అమెరికా పంచన చేరిన చైనా నేత.. అగ్రరాజ్యం చేతిలో వుహాన్ ల్యాబ్ రహస్యాలు!

కోవిడ్ మూలాలపై ల్యాబ్ లీక్ థియరీ అనుమానాలకు బలం చేకూర్చే ఆధారాలు రోజుకోటి బయటపడుతున్నాయి. తాజాగా, వుహాన్ వైరాలజీ ఇన్‌స్టిట్యూట్ నుంచి కరోనా లీకయిందనడానికి ఆధారాలు అమెరికాకు చిక్కాయనే ప్రచారం జోరుగా సాగుతోంది. చైనా ప్రభుత్వంలోని ఉన్నతస్థాయి అధికారి ఒకరు ప్లేటు ఫిరాయించి, అమెరికా పంచన చేరినట్లు వార్తలు గుప్పుమంటున్నాయి. ఈ అధారాలతోనే అమెరికా అధ్యక్షుడు జో బైడెన్ 90 రోజుల్లోగా కోవిడ్ మూలాలపై సమగ్ర నివేదిక అందజేయాలని నిఘా వర్గాలను ఆదేశించారని సమాచారం. చైనా మినిస్ట్రీ ఆఫ్ స్టేట్ సెక్రెటరీ విభాగం వాస్తవానికి ఇది‘గువాన్‌బు’ అనే గూఢచర్య సంస్థ. దీని వైస్ మిస్టర్ డాంగ్‌ జింగ్‌వెయ్‌ అమెరికా పంచన చేరారని తెలుస్తోంది. శత్రువుల గూఢచర్య కార్యకలాపాలను తిప్పికొట్టడానికి ఉద్దేశించిన కౌంటర్‌ ఇంటెలిజెన్స్‌ ఆపరేషన్లకు 2018 ఏప్రిల్‌ నుంచి డాంగ్ నేతృత్వం వహిస్తున్నారు. అయితే, ఆయన కొంతకాలంగా కనిపించడం లేదనే వార్తలు చైనా సోషల్ మీడియాలో హల్‌చల్ చేస్తున్నాయి. ఆ తర్వాత.. ఆయన అమెరికాకు పారిపోయినట్టు ప్రచారం మొదలయ్యింది. అమెరికాలో స్థిరపడిన చైనా విదేశాంగ శాఖ మాజీ అధికారి, ప్రజాస్వామ్య అనుకూలవాది హన్‌ లియాంచావో జూన్ 16న చేసిన ఓ ట్వీట్‌తో ఈ విషయం వెలుగులోకి వచ్చింది. 1989 తియానన్మెన్‌ స్క్వేర్‌ ఊచకోత ఘటన తర్వాత లియాంచావో అమెరికాకు పారిపోయారు. మరోవైపు, డాంగ్‌ అదృశ్యంపై చైనా సైతం ఆందోళన చెందుతోంది. అయితే ఈ విషయాన్ని అధికారికంగా ధ్రువీకరించడంలేదు. తన కుమార్తెతో కలిసి హాంకాంగ్‌ మీదుగా ఫిబ్రవరి 10న డాంగ్‌ జింగ్‌వెయ్ అమెరికాకు చేరుకున్నట్టు హన్‌ పేర్కొన్నారు. హన్ తెలిపిన వివరాల ప్రకారం.. ‘‘ఈ ఏడాది మార్చిలో అలాస్కా వేదికగా జరిగిన అమెరికా-చైనా సమావేశంలో డాంగ్‌ అంశం ప్రస్తావనకు వచ్చింది.. అతడిని అప్పగించాలని చైనా విదేశాంగ మంత్రి వాంగ్ యీ చేసిన అభ్యర్థనను అమెరికా విదేశాంగ మంత్రి ఆంటోని బ్లింకన్‌, జాతీయ భద్రత సలహాదారు జాక్‌ సలైవాన్‌‌లు తోసిపుచ్చారు’’ అని అన్నారు. అమెరికాలో గూఢచర్యం, విదేశాంగ విధానాలపై కథనాలు వెలువరించే ‘స్పై టాక్‌ న్యూస్‌ లెటర్‌’ కూడా డాంగ్‌ ప్లేటు ఫిరాయించి ఉండొచ్చని పేర్కొంది. అదే నిజమైతే చైనా చరిత్రలోనే అతిపెద్ద ‘వెన్నుపోటు’ అవుతుందని వ్యాఖ్యానించింది. అమెరికాకు చెందిన పలు పత్రికలు కూడా డాంగ్‌ చైనా నుంచి పారిపోయినట్లు కథనాలు ప్రచురించాయి. ప్రస్తుతం ఆయన ‘అమెరికా డిఫెన్స్‌ ఇంటెలిజెన్స్‌ ఏజెన్సీ’ (డీఐఏ) అదుపులో ఉన్నట్లు వ్యాఖ్యానించాయి. ఈ నేపథ్యంలో వుహాన్‌ ల్యాబ్‌లో జీవాయుధ పరిశోధనల ఆనవాళ్లను దొరక్కకుండా డ్రాగన్ నాశనం చేస్తున్నట్టు పేర్కొన్నాయి. చైనా ప్రత్యేక ఆయుధ వ్యవస్థలు, వుహాన్‌ ల్యాబ్‌లో చైనా సైన్యం కార్యకలాపాలు, సార్స్‌-కోవ్‌-2 వైరస్‌ మూలాలు, అమెరికాలో ఉన్న చైనా గూఢచారుల వివరాలకు సంబంధించిన పూర్తి సమాచారం డాంగ్‌ వద్ద ఉంది. వీటికి సంబంధించి ‘టెరాబైట్ల కొద్దీ డేటా’ను ఆయన డీఐఏకు అందించినట్లు ‘రెడ్‌స్టేట్‌’ పత్రిక పేర్కొంది. అయితే, డాంగ్‌ అంశంపై చైనా అధికారికంగా స్పందించలేదు. కానీ జూన్‌ 18న డాంగ్‌ ఒక కౌంటర్‌ ఇంటెలిజెన్స్‌ సదస్సులో పాల్గొన్నట్లు అధికార కమ్యూనిస్ట్ పార్టీకి చెందిన ఓ వెబ్‌సైట్‌ పేర్కొంది. విదేశీ శక్తుల తరఫున పనిచేస్తున్న నమ్మకద్రోహుల విషయంలో అప్రమత్తంగా ఉండాలని ఆయన హెచ్చరించినట్టు తెలిపింది. కానీ, డాంగ్ మాత్రం చివరిసారిగా గతేడాది సెప్టెంబరులో బయట ప్రపంచానికి కనిపించారు. ఈ ఫోటోను అప్పటి నుంచి చైనా సెర్చ్ ఇంజిన్ బైడు తొలగించింది.

By June 21, 2021 at 09:16AM

Read More https://telugu.samayam.com/latest-news/international-news/top-chinese-spy-defects-to-the-us-reveals-wuhan-lab-leak-secrets/articleshow/83706023.cms