సెట్లో పవన్ కళ్యాణ్‌తో అనుభవం.. రాత్రికి రాత్రే మార్పు వస్తుందనుకోను: నివేదా థామస్
పవర్‌స్టార్ పవన్‌కళ్యాణ్ రీ- ఎంట్రీ మూవీ 'వకీల్‌సాబ్' ఏప్రిల్ 9న విడుదలై విజయవంతంగా ప్రదర్శింపబడుతోంది. కలెక్షన్స్ పరంగా భేష్ అనిపించుకుంటూ సరికొత్త రికార్డులు క్రియేట్ చేస్తోంది. ఈ నేపథ్యంలో చిత్ర విజయం పట్ల ఆనందం వ్యక్తం చేస్తూ హీరోయిన్ మీడియాతో పలు ఆసక్తికర విషయాలు పంచుకుంది. ఈ సినిమా సక్సెస్ తనకెంతో సంతోషాన్నిచ్చిందని పేర్కొంటూ 'వకీల్‌సాబ్' షూటింగ్ సమయంలో సెట్స్‌పై పవన్ కళ్యాణ్ ఉండే విధానం, ఈ సినిమాపై తన అభిప్రాయాన్ని వెల్లడించింది. బాలీవుడ్ సూపర్ హిట్ మూవీ 'పింక్' రీమేక్ సినిమాగా ప్రేక్షకుల ముందుకొచ్చింది. అయితే సామాజిక కోణంలో ఉండే ఇలాంటి కథను పవన్ కళ్యాణ్ ఎంపిక చేసుకొని మమ్మల్ని కూడా భాగం చేసినందుకు కృతజ్ఞతలు అని చెబుతూ పలు విషయాలపై స్పందించింది నివేదా. పవన్ కళ్యాణ్ గారు సెట్లో చాలా ప్రశాంతంగా ఉంటారని, అప్పుడప్పుడు ఆయన చెప్పే కొన్ని విషయాలు చాలా ఆసక్తికరంగా, ఆలోచింపజేసేలా ఉండేవని ఆమె పేర్కొంది. ఇందులోని సందేశం ఎక్కువ మందికి చేరువ కావడమే ఈ సినిమాతో తాను సాధించిన విజయంగా భావిస్తున్నానని తెలిపింది. కాకపోతే అది కేవలం పవన్ కళ్యాణ్ వల్లనే సాధ్యమైందని నివేదా చెప్పుకొచ్చింది. ఇలాంటి సినిమాలతో సమాజంలో రాత్రికి రాత్రే మార్పు వస్తుందనుకోను కానీ, అందరిలో ఓ ఆలోచనైతే మొదలవుతుందని చెప్పిన నివేదా.. సమాజం ఎదుర్కొంటున్న ఇలాంటి సమస్యలపై మరిన్ని కథలు రావాలని కోరుకుంది. ఇకపోతే తన రోల్ చిన్నదా, పెద్దదా? అది భారీ బడ్జెట్ సినిమానా లేక తక్కువ బడ్జెట్ సినిమా అనేది పట్టించుకోకుండా సినిమాలు చేస్తుంటా అని చెప్పింది. ప్రతి పాత్ర తనకు సమానమే అని, కథ నచ్చిందంటే మిగతా విషయాలేవీ పట్టించుకోకుండా కెమెరా ముందుకొచ్చేస్తా అని నివేదా పేర్కొంది. 'వకీల్ సాబ్' చిత్రానికి వేణు శ్రీరామ్ దర్శకత్వం వహించగా.. దిల్ రాజు, బోనీ కపూర్ సంయుక్తంగా నిర్మించారు. ఈ మూవీలో పవన్ కళ్యాణ్ సరసన అంజలి, నివేదా థామస్, అనన్య నాగేళ్ల హీరోయిన్లుగా నటించారు. శృతి హాసన్ ముఖ్యపాత్ర పోషించారు. ఈ సినిమాపై సర్వత్రా ప్రశంసలు దక్కాయి. పవన్ కళ్యాణ్ పర్ఫెక్ట్ కమ్‌బ్యాక్ మూవీ అని పలువురు సినీ ప్రముఖులు కొనియాడారు.
By April 12, 2021 at 08:26AM
No comments