గూగుల్‌లో లైంగిక వేధింపులు.. సుందర్ పిచ్చాయ్‌కు లేఖ రాసిన 500 మంది ఉద్యోగులు

టెక్‌ దిగ్గజం గూగుల్ ఆల్ఫాబెట్‌లో లైంగిక వేధింపుల అంశం మరోసారి చర్చనీయాంశమవుతోంది. సంస్థలోని 500 మందికిపైగా ఉద్యోగులు గూగుల్ సీఈఓకి లేఖ రాయడం కలకలం రేగుతోంది. వేధింపులు తారస్థాయికి చేరాయంటూ గూగుల్‌ సీఈవో సుందర్‌ పిచాయ్‌కి వీరు బహిరంగ లేఖ రాశారు. తమను ఆదుకోవాలని విజ్ఞప్తి చేసిన బాధితులు.. వేధింపులకు పాల్పడేవారిని రక్షించడం ఆపాలని కోరారు. గూగుల్‌ మాజీ ఉద్యోగి ఎమీ నీట్‌ఫీల్డ్‌ వేధింపులకు గురైతే సంస్థ ఎలా వ్యవహరించిందో తెలియజేస్తూ న్యూయార్క్‌ టైమ్స్‌ ఓ కథనం ప్రచురించిన కొద్ది రోజులకే ఉద్యోగులు ఈ లేఖ రాయడం గమనార్హం. ‘గూగుల్‌లో పనిచేసిన తర్వాత ఎన్నడూ మళ్లీ ఉద్యోగం చేయాలనిపించలేదు’ ఎమీ నీట్‌ఫీల్డ్‌ తన అనుభవాలను ఈ కథనంలో వెల్లడించారు. ‘‘నన్ను వేధించిన వ్యక్తితోనే బలవంతంగా ముఖాముఖి భేటీలు నిర్వహించారు.. అతని పక్క సీటులోనే కూర్చోబెట్టారు.. అతడితో ఇబ్బందిగా ఉందని చెప్పినా.. విచారణాధికారులు పట్టించుకోలేదు.. అంతేకాదు, తనకే ‘కౌన్సెలింగ్‌ తీసుకోండి, ఇంటి నుంచి పనిచేయండి, లేదా సెలవుపై వెళ్లండి’ అని సలహా ఇచ్చారు.. ఈ అనుభవం తనకు మాత్రమే కాదని, అంతకు ముందు వేధింపులకు గురైన చాలా మంది విషయంలోనూ గూగుల్‌ ఇలాగే వ్యవహరించినట్టు తెలిసిందని’’ అమె వివరించారు. గూగుల్‌లో ఎమీది తొలి కేసేమీ కాదని సుందర్‌ పిచ్చాయ్‌కు రాసిన లేఖలో ఉద్యోగులు పేర్కొన్నారు. గతంలోనూ వేధింపులకు పాల్పడి వారినే సంస్థ సమర్థించిందని ఆరోపించారు. లైంగిక వేధింపులకు వ్యతిరేకంగా 2018లో 20వేల మందికి పైగా ఉద్యోగులు నిరసన తెలిపారని.. అయినా సంస్థ వ్యవహారశైలిలో మార్పు రాలేదని దుయ్యబట్టారు. లైంగిక వేధింపులకు గురైన బాధితులు భారాన్ని భరించాల్సి వస్తుంది.. సాధారణంగా ఆల్ఫాబెట్‌ను వదిలివేసేటప్పుడు నిందితుడి ప్రవర్తనకు ప్రతిఫలం లభిస్తుంది అని ఆరోపించారు. ఓ మహిళా ఉద్యోగిని తనతో ఓరల్ సెక్స్‌లో పాల్గొనాలంటూ వేధించిన ఆండ్రాయిడ్ మొబైల్ సాఫ్ట్‌వేర్ క్రియేటర్ ఆండీ రుబిన్‌‌ను ఉద్యోగం నుంచి తొలగించి ప్యాకేజీ కింద 90 మిలియన్ డాలర్లు చెల్లించింది.. లైంగిక వేధింపులకు పాల్పడిన మాజీ సెర్చ్ ఎగ్జిక్యూటివ్ అమిత్ సింఘాల్‌కు కూడా 35 మిలియన్ డాలర్లు ఇచ్చిందని లేఖలో ప్రస్తావించారు. అయితే, గూగుల్‌ మాత్రం ఉద్యోగుల ఆందోళనలపై విచారణ తీరును మెరుగుపర్చుకున్నామని ఓ ప్రకటనలో తెలిపింది. ఉద్యోగుల సంరక్షణకు కొత్త కార్యక్రమాలు చేపడుతున్నామని పేర్కొంది.

By April 12, 2021 at 08:31AM

Read More https://telugu.samayam.com/latest-news/international-news/rising-cases-of-harassment-at-google-over-500-employees-write-open-letter-to-sundar-pichai/articleshow/82024208.cms