కాబూల్‌లో మిస్సయిన ఆ చిన్నారి దొరికేసింది.. ఫలించిన తల్లిదండ్రుల నిరీక్షణ
గతేడాది ఆగస్టులో అఫ్గన్‌ను ఆక్రమించుకోవడంతో దేశం విడిచి వెళ్లేందుకు పెద్ద సంఖ్యలో జనం కాబూల్ విమానాశ్రయానికి చేరుకున్న విషయం తెలిసిందే. ఒక్కసారిగా జన ప్రవాహం పోటెత్తడంతో వారిని అదుపు చేయడానికి తీవ్రంగా శ్రమించాల్సి వచ్చింది. ఇదే సమయంలో అమెరికా సైనికులు పలువురు చిన్నారులను ఆక్కున చేర్చుకుని మానవత్వాన్ని చాటుకున్నారు. శరణార్ధుల తరలింపు సందర్భంగా అమెరికా సైనికులకు అప్పగించిన ఓ రెండు నెలల చిన్నారి ఆచూకీ ఎట్టకేలకు లభించి బంధువుల చెంతకు చేరింది. దీంతో ఆ పాప కోసం ఎదురుచూసిన తల్లిదండ్రుల నిరీక్షణ ఫలించింది. కాబూల్‌లోని అమెరికా రాయబార కార్యాలయం వద్ద పదేళ్లు సెక్యూరిటీ గార్డుగా పనిచేసిన మిర్జా అలీ (35), తన భార్య సూరయా (32), ఐదుగురు పిల్లలతో దేశం విడిచి వెళ్లేందుకు ఆగస్టు 19న కాబూల్ విమానాశ్రయానికి వచ్చారు. ఈ సమయంలో రద్దీ ఎక్కువగా ఉండటంతో తన రెండు నెలల పాప సోహైల్ అహ్మదీ గురించి ఆందోళన చెందారు. ఈ క్రమంలో పాపను అమెరికా సైనికుడికి అందజేసి, మిగతా నలుగురు పిల్లలను తీసుకుని అతికష్టంతో విమానాశ్రయంలోకి ప్రవేశించారు. అనంతరం సోహైల్ కోసం వెళ్లగా పాప కనిపించలేదు. విమానాశ్రయంలో ఉంటే శిశువుకు చాలా ప్రమాదకరమని, పిల్లల కోసం ప్రత్యేక ప్రాంతానికి తీసుకెళ్లి ఉండవచ్చని ఓ మిలటరీ కమాండర్ చెప్పారు. కానీ అక్కడికి వెళ్లేసరికి ఎవరూ కనిపించలేదు. అన్ని చోట్ల వెదికినా ఫలితం లేకపోయింది. చిన్నారి తప్పిపోయి నెలలు గడుస్తున్నా ఆచూకీ దొరకపోవడంతో అఫ్గన్ శరణార్థుల మద్దతు బృందం సోషల్ మీడియాలో గత నవంబరులో క్యాంపెయిన్ ప్రారంభించింది. సొహైల్ ఫోటోతో ‘మిస్సింగ్ బేబీ’ గ్రూప్ సృష్టించి, ఎవరైనా గుర్తిస్తారనే ఆశతో దానిని వారి నెట్‌వర్క్‌లలో షేర్ చేసింది. చివరకు సొహైల్‌ను కాబూల్ విమానాశ్రయంలో హమీద్ సఫీ (29) అనే టాక్సీ డ్రైవర్ తన ఇంటికి తీసుకువెళ్లినట్టు గుర్తించారు. ఏడు వారాలకు పైగా చర్చలు, విజ్ఞప్తులు తర్వాత చివరికి తాలిబన్ అధికారుల జోక్యంతో కాబూల్‌లో ఉన్న సోహైల్ తాత, ఇతర బంధువులకు బిడ్డను అప్పగించాడు. కాబూల్ నుంచి ఖతార్.. అక్కడ నుంచి జర్మనీ మీదుగా అమెరికా చేరుకున్న మీర్జా అలీ కుటుంబం.. ప్రస్తుతం టెక్సాస్‌లోని అఫ్గన్ శరణార్ధి శిబిరంలో గడుపుతోంది. తమ వద్దకు పాపను చేర్చేడానికి సహకరించాలని వారు విజ్ఞ‌ప్తి చేస్తున్నారు.
By January 09, 2022 at 08:24AM
No comments