కొనసాగుతున్న అల్లు అర్జున్ హవా.. 'పుష్ప' ఖాతాలో మరో రికార్డు
స్టైలిష్ స్టార్ హీరోగా సుకుమార్ దర్శకత్వంలో రూపొందిన 'పుష్ప' మూవీకి నేటికీ భారీ ఆదరణ దక్కించుకుంటోంది. డిసెంబర్ 17న విడుదలైన ఈ సినిమాకు తెలుగు ప్రేక్షకులు నీరాజనం పలుకుతున్నారు. ఓవైపు ఓటీటీ వేదిక అమెజాన్ ప్రైమ్‌లో స్ట్రీమింగ్ అవుతున్నా థియేటర్స్‌లో కలెక్షన్ల ప్రవాహం సాగుతోంది. విడుదలైన అన్ని భాషల్లో హ్యుజ్ రెస్పాన్స్ తెచ్చుకున్న ఈ సినిమాకు బీటౌన్‌లో మంచి స్పందన లభిస్తోంది. నార్త్‌ ఇండియా ఆడియన్స్ పుష్పరాజ్ నటనకు ఫిదా అవుతున్నారు. దీంతో అక్కడ రికార్డు స్థాయిలో వసూళ్లు రాబడుతున్న ఈ మూవీ తాజాగా 'కేజీఎఫ్' రికార్డును బద్దలు కొట్టేసిందని సినీ విశ్లేషకులు చెబుతున్నారు. ఇటు నైజాం ఏరియాలో కూడా ఆల్ టైమ్ రికార్డ్ క్రియేట్ చేశాడు పుష్పరాజ్. ప్రస్తుతం ఈ సినిమా 332 కోట్లకు పైగా గ్రాస్ వసూలు చేసి లాభాల బాటలో పయనిస్తోంది. అల్లు అర్జున్ కెరీర్‌లో తొలి ప్యాన్ ఇండియా సినిమాగా వచ్చిన ఈ మూవీకి ఇంతటి ఆదరణ లభిస్తుండటం పట్ల చిత్ర యూనిట్ ఎంతో ఆనందంగా ఉంది. ఇకపోతే మ్యూజిక్ పరంగా కూడా ఈ సినిమా మరో రికార్డు నెలకొల్పింది. విడుదలై నెల రోజులు దాటినా ఎక్కడ చూసినా పుష్ప పాటలే వినిపిస్తున్నాయి. దీంతో అన్ని భాషల్లో ఈ సినిమా పాటలకు 1 బిలియన్ ప్లస్ వ్యూస్ వచ్చినట్లు పేర్కొంటూ అఫీషియల్ పోస్టర్ రిలీజ్ చేశారు మేకర్స్. ఎర్ర చందనం స్మగ్లింగ్ నేపథ్యంలో తెరకెక్కిన ఈ సినిమాలో అల్లు అర్జున్ పోషించిన పుష్పరాజ్ పాత్రకు విమర్శకుల ప్రశంసలు దక్కాయి. ఆయన సరసన నటించిన రష్మిక మందన భేష్ అనిపించుకుంది. అనసూయ, సునీల్ క్యారెక్టర్స్ పలువురి మన్ననలు పొందాయి. మొత్తంగా సూపర్ సక్సెస్ సాధించిన ఈ సినిమాకు సీక్వల్ కూడా రానుండటం జనాల్లో క్యూరియాసిటీ పెంచేసింది. మరికొద్ది రోజుల్లో 'పుష్ప' రెండో భాగాన్ని సెట్స్ మీదకు తీసుకురాబోతున్నారు డైరెక్టర్ సుకుమార్.
By January 20, 2022 at 07:20AM
No comments