ఐరాసలో మరోసారి తోకజాడించిన పాక్.. ధీటుగా తిప్పికొట్టిన భారత్
మరోసారి అంతర్జాతీయ వేదికపై కశ్మీర్ అంశాన్ని ప్రస్తావించిన పాకిస్థాన్‌కు భారత్ దిమ్మదిరిగే సమాధానం ఇచ్చింది. ఐక్యరాజ్యసమితి భద్రతామండలిలో అంతర్జాతీయ శాంతి భద్రతలపై అంశంపై గురువారం ఓపెన్ డిబేట్ జరిగింది. ఈ సందర్భంగా కశ్మీర్ అంశాన్ని ఐరాసలో పాక్ ప్రతినిధి మునీర్ అక్రమ్ లేవనెత్తగా భారత్ ధీటుగా బదులిచ్చింది. చీకటి కళలకు పాక్ ఉత్తమ ఉదాహరణ అని, ఆ దేశం చేసే అసత్య ప్రచారం, కుట్రలను ఇక్కడ ఎవరూ అంగీకరించరని భారత శాశ్వత ప్రతినిధి మండిపడ్డారు. జమ్మూ కశ్మీర్‌లో ఆర్టికల్‌ 370ని రద్దు చేసి, కమ్యూనికేషన్‌ వ్యవస్థపై ఆంక్షలు విధించారని, భారత్-పాక్ మధ్య యుద్ధాన్ని నిలువరించేలా యూఎన్ సెక్రటరీ జనరల్‌ ఆంటోనియో గుటెరస్‌ నిర్ణయాత్మక చర్యలు చేపట్టాలని ప్రతినిధి కోరారు. దీంతో సయ్యద్ అక్బరుద్దీన్ స్పందిస్తూ.. చీకటి కళలకు పాక్ చక్కటి ఉదాహరణ.. మరోసారి అబద్ధాలను ప్రచారం చేస్తూ తన నైజాన్ని బయటపెట్టిందని అన్నారు. ఈ ఆరోపణలను తాము కొట్టిపారేస్తున్నామని, ఆ దేశానికి తాము చెప్పేదొకటేనని ముందు మీ దేశంలో సమస్యలను పరిష్కరించుకోండి... మీ కుట్రలను సాగనివ్వడానికి ఇక్కడ ఎవరూ సిద్ధంగా లేరని వ్యాఖ్యానించారు. ప్రపంచవ్యాప్తంగా విస్తరించిన ఉగ్రవాదం, ఆయుధాల రూపకల్పనలో కొత్త సాంకేతిక పరిజ్ఞానం వినియోగం తదితర అంశాలపై ఈ సమావేశంలో చర్చించారు. ప్రపంచం ఎదుర్కొంటున్న సమస్యలపై భద్రతా మండలి అవసరాన్ని నొక్కివక్కాణించిన అక్బరుద్దీన్.. వాస్తవితకను పరిగణనలోకి తీసుకోవాలని సూచించారు. అంతేకాదు, ఈ విషయంలో భద్రతామండలి గుర్తింపు, చట్టబద్దత, పనితీరుపై ప్రశంసలు కురిపించారు. 21 శతాబ్దంలో ప్రపంచం ఎదుర్కొంటున్న సంక్షోభాలకు ముగింపు, సంస్కరణ, మార్పు కోసం చార్టర్ నిబంధనల ద్వారా పనిచేయాలని తెలిపారు.
By January 10, 2020 at 12:45PM
No comments