Breaking News

మరోసారి చైనా ఇంజినీరింగ్ అద్బుతం.. 28 గంటల్లో 10 అంతస్థుల భవనం నిర్మాణం!


చైనా తన ఇంజినీరింగ్ ప్రతిభతో మరోసారి అద్భుతం చేసింది. పది అంతస్థుల భవన నిర్మాణాన్ని కేవలం 28 గంటల 45 నిమిషాల వ్యవధిలో పూర్తి చేసి ప్రపంచాన్ని ఆశ్చర్యపరిచింది. చైనాకు చెందిన బ్రాడ్ గ్రూప్ అనే రియల్ ఎస్టేట్ కంపెనీ ఒక్క రోజులోనే ఈ భారీ భవనాన్ని నిర్మించింది. 28 గంటల్లో పది అంతస్థుల భవనం నిర్మించారంటే.. మార్కెట్లో దొరికే చైనా సరకులా ఈ బిల్డింగ్ కూడా నాణ్యంగా ఉండదేమో అనుకోకండి. భూకంపాలు వచ్చినా తట్టుకునేలా ఈ భవనాన్ని నిర్మించారట. ఈ భవన నిర్మాణానికి సంబంధించిన దాదాపు 5 నిమిషాల నిడివి ఉన్న వీడియోను బ్రాడ్ గ్రూప్ సోషల్ మీడియాలో షేర్ చేయగా.. అది వైరల్ అయ్యింది. మామూలు ఇల్లు కట్టుకోవడానికే.. చేతిలో డబ్బులున్నప్పటికీ.. నెలల సమయం పడుతుంది కదా.. మరి ఏకంగా పది అంతస్థుల భవనాన్ని ఒక్క రోజులో ఎలా కట్టేశారు అనుకుంటున్నారా..? ఈ భవన నిర్మాణం కోసం బ్రాడ్ గ్రూప్.. ప్రి ఫాబ్రికేటెడ్ కన్‌స్ట్రక్షన్ సిస్టమ్స్‌ను వాడింది. అంటే రూములు, ఇతర బిల్డింగ్ మాడ్యుళ్లను ముందుగానే ఫ్యాక్టరీలో తయారు చేశారు. కంటైనర్ల ఆకారంలో ఉండే ఈ మాడ్యుల్స్‌ను ట్రక్కుల ద్వారా భవనాన్ని నిర్మించే చోటుకు చేర్చారు. ఈ బిల్డింగ్ మాడ్యుల్స్ అన్ని ఒకే పరిమాణంలో ఉండేలా, రవాణాకు వీలుగా ఉండేలా జాగ్రత్తలు తీసుకున్నారు. 40 అడుగుల పొడవు, 8 అడుగుల వెడల్పు, పది అడుగుల ఎత్తుతో ఒక్కో మాడ్యుల్‌ను నిర్మించారు. వాటన్నింటిని కన్‌స్ట్రక్షన్ సైట్‌కు తీసుకెళ్లి.. ఒకదాని పైన మరొకటి పేర్చుకుంటూ వెళ్లి.. బోల్టులు బిగించి.. ఓ భవనంలా మార్చేశారు. ఆ తర్వాత వాటర్, కరెంట్ కనెక్షన్ ఇచ్చేసి.. వెంటనే ఆ భవనంలోకి కుటుంబాలు వెళ్లి నివాసం ఉండేలా రెడీ చేశారు. పర్ఫెక్ట్ ప్లానింగ్‌తో తక్కువ టైంలోనే పని పూర్తి చేశారు. ఇలా భవనాన్ని నిర్మించడం ఎంతో తేలిక అని బ్రాడ్ గ్రూప్ చెబుతోంది. మాడ్యుళ్లను పేర్చుకుంటూ వెళ్లి.. బోల్టులు బిగించి... వాటర్, కరెంట్ సరఫరా ఇచ్చేసి.. ఒక్క రోజులోనే 10 అంతస్థుల భవంతిని నిర్మించామని చెబుతోంది. సాధారణ భవన నిర్మాణంతో పోలిస్తే ఇలాంటి నిర్మాణానికి ఖర్చు తక్కువ, మన్నిక ఎక్కువట. వెలుతురు ఎక్కువ వచ్చేలా డిజైన్ చేయడంతో కరెంట్ కూడా ఆదా అవుతుందట. అవసరం అనుకుంటే.. బోల్టులు ఊడదీసి.. మాడ్యుళ్లను తరలించి.. కావాల్సిన ప్రాంతంలో నిర్మాణం చేపట్టొచ్చట. విలాసవంతమైన రెసిడెన్షియల్ అపార్ట్‌మెంట్ల నిర్మాణానికి ఈ విధానం చక్కగా సరిపోతుందని బ్రాడ్ గ్రూపు చెబుతోంది. పది అంతస్థులు ఏం కర్మ.. ఏకంగా 200 అంతస్థుల ఎత్తున ఉండే ఆకాశహర్మ్యాలను సైతం ఈజీగా కట్టేయొచ్చని చైనా కంపెనీ నమ్మకంగా చెబుతోంది. వాస్తవానికి బ్రాడ్ గ్రూప్ మొదట్లో ఏసీ యూనిట్లను ఉత్పత్తి చేసేది. తర్వాత మాడ్యులర్ కన్‌స్ట్రక్షన్ వైపు అడుగులేసింది. ఇలా మాడ్యుల్స్‌తో 220 అంతస్థులతో ప్రపంచంలోనే ఎత్తయిన భవంతిని ఏడు నెలల్లో నిర్మించాలని 2012లోనే ఆ గ్రూపు భావించింది. పని కూడా మొదలుపెట్టారు. కానీ ఈ భారీ ఆకాశహర్మ్యం సురక్షితం కాదేమోనని జనం భయపడటం.. ప్రభుత్వం నుంచి అనుమతులు రాకపోవడంతో.. నిర్మాణం ముందుకు సాగలేదు. ఆ భవనం కోసం తీసిన పునాదులను చేపల పెంపకానికి అనువుగా మార్చేశారు.


By June 24, 2021 at 07:16AM


Read More https://telugu.samayam.com/latest-news/international-news/10-storey-earthquake-resistant-residential-building-in-china-constructed-within-28-hours/articleshow/83797555.cms

No comments