నిరసన తెలపడం తీవ్రవాదం కాదు.. ఢిల్లీ అల్లర్ల కేసులో హైకోర్టు సంచలన వ్యాఖ్యలు
పౌరసత్వ సవరణ చట్టానికి వ్యతిరేకంగా గతేడాది ఢిల్లీలో చేపట్టిన నిరసనలు హింసకు దారితీసి 53 మంది ప్రాణాలు కోల్పోయిన విషయం తెలిసిందే. ఈ ఘటనల్లో అరెస్టయిన ముగ్గురికి మంగళవారం బెయిల్ మంజూరు చేసింది. ఉద్యమకారులు పింజ్రా టాడ్ సభ్యులు నటాషా నర్వాల్, దేవాంగణ కలిత, జామియా మిల్లియా ఇస్లామియా విద్యార్థి అసిఫ్ ఇక్బాల్ తన్హాలకు ఏడాది తర్వాత బెయిల్ ఇచ్చింది. నిందితులకు కింద కోర్టు బెయిల్ నిరాకరించిన అంశాన్ని జస్టిస్ సిద్ధార్థ్ మృదుల్, జస్టిస్ అనూప్ జయరామ్ భంభానీల ధర్మాసనం పక్కనబెట్టింది. షరతులతో కూడిన బెయిల్‌కు అనుమతించింది. పాస్‌పోర్టులు అప్పగించడం, దర్యాప్తును ప్రభావితం చేసే చట్టవిరుద్ధమైన కార్యకలాపాలకు దూరంగా ఉండడం వంటివి షరతులను విధించింది. ‘‘రాజ్యాంగం కల్పించిన నిరసన తెలిపే హక్కు.. ఉగ్రవాద కార్యకలాపాల మధ్య ఉన్న బేధాన్ని ప్రభుత్వం అర్థం చేసుకోవాల్సిన అవసరం ఉందని కోర్టు తన ఉత్తర్వులో సూచించింది. ‘‘అసమ్మతిని అణిచివేయాలనే ప్రభుత్వ ధోరణి రాజ్యాంగబద్ధంగా లభించిన నిరసన హక్కు.. ఉగ్రవాద కార్యకలాపాల మధ్య ఉన్న అంతరం అర్ధం చేసుకోవడంలో కొంత అస్పష్టత కనిపిస్తోంది.. ఈ మనస్తత్వం ప్రదర్శిస్తే అది ప్రజాస్వామ్యానికి విచారకరమైన దినం అవుతుంది’’ అని ధర్మాసనం వ్యాఖ్యానించింది. నటాషా నర్వాల్ తండ్రి చనిపోవడంతో ఆయన అంత్యక్రియల కోసం గత నెలలో మూడు వారాల మధ్యంతర బెయిల్‌ను మంజూరు చేసిన విషయం తెలిసిందే. బెయిల్ పూర్తి కావడంతో ఆమె మే 31న తిరిగి జైలుకు వెళ్లారు. ఢిల్లీ అల్లర్ల కుట్ర వెనుక నటాషా నర్వాల్, దేవాంగన కలిత హస్తం ఉందనే ఆరోపణలతో పోలీసులు అదుపులోకి తీసుకున్నారు. తొలుత ఢిల్లీలోని జఫ్రాబాద్ ప్రాంతంలో అల్లర్ల కేసులో అరెస్ట్ కాగా.. కొద్ది రోజలు తర్వాత బెయిల్‌పై బయటకు వచ్చారు. అయితే, మరో కేసులో బెయిల్ వచ్చిన మర్నాడే అరెస్టయ్యారు. ఈ ఏడాది జనవరిలో కలితకు ఢిల్లీ సెషన్స్ కోర్టు బెయిల్ నిరాకరించింది. ఈ ఇద్దరూ మహిళ హక్కుల కోసం పోరాటం చేసే పింజ్రా టాడ్ స్వచ్ఛంద సంస్థకు చెందినవారే. గత నెలలో అసిఫ్ ఇక్బాల్ తన్హా పరీక్షలకు హాజరయ్యేందుకు హైకోర్టు బెయిల్ మంజూరు చేసింది. పరీక్షలు పూర్తయిన తర్వాత జూన్ 26న తిరిగి జైలుకు రావాలని పేర్కొంది. అయితే, ప్రస్తుతం బెయిల్ మంజూరు చేయడంతో ఊరట లభించింది.
By June 15, 2021 at 12:28PM
No comments