ప్రపంచాన్ని వణికిస్తోన్న కరోనా వైరస్.. చైనాలో తొమ్మిదికి చేరిన మృతులు
చైనాతో సహ పలు ఆసియా దేశాలను కొత్త వైరస్ భయపెడుతోంది. అంతుచిక్కని ఈ వైరస్ కారణంగా చైనాలో ఇప్పటికే తొమ్మిది మంది మృతిచెందగా, దేశవ్యాప్తంగా మరో 440 కేసులు నమోదుకావడం మరింత కలవరపెడుతోంది. సార్క్ లాంటి ఈ వైరస్ అత్యంత వేగంగా వ్యాప్తి చెందుతోంది. శ్వాసనాళాల ద్వారా కరోనావైరస్ వ్యాపించి, అక్కడ వైరస్గా పరివర్తనం చెంది, వ్యాధిగా రూపాంతంరం చెందే అవకాశం ఉందని చైనా జాతీయ ఆరోగ్య కమిషన్ డిప్యూటీ మినిస్టర్ లిన్ బిన్ పేర్కొన్నారు. ఈ వారంలోనే చైనా కొత్త ఏడాది వేడుకలు జరగనుండగా లక్షలాది మంది ప్రయాణాలకు సిద్ధమవుతున్నారు. ఈ సందర్భంగా విమానాశ్రయాలు, రైల్వే స్టేషన్లు, షాపింగ్ మాల్స్లో రద్దీ ఎక్కువగా ఉంటుంది. ఈ నేపథ్యంలో వైరస్ మరింత వేగంగా వ్యాప్తిచెందే అవకాశం ఉన్నందున దీనిని నివారించే చర్యలను చైనా ప్రకటించింది. అవసరమైతే రద్దీ ప్రదేశాల్లో ఉష్ణోగ్రతలను పరిశీలించడానికి అన్ని ఏర్పాట్లు చేసినట్టు తెలిపింది. చైనాతోపాటు మరికొన్ని ఆసియా దేశాల్లోనూ ఈ వైరస్ను గుర్తించారు. ఇక, అమెరికాలో తొలి కేసు మంగళవారం వెలుగులోకి వచ్చింది. వైరస్ వేగంగా విస్తరించడంతో మధ్య చైనా సిటీ వుహాన్ విమానాశ్రయం, రైల్వే స్టేషన్లు, రహదారులపై ఉష్ణోగ్రతలు, జ్వరం తనిఖీలను అధికారులు ముమ్మరంగా నిర్వహిస్తున్నారు. మరోవైపు, వైరస్ భయంతో చైనా కొత్త ఏడాది వేడుకలకు దూరంగా ఉండాలని వేలాది మంది తమ కార్యక్రమాలను రద్దు చేసుకుంటున్నారు. కరోనా వైరస్.. ప్రమాదకరమైన సార్స్ వైరస్ను పోలి ఉండటంతో కలకలం రేగుతోంది. 2003లో విజృంభించిన కారణంగా చైనా, హాంగ్కాంగ్లలో 650 మంది ప్రాణాలు కోల్పోయారు. ఈ వైరస్ ఒకరి నుంచి మరొకరికి ఎలా వ్యాపిస్తుందనే విషయంపై స్పష్టత కొరవడటంతో ప్రస్తుతం చైనా వణికిపోతోంది. ఈ ప్రాణాంతకమైన వైరస్ ఇప్పటికే థాయ్ లాండ్,జపాన్,దక్షిణ కొరియాలకు పాకింది. చైనాలో ఉన్న భారతీయ టీచర్ ప్రీతి మహేశ్వరికి కూడా ఈ వైరస్ సోకింది. ప్రస్తుతం ఆమెను ఐసీయూలో ఉంచి చికిత్స అందిస్తున్నారు. గతవారం చైనా పర్యటనకు వెళ్లే భారతీయులను కూడా భారత్ అలర్ట్ చేసింది. డిసెంబర్ 31,2019 నుంచి చైనా వీసా కోసం దరఖాస్తు చేసుకున్నవారి వివరాలు ఇవ్వాలని ఆరోగ్యశాఖ విదే శీ మంత్రిత్వ శాఖను కోరింది.
By January 22, 2020 at 12:25PM
No comments