క్రికెట్ బెట్టింగ్ మాఫియా వేధింపులు.. డిగ్రీ విద్యార్థి సూసైడ్
క్రికెట్ బెట్టింగ్ ఎన్నో జీవితాలను నాశనం చేస్తోంది. పోలీసులు ఎన్ని చర్యలు తీసుకుంటున్నా బెట్టింగ్ మాఫియా ఎప్పటికప్పుడు కొత్త దారులు వెతుక్కుంటూ విస్తరిస్తూనే ఉంది. వీరి ఆగడాలకు ఆస్తులతో పాటు ప్రాణాలు కూడా కోల్పోతున్నవారు కోకొల్లలు. తాజాగా హైదరాబాద్‌కు చెందిన ఓ విద్యార్థి క్రికెట్ బెట్టింగ్ ఉచ్చులో చిక్కుకుని ఆత్మహత్య చేసుకున్నాడు. మహబూబ్‌నగర్‌ జల్లా జడ్చర్ల మండలం, గొల్లపల్లి గ్రామానికి చెందిన వి.విష్ణుమూర్తి తన కుటుంబంతో కలిసి ఎన్నో ఏళ్ల కిందటే హైదరాబాద్‌కు వచ్చి స్థిరపడ్డాడు. అతడికి భార్య, కుమార్తు, కొడుకు ఉన్నారు. కుమారుడు రవికుమార్(21) కూకట్‌‌పల్లిలోని ప్రగతి డిగ్రీ కాలేజీలో బీఎస్సీ(కంప్యూటర్స్) మూడో సంవత్సరం చదువుతున్నాడు. అతడికి అదే ప్రాంతానికి చెందిన రాజశేఖర్ అనే వ్యక్తితో పరిచయమైంది. క్రికెట్ బెట్టింగులు నిర్వహించే రాజశేఖర్... రవికుమార్‌ను ఆ ఉచ్చులోకి లాగాడు. వందల్లో పెట్టుబడి పెడితే రూ.వేలు, రూ.లక్షల్లో రాబట్టుకోవచ్చని చెప్పి బెట్టింగులు కట్టించాడు. ఇటీవల ప్రపంచకప్ మ్యాచ్‌లు జరిగిన సమయంలో రవికుమార్ బెట్టింగులు కట్టి రూ.80వేలు నష్టపోయాడు. దీంతో ఆ డబ్బును కట్టాలంటూ బెట్టింగ్ నిర్వాహకులు అతడిపై ఒత్తిడి తెస్తున్నారు. ఇటీవల తండ్రికి మాయమాటలు చెప్పి రూ.40వేలు తీసుకున్న రవికుమార్ ఆ డబ్బును బెట్టింగ్ ముఠాకు ఇచ్చాడు. ఇంకా రూ.40వేలు ఇవ్వాలంటూ వారు బెదిరించడంతో బుధవారం ఇంట్లో ఎవరూ లేని సమయంలో ఫ్యాన్‌కు ఉరేసుకుని ఆత్మహత్య చేసుకున్నాడు. రాజశేఖర్ వల్లే తాను ఆత్మహత్యకు పాల్పడుతున్నానని, క్షమించాలని కోరుతూ తల్లిదండ్రులు, సోదరి, ఫ్రెండ్స్‌కు సూసైడ్ నోట్ రాశాడు. దీనిపై సమాచారం అందుకున్న పోలీసులు రవికుమార్ మృతదేహాన్ని పోస్టుమార్టం నిమిత్తం ఆస్పత్రికి తరలించారు. రవికుమార్ చావుకు కారణమైన రాజశేఖర్‌పై పోలీసులు చర్యలు తీసుకునేందుకు వెనుకాడుతున్నారని స్థానికులు ఆరోపిస్తున్నారు.
By August 08, 2019 at 10:14AM
No comments