భార్యకు కరోనా.. బయట చక్కర్లు కొడుతున్న సీఎం తమ్ముడు!

దేశంలో కరోనా మహమ్మారి మరోసారి దావానంలా వ్యాప్తిచెందుతుండటంతో అప్రమత్తంగా ఉంటూ, కోవిడ్ నిబంధనలు పాటించాలని ప్రభుత్వాలు, నిపుణులు పదే పదే హెచ్చరిస్తున్నాయి. అయినా సరే కొందరికి ఇవేమీ పట్టడం లేదు. కరోనా నిబంధనలు యథేచ్చగా ఉల్లంఘిస్తూ ఇష్టరీతిన తిరుగుతున్నారు. ఎవరో సామాన్యులు ఇలా చేస్తే వేరే విషయం. కానీ, సాక్షాత్తు ఓ ముఖ్యమంత్రి సోదరుడు కూడా ఇలాగే తిరగడంతో అతడిపై సీఎం ఆగ్రహం వ్యక్తం చేశారు. ఇంట్లో ఒకరికి కొవిడ్‌ సోకినప్పటికీ ఆయన మాత్రం బయట తిరగడం గమనార్హం. అది ఎవరో కాదు ముఖ్యమంత్రి సోదరుడే. ఇంట్లో ఒకరికి కరోనా సోకినా తన సోదరుడు బహిరంగంగా తిరుగుతున్నాడని సీఎం మమతా బెనర్జీ స్వయంగా వెల్లడించారు. రాష్ట్రంలో కొవిడ్‌ కేసులు భారీగా పెరుగుతోన్న సమయంలో ఇంట్లోని వారే కొవిడ్‌ నిబంధనలు ఉల్లంఘించడం పట్ల సోదరుడ్ని మందలించానని ఆమె తెలిపారు. ‘మీ ఇంట్లో ఎవరైనా కొవిడ్‌ బారినపడితే మరిచిపోయి మీరు బయట తిరగకండి.. మా ఇంట్లో ఓ వ్యక్తి అలాగే చేశారు. అందుకు నేను బాధపడుతున్నాను.. నా చిన్న తమ్ముడు బాబున్ బెనర్జీ భార్యకు కొవిడ్‌ పాజిటివ్‌గా నిర్ధారణ అయ్యింది. కానీ, నా సోదరుడు మాత్రం నిబంధనలు ఉల్లంఘించి బయట తిరుగుతుండటం నాకు నచ్చలేదు. దీంతో రేపటి నుంచి ఎక్కడికీ వెళ్లవద్దని గట్టిగా మందలించాను. నేను ముక్కుసూటిగా మాట్లాడే వ్యక్తిని.. గుర్తుపెట్టుకోండి’ అంటూ మమతా బెనర్జీ తనకు ఎదురైన అనుభవాన్ని వెల్లడించారు. ఏడు రోజుల క్వారంటైన్ గడువు ముగిసిన తర్వాత కూడా తాను కోవిడ్‌-19 నిబంధనలు తప్పకుండా పాటిస్తానని దీదీ స్పష్టం చేశారు. ప్రజలు కూడా నిర్లక్ష్యం చేయకుండా మాస్కులు ధరిస్తూ బాధ్యతగా వ్యవహరించాలని మమతా బెనర్జీ సూచించారు. వారం రోజులుగా బెంగాల్‌లో కొవిడ్‌ కేసులు గణనీయంగా పెరుగుతున్నాయి. రోజువారీ కేసుల సంఖ్య 15వేలు దాటింది. ముఖ్యంగా కోల్‌కతా నగరంలో వ్యాప్తి తీవ్రంగా ఉంది. ఆ రాష్ట్రంలో పాజిటివిటీ రేటు 24శాతానికి చేరింది. ఇదే సమయంలో తన కుటుంబంలోనే ఒకరు వైరస్ బారినపడ్డప్పటికీ తన సోదరుడు కోవిడ్‌ నిబంధనలు ఉల్లంఘిస్తూ బయట తిరుగుతున్నాడని తెలిసి బాధపడినట్లు మమతా చెప్పుకొచ్చారు. కొవిడ్‌ ఉద్ధృతి అంతకంతకూ పెరుగుతోన్న సమయంలో వచ్చే 15 రోజులు ఎంతో కీలకమని పేర్కొన్నారు. రానున్న రోజుల్లో రాష్ట్రంలో మరిన్ని ఆంక్షలు విధించే అవకాశం ఉందని మమతా బెనర్జీ వెల్లడించారు. కరోనా వైరస్ కేసుల పెరుగుదలతో జనవరి 7 నుంచి ప్రారంభం కావాల్సిన కోల్‌కతా అంతర్జాతీయ చిత్రోత్సవం రద్దయ్యింది.

By January 07, 2022 at 07:44AM

Read More https://telugu.samayam.com/latest-news/india-news/west-bengal-cm-mamata-banerjee-rebuke-for-brother-roming-around-due-to-covid/articleshow/88745935.cms