అద్భుతం: రెండో ప్రపంచ యుద్ద సమయంలో విడిపోయి.. తిరిగి 78 ఏళ్ల తర్వాత కలుసుకున్న సిస్టర్స్

రెండో ప్రపంచ యుద్ధ సమయంలో విడిపోయిన అక్కాచెల్లెళ్లు దాదాపు ఎనిమిది దశాబ్దాల తర్వాత కలుసుకున్న అపూర్వ ఘట్టం రష్యాలో చోటుచేసుకుంది. ఈ సోదరీమణులు మళ్లీ కలుసుకోవడంలో మీడియా, పోలీసుల సహకారం కూడా ఉంది. 78 ఏళ్ల తర్వాత తిరిగి కలుసుకున్న ఆ అక్కాచెల్లెళ్ల ఆనందానికి అవధుల్లేవు. ఆప్యాయంగా ఒకరినొకరు ఆలింగనం చేసుకుని ముద్దులు కురిపించుకున్నారు. ఈ సందర్భంగా వారు పోలీసులు, ఓ టెలివిజన్ షోకి కృత‌జ్ఞ‌త‌లు తెలియజేశారు. యులియా (92), ఖరితోనోవా (94)లు కలుసుకున్న ఈ మనోహర దృశ్యాన్ని చూస్తూ వారి కుటుంబ సభ్యులు ఉద్వేగానికి గురయ్యారు. యులియా చేతులు పట్టుకుని ‘చెల్లి కోసం వెదుకుతూనే ఉన్నా’ అంటూ రోజాలినా పేర్కొన్నారు. రెండో ప్రపంచ యుద్ధ సమయానికి ఈ అక్కా చెల్లెళ్లు తమ తల్లిదండ్రులతో కలసి స్టాలిన్‌గ్రాడ్‌ నేటి వోల్గోగ్రాడ్‌లో ఉండేవారు. యుద్ధం కారణంగా 1942లో ఈ నగరాన్ని నాజీ సైన్యం చుట్టుముట్టడంతో అక్కడి పౌరులను అధికారులు ఖాళీ చేయించారు. యులియా ఆమె తల్లితో కలిపి పెంజా నగరానికి చేరుకోగా, రోజాలినా తాను పనిచేస్తున్న కర్మాగారంలోని కార్మికులతో కలిపి చెల్యాబిన్స్క్‌కి చేరింది. అప్పుడు విడిపోయిన సోదరీమణలు తాజాగా చెల్యాబిన్స్క్‌లో కలుసుకున్నారు. యులియా కుమార్తె.. తన తల్లి సోదరి ఆచూకీని కనిపెట్టాలని పోలీసులకు విజ్ఞప్తి చేయగా, ఓ టీవీ షో ద్వారా రోజాలినా తన సోదరి కోసం ప్రయత్నించింది. దీంతో వీరి ప్రయత్నాలు ఫలించి అపూర్వ కలయిక సాధ్యమయ్యింది. దీనిపై ఇరినా ఓల్క్ అనే పోలీస్ అధికారి మాట్లాడుతూ.. చిన్నతనంలో విడిపోయి ఇన్నేళ్లు గడిచినా తిరిగి కలుస్తామానే నమ్మకాన్ని మాత్రం ఇద్దరూ కోల్పోలేదని, నేడు అది నిజమైందన్నారు. తన సోదరి జాడ కోసం రోజాలినా ఓ టెలివిజన్ కార్యక్రమం ద్వారా ప్రయత్నిస్తుందనే విషయం తమ దృష్టికి రావడంతో అక్కాచెల్లెళ్ల అపూర్వ కలయికకు సహకరించిందన్నారు. రెండో ప్రపంచ యుద్ధంలో నాజీలపై రష్యా విజయం సాధించినా, భారీ ప్రాణనష్టం జరిగింది. అధికారిక వివరాల ప్రకారం ఈ యుద్ధంలో 27 మిలియన్ల మంది ప్రాణాలు కోల్పోయారు. ఈ ఏడాది మే 9కి నాజీలపై పూర్తి విజయం సాధించి 75 ఏళ్లు పూర్తికావడంతో సిల్వర్ జూబ్లీ వేడుకలకు సిద్ధమవుతోంది. ఈ నేపథ్యంలో నాడు విడిపోయిన ఇద్దరు అక్కాచెల్లెళ్లు ఇప్పుడు కలుసుకోవడం సంబరాలు మరింత ఉత్సాహంగా సాగనున్నాయి. రెండో ప్రపంచ యుద్ధంలో ఇరు వర్గాలూ ఒక్కో మిలియన్ చొప్పున భారీగా సైన్యాలను కోల్పోయాయి.

By February 08, 2020 at 11:39AM

Read More https://telugu.samayam.com/latest-news/international-news/two-russian-sisters-have-been-reunited-78-years-after-being-separated-during-the-second-world-war/articleshow/74023317.cms