ఎమ్మెల్యే కారుపై పెట్రోల్ పోసి నిప్పంటించిన యువకుడు.. వీడియో వైరల్
గుర్తుతెలియని యువకుడు ఎమ్మెల్యే వాహనానికి అర్ధరాత్రి వేళ నిప్పంటించినను ఘటన హరియాణాలో చోటుచేసుకుంది. ఎమ్మెల్యే నివాస సముదాయం వద్ద అర్ధరాత్రి 12 గంటల ప్రాంతంలో కారుపై పెట్రోల్ పోసి తగలబెట్టాడు. ఈ ఘటన సమయంలో అక్కడ ఎవరూ లేకపోవడంతో పెను ప్రమాదం తప్పింది. ఈ దృశ్యాలు అక్కడ సీసీటీవీ కెమెరాలో రికార్డయ్యాయి. పానిపట్ ఎమ్మెల్యే ప్రమోద్ కుమార్ విజ్ మంగళవారం మంత్రివర్గణ విస్తరణ నేపథ్యంలో చండీగఢ్‌‌కు వచ్చారు. ఎమ్మెల్యే హాస్టల్‌లో తన టొయోటా ఫార్చ్యూనర్ కారును ప్రమోద్ కుమార్ విజ్ పార్కు చేసి ఉంచారు. మంగళవారం అర్ధరాత్రి 12:10 గంటల సమయంలో ఓ గుర్తుతెలియని యువకుడు ఆ కారుపై పెట్రోల్ పోసి నిప్పంటించాడు. ఆ సమయంలో ఎమ్మెల్యే పంచకులకు వెళ్లడం, అక్కడ ఎవరూ లేకపోవడంతో ఎటువంటి ప్రాణనష్టం జరగలేదు. ఆగంతుకుడు మద్యం మత్తులో ఉండి ఈ పని చేసి ఉంటాడని పోలీసులు అనుమానిస్తున్నారు. కేసు నమోదుచేసి దర్యాప్తు చేపట్టారు. ఈ ఘటనలో మొత్తం ముగ్గురికి సంబంధం ఉందని భావించి, వారి కోసం గాలిస్తున్నారు. సీసీటీవీలో రికార్డయిన దృశ్యాలలో ఆగంతుడు నలుపు రంగు ప్యాంటు, నీలం రంగు జాకెట్ ధరించి, ముఖానికి మాస్క్ వేసుకున్నాడు. తొలుత ఇనుప రాడ్‌తో కారు అద్దాలు పగులగొట్టి తర్వాత ముందు భాగంపై పెట్రోల్ పోసి నిప్పంటించాడు. ‘ఎమ్మెల్యే ప్రమోద్ కుమార్ విజ్‌ను ఫార్చ్యూనర్ వాహనంలో డ్రైవర్ ప్రదీప్ కుమార్ పంచకులలో దింపి చండీగఢ్ హాస్టల్‌కు వచ్చి పార్క్ చేశారు.. ఎప్పుడు చండీగఢ్ వచ్చినా ఇక్కడే వాహనాన్ని ఎమ్మెల్యే ఉంచుతారు.. ఈ ఘటనపై పోలీసులకు ఫిర్యాదు చేశారు’ అని అక్కడ సిబ్బంది తెలిపారు.
By December 30, 2021 at 10:16AM
No comments