మోదీ పుట్టినరోజు.. ప్రధాని ఫోటోకు పూలమాల వేసిన బీజేపీ ఎంపీ!
ప్రధాన మంత్రి నరేంద్ర మోదీ తన 69వ పుట్టిన రోజును మంగళవారం జరుపుకున్న విషయం తెలిసిందే. అయితే, మోదీ పుట్టిన రోజు వేడుకల ఓ బీజేపీ ఎంపీ ప్రదర్శించిన అత్యుత్సాహంతో ఆ పార్టీ నేతలు అవాక్కయ్యారు. ఎంపీ చేసిన పనితో ప్రతిపక్షాలకు ఆస్త్రం అందినట్టయ్యింది. ఈ ఘటన ఉత్తర్‌ప్రదేశ్‌లోని ఫిరోజాబాద్‌లో చోటుచేసుకుంది. సిర్సాగంజ్‌ ప్రాథమిక ఆరోగ్యం కేంద్రంలో మోదీ జన్మదిన వేడుకలను స్థానిక ఎంపీ చంద్రసేన్ జాదౌన్ నిర్వహించారు. ఈ సందర్భంగా మోదీ చిత్రపటానికి ఆయన పూలమాల వేయడంతో అక్కడున్న బీజేపీ నేతలు షాక్ తిన్నారు. దీనిపై మనస్తాపానికి గురైన బీజేపీ నేతలు కొద్ది సేపటికి ఆ షాక్ నుంచి తేరుకుని చంద్రసేన్ చర్యలను తప్పుబట్టారు. తన తప్పును తెలుసుకున్న ఎంపీ దిద్దుబాటు చర్యలు చేపట్టారు. తాను వెళ్లేటప్పటికే మోదీ ఫోటోకు పూలమాల ఉందని, దానిని తాను తొలగించానని సర్దిచెప్పుకునే ప్రయత్నం చేశారు. అయితే, అప్పటికే జరగాల్సిన నష్టం జరిగిపోయింది. ఈ ఘటనపై ప్రతిపక్ష నేతలు వ్యంగ్యాస్త్రాలు సంధించారు. పుట్టిన రోజు వేడుకలను ఎలా నిర్వహించాలో ముందు తెలుసుకోవాలని ఎద్దేవా చేశారు. ఎంపీ చేసిన పనికి బీజేపీ నేతల గొంతులో పచ్చివెలక్కాయ పడ్డట్టయ్యింది. మరోవైపు, తన పుట్టిన రోజున ప్రధాని మోదీ.. సొంత రాష్ట్రం గుజరాత్‌లో పర్యటించారు. నర్మదా నది తీరంలో ఏర్పాటుచేసిన సర్దార్ పటేల్ ఐక్యతా విగ్రహం వద్ద మోదీ పుట్టిన రోజు వేడుకలను జరుపుకున్నారు. ముందుగా తన తల్లి హీరాబెన్ వద్ద అశీర్వాదం తీసుకున్నారు. ముందుగా తన తల్లి హీరాబెన్ ఆశీర్వాదం తీసుకున్నారు. అమ్మతో కలిసి అల్పాహారం చేసిన మోదీ.. తర్వాత కాసేపు ఆమెతో ముచ్చటించారు. ఆమె యోగక్షేమాలను అడిగి తెలుసుకున్నారు. ముఖ్యమైన రోజుల్లో ఆమెను కలిసి ఆశీర్వాదం తీసుకోవడం మోదీకి అలవాటు. అమ్మతో కలిసి గడిపిన అనంతరం ప్రధాని మోదీ నర్మదా జిల్లాలోని కెవదియాలో అభివృద్ధి కార్యక్రమాలు, వివిధ ప్రాజెక్టు పనుల పురోగతిని సమీక్షించారు. సర్దార్ సరోవర్ డ్యామ్ వద్ద నర్మదా నదికి హారతి ఇచ్చారు. గత ఏడాది అక్టోబర్‌లో సర్దార్ పటేల్ భారీ విగ్రహాన్ని ఆవిష్కరించిన మోదీ.. మంగళవారం ఆ విగ్రహం వద్ద ఏరియల్ సర్వే నిర్వహించారు. గరుడేశ్వర్‌లో దత్తాత్రేయ మందిరాన్ని సందర్శించారు. కెవాడియా బటర్ ప్లై పార్కులో రంగురంగుల సీతాకోక చిలుకలను ఆయన వదిలిపెట్టారు.
By September 18, 2019 at 11:05AM
No comments