JAIAUKUS అకూస్ కూటమిలోకి భారత్, జపాన్.. స్పష్టతనిచ్చిన అమెరికా
ఇటీవల ఇండో-పసిఫిక్‌లో అమెరికా, ఆస్ట్రేలియా, యునైటెడ్ కింగ్‌డమ్ (అకూస్) కూటమిగా ఏర్పడిన విషయం తెలిసిందే. తాజాగా ఈ కూటమిలో భారత్ లేదా జపాన్‌ను చేర్చుకోవడంపై అమెరికా స్పష్టతనిచ్చింది. కూటమిలో భాగంగా అమెరికా సాంకేతికత సాయంతో అణు శక్తిని కలిగి ఉన్న జలాంతర్గాములను ఆస్ట్రేలియా నిర్మించనుంది. ఈ నేపథ్యంలో వైట్‌హౌస్ ప్రెస్ సెక్రెటరీ జెన్ సాకీ బుధవారం మీడియాతో మాట్లాడుతూ.. అకూస్ కూటమిలో కొత్త సభ్యులను చేర్చుకునే అంశంపై కీలక వ్యాఖ్యలు చేశారు. ‘గత వారం ప్రకటన ఒక సూచన మాత్రమే కాదు... ఇండో-పసిఫిక్‌లో భద్రతకు సంబంధించిన అంశాల్లో మరెవరికీ భాగస్వామ్యం లేదని (ఫ్రెంచ్ అధ్యక్షుడు ఇమ్మాన్యుయేల్) మెక్రాన్‌కు అధ్యక్షుడు కూడా పంపిన సందేశం ఇదేనని నేను భావిస్తున్నాను’ అన్నారు. అకూస్ కూటమిలో తమకు చోటు కల్పించకపోవడంపై విమర్శలు గుప్పించిన ఫ్రాన్స్.. ఇండో-పసిఫిక్ ప్రాంతంలో ఎదుర్కొంటున్న సాధారణ సవాళ్లపై పొందిక లేకపోవడాన్ని ప్రతిబింబిస్తోందని వ్యాఖ్యానించింది. ‘వాస్తవానికి ఈ ప్రాంతంలోని ప్రత్యక్ష ఆసక్తి ఉన్న అనేక దేశాలు సహా ఫ్రాన్స్‌తో చర్చలలో ఇది ఒక ముఖ్యమైన అంశం’ అని సాకీ అన్నారు. ఈ వారం క్యాడ్ శిఖరాగ్ర సమావేశం జరగునుందని, ఒకవేళ భారత్ లేదా జపాన్‌ను అకూస్‌లో చేర్చుకుంటారా? అన్న ప్రశ్నకు జెన్ సాకీ ఆసక్తికర సమాధానం ఇచ్చారు. ‘అకూస్ జకూస్ (JAUKUS)? అవుతుంది ()’ అని అన్నారు. ఇండో- పసిఫిక్ ప్రాంతంలో చైనా ప్రాబల్యం ఎక్కువ కావడంతో దానిని నిలువరించేందుకు అమెరికా తీవ్రంగా ప్రయత్నిస్తోంది. ఇందులో భాగంగా బ్రిటన్, ఆస్ట్రేలియాతో కలిసి ఈ చరిత్రాత్మక ఒప్పందాన్ని కుదుర్చుకుంది. ఇండో-పసిఫిక్ ప్రాంతంలో భద్రత, శ్రేయస్సును ప్రోత్సహించడమే లక్ష్యంగా ఈ నూతన భాగస్వామ్యం ఏర్పడిందని అమెరికా అధ్యక్షుడు జో బైడెన్, యూకే, ఆస్ట్రేలియా ప్రధానులు బోరిస్ జాన్సన్, స్కాట్ మోరిసన్ సంయుక్త ప్రకటనలో తెలిపారు. ఒప్పందాన్ని చైనా తీవ్రంగా ఖండించింది. అమెరికా, బ్రిటన్, ఆస్ట్రేలియా దురుద్దేశపూర్వక ఆయుధ పోటీ ప్రాంతీయ శాంతి, స్థిరత్వానికి తీవ్ర విఘాతం కలుగుతోందని, అంతర్జాతీయ అణు-నిరాయుధీకరణ లక్ష్యాలకు తూట్లు పొడిచేలా ఉందని చైనా విదేశాంగ శాఖ వ్యాఖ్యానించింది.
By September 23, 2021 at 12:19PM
No comments