్లలోకి దూకిన వేణు కూడా ప్రాణాలు వదిలాడు. మరో వైపు వేణు భార్య కూడా ఆసుపత్రిలో చికిత్స పొందుతూ మంగళవారం ప్రాణాలు వదిలింది. వివాహేతర సంబంధం కారణంగా రెండు కుటుంబాల్లో విషాదం చోటు చేసుకోగా.. దంపతులిద్దరూ ప్రాణాలు వదలడంతో.. వారి ముగ్గురు పిల్లలు అనాథలయ్యారు.
By February 12, 2020 at 11:18AM
No comments