ఒక్క పాజిటివ్ కేసు నిర్ధారణ అయితే 20 ఇళ్లకు సీల్.. కోవిడ్ కట్టడికి కీలక సూచనలు
ఉత్తర్‌ ప్రదేశ్‌‌లో రెండో దశ వ్యాప్తి ఇప్పుడిప్పుడే మొదలయ్యింది. పాజిటివ్ కేసులు పెరుగుతుండటంతో యూపీ ప్రభుత్వం అప్రమత్తమయ్యింది. వ్యాక్సినేషన్‌ను ముమ్మరం చేస్తూనే, వైరస్ కట్టడికి కఠిన చర్యలు చేపట్టాలని యోగి ఆదిత్యనాథ్ ప్రభుత్వం నిర్ణయించింది. వ్యాప్తి నియంత్రణకు పలు ఆంక్షలు అమలు చేస్తున్నారు. వీటితోపాటు కొత్తగా మరి కొన్ని నిబంధనలు అమల్లోకి రానున్నాయి. ఏ ప్రాంతంలోనైనా ఒక్క పాజిటివ్ కేసు నమోదయితే ఆ వ్యక్తి ఇంటి చుట్టూ 25 మీటర్ల పరిధిలో కంటెయిన్‌మెంట్ జోన్ ఏర్పాటుచేస్తారు. పాజిటివ్ వచ్చిన వ్యక్తి చుట్టుపక్కల గల 20 ఇళ్లకు సీల్ వేస్తూ, ఆ ప్రాంతాన్ని కంటైన్మెంట్ జోన్‌గా ప్రకటిస్తారు. అలాగే, ఒకటి కంటే ఎక్కువ కేసులు నిర్ధారణ అయితే 50 మీటర్ల మేర కంటెయిన్‌మెంట్ జోన్, 60 ఇళ్లకు సీల్ వేయాలని ఉత్తర్వుల్లో పేర్కొన్నారు. చివరి కేసు నిర్ధారణ అయిన 14 రోజుల వరకూ ఈ కంటెయిన్‌మెంట్ జోన్‌లు కొనసాగించాలి. ఈ 14 రోజుల్లో ఆ ప్రాంతంలో ఒక్క కేసూ నిర్ధారణ కాకపోతే దానిని ఎత్తివేస్తారు. ఇదేవిధంగా కేసులు అత్యధికంగా నమోదైన ప్రాంతాలను గుర్తించి, అక్కడ వైరస్ మరింతగా వ్యాప్తిచెందకుండా ఉండేందుకు తగిన చర్యలు చేపట్టాలని సూచించారు. అలాగే, కరోనా బాధితులు 14 రోజుల పాటు క్వారంటైన్‌లో ఉండేవిధంగా అధికారులు చర్యలు తీసుకోవాలని స్పష్టం చేశారు. ఈ మేరకు యూపీ ప్రభుత్వ ప్రధాన కార్యదర్శి రాజేంద్ర కుమార్ తివారీ జిల్లా అధికారులు, పోలీసులకు తగిన సూచనలు చేశారు. ఇక అపార్ట్‌మెంట్లు, బహుళ అంతస్తుల భవనాలలో కరోనా పాజిటివ్ వ్యక్తి ఉంటే, ఆ బిల్డింగ్ మొత్తాన్ని సీల్ చేయనున్నారు. 14 రోజుల క్వారైంటైన్ పూర్తయిన తర్వాతనే దానిని కంటైన్మెంట్ జోన్ జాబితా నుంచి తొలగించనున్నారు. కంటెయిన్‌మెంట్ జోన్‌లో నమోదయ్యే రోజువారీ కేసుల గురించి సమాచారాన్ని వైద్యాధికారికి జిల్లా కోవిడ్ పర్యవేక్షణాధికారి అందజేయాలి. ఒక ప్రాంతంలో ఒక్కటి కంటే ఎక్కువ కేసులు నమోదయితే క్లస్టర్‌గా పరిగణించి, దాని పర్యవేక్షణకు హెల్త్‌కేర్ వర్కర్, పంచాయతీ రాజ్ వర్కర్, స్థానిక యంత్రాంగానికి చెందిన సిబ్బందితో ఒక టీమ్ ఏర్పాటుచేయాలి. ఈ టీం ప్రతి ఇంటికి వెళ్లి కరోనా వైరస్ గురించి అవగాహన కల్పించాలి. కోవిడ్ నిబంధనలను పాటిస్తూ, బాధితులకు దూరంగా ఉండాలని అప్రమత్తం చేయాలి.
By April 05, 2021 at 09:33AM
No comments