నాలుగేళ్ల చిన్నారిపై విరుచుకుపడిన వీధి కుక్కలు.. తీవ్రంగా గాయపడిన పాప
కుక్కల గుంపు.. ఓ చిన్నారిపై విరుచుకుపడ్డాయి. కుక్కలను చూసి నాలుగేళ్ల చిన్నారి భయంతో పరుగులు తీసింది. అయినా ఆ బాలికను కుక్కలు వదలకుండా ఆమె మీద పడ్డాయి. బాలికను నోటితో లాగి, డ్రెస్‌ను చింపి, కింద పడేసి ప్రాణాలు తీసేంత పని చేశాయి. అయితే అదృష్టవశాత్తు చిన్నారి ప్రాణాలు నిలిచాయి. ఈ సంఘటన మధ్యప్రదేశ్‌లోని భోపాల్లో జరిగింది. దాడిలో తీవ్రంగా గాయపడడంతో ఆ బాలిక ఆస్పత్రిలో చికిత్స పొందుతుంది. శనివారం జరిగిన ఈ సంఘటన అక్కడ సీసీ టీవీ ఫుటేజీలో రికార్డ్ అయింది. ఆ వీడియో ఇప్పుడు వైరల్ అయింది. బాగ్ బాగ్ సెవానియా ఏరియాలో అంజలి విహార్ కాలనీలో నాలుగేళ్ల బాలిక ఆడుకోవడానికి బయటకొచ్చింది. అయితే వీధిలోకి వచ్చిన తనను ఐదు కుక్కలు వెంటబడ్డాయి. బాలికకు ఏం చేయాలో తెలియక అటు ఇటు పరుగులు తీసింది. ఒక్కసారిగా ఆ కుక్కలన్నీ ఆ చిన్నారిని చుట్టిముట్టేశాయి. భయంతో ఏం చేయాలో పాలుపోక బాలిక ఆగిపోయింది. అంతే ఆ కుక్కలు గుంపుగా చిన్నారిని కింద పడేసి కరిచేశాయి. ఆమె డ్రెస్‌ను పట్టి లాగాయి. రెండు కుక్కలు ఆమె తల, ముఖాన్ని కొరకగా, మిగతా కుక్కలు ఆమె కాళ్లను, చేతులను కరిచేశాయి. ఈలోపు అటుగా వచ్చిన ఓ వ్యక్తి అది చూసి ఆ కుక్కలను రాయితో తరిమికొట్టారు. దాంతో ఆ కుక్కలు బాలికను విడిచిపెట్టి పారిపోయాయి. తర్వాత బాలిక నెమ్మదిగా పైకి లేచి ఏడుస్తూ ఇంటి వైపుగా పరుగులు తీసింది. కుక్కలు కరవడంతో చిన్నారి ఒంటిపై తీవ్రమైన గాయాలయ్యాయి. రక్రస్రావం అవుతుండగానే బాలిక లేచి ఇంటికి వెళ్లింది. తర్వాత ఇంట్లో వాళ్లు విషయం తెలుసుకుని ఆమెను ఆస్పత్రిలో చేర్చారు. ఈ సంఘటన సాయంత్రం 4.15 నిమిషాలకు జరిగింది. ప్రస్తుతం బాలిక ఆస్పత్రిలో చికిత్స పొందుతుంది. తల, కాళ్లు, చేతులకు తీవ్రమైన గాయాలైనట్టు తెలుస్తుంది. అయితే వీడియో చూసినట్టు అక్కడి పోలీసులు తెలిపారు. అయితే దానికి సంబంధించి పోలీసులకు ఎటువంటి కంప్లైంట్ రాలేదని అన్నారు.
By January 02, 2022 at 01:55PM
No comments