కోవిడ్ విజృంభణ.. అంక్షల విషయమై మహారాష్ట్ర బాటలో ఢిల్లీ
దేశ రాజధాని ఢిల్లీని కరోనా మహమ్మారి మరోసారి కమ్మేస్తోంది. ఢిల్లీలో నాలుగో సారి కోవిడ్ విజృంభిస్తోంది. రోజు రోజుకూ పాజిటివ్ కేసులు పెరుగుతుండటంతో వైరస్ కట్టడికి అరవింద్ కేజ్రీవాల్ ప్రభుత్వం మంగళవారం కీలక నిర్ణయం తీసుకుంది. రాత్రిపూట కర్ఫ్యూ విధిస్తున్నట్టు ఆప్ సర్కారు ప్రకటించింది. రాత్రి 10 గంటల నుంచి ఉదయం 5 గంటల వరకు నిషేధాజ్ఞలు అమల్లో ఉంటాయని స్పష్టం చేసింది. నేటి రాత్రి నుంచే (ఏప్రిల్ 6) అమల్లోకి రానుండగా.. ఈ నెల 30 వరకు కర్ఫ్యూ ఉంటాయని వివరించింది. అనుమతులు లేకుండా ఎవరైనా బయటకు వస్తే కఠిన చర్యలు తప్పవని హెచ్చరించింది. సోమవారం ఢిల్లీలో 3,548 మందికి కొత్తగా కోవిడ్ నిర్ధారణ కాగా... మరో 15 మంది చనిపోయారు. పాజిటివ్ కేసుల్లో ఆరు శాతం పెరుగుదల నమోదవుతోంది. కరోనా మృతుల సంఖ్య కూడా పెరుగుతుండటంతో ముఖ్యమంత్రి అరవింద్ కేజ్రీవాల్ అప్రమత్తమయ్యారు. రాష్ట్రంలో ప్రస్తుతానికి లాక్ డౌన్ విధించేది లేదని, అయితే రాత్రిపూట కర్ఫ్యూ మాత్రం అమల్లో ఉంటుందని స్పష్టం చేశారు. గత శుక్రవారం కేజ్రీవాల్ మాట్లాడుతూ.. ఢిల్లీలో నాలుగో దశ వ్యాప్తి మొదలైందని అన్నారు. ప్రస్తుతం లాక్‌డౌన్ విధించాలని భావించడంలేదన్న సీఎం.. ఈ విషయంలో ప్రజల అభిప్రాయాలను తెలుసుకుని నిర్ణయం తీసుకుంటామన్నారు. పరిస్థితిని నిశితంగా గమనించి తదుపరి చర్యలు చేపడతామని తెలిపారు. రాత్రి కర్ఫ్యూ విధించడంతో వాహనాలను నిలిపివేయడం ఉండదు. వ్యాక్సినేషన్ ప్రక్రియ కూడా రాత్రివేళ కొనసాగుతుంది. అత్యవసర సర్వీసులు, నిత్యావసరాల కోసం వెళ్లే వ్యాపారులు, జర్నలిస్ట్‌లను అనుమతిస్తారు. అయితే, వీరంతా ఈ-పాస్‌లు తప్పనిసరిగా తీసుకోవాలి. ప్రయివేట్, ప్రభుత్వ వైద్యులు, నర్సులు, ఇతర వైద్య సిబ్బందికి వారి ఐడీ కార్డులతో అనుమతించనున్నారు. గర్భిణీ మహిళలకు మినహాయింపు ఉంటుంది. ప్రజల రాత్రివేళ అనవసరంగా బయటకు తిరక్కుండా చర్యలు చేపట్టారు. ఇప్పటికే మహారాష్ట్ర, రాజస్థాన్ వంటి రాష్ట్రాలు రాత్రిపూట కర్ఫ్యూను కొనసాగిస్తున్నాయి. దేశంలో కరోనా రెండో దశ వ్యాప్తి అసాధారణంగా ఉంది. సోమవారం అత్యధికంగా లక్షకుపైగా పాజిటివ్ కేసులు నమోదుకాగా.. దేశంలో వైరస్ మొదలైన 14 నెలల తర్వాత ఇంత పెద్ద సంఖ్యలో ఒక్క రోజు కేసులు నిర్ధారణ కావడం ఇదే తొలిసారి.
By April 06, 2021 at 01:59PM
No comments