Breaking News

చత్తీస్‌గఢ్ ఎన్‌కౌంటర్: ఎవరీ మోస్ట్ వాంటెడ్ హిడ్మా.. తలపై 45 లక్షలు రివార్డ్!


చత్తీస్‌గఢ్‌లో మావోయిస్ట్‌లు భద్రత దళాలను తమ ట్రాప్‌లోకి లాగి.. మాటువేసి దాడికి పాల్పడ్డాయి. మావోయిస్ట్ అగ్రనేత .. తారెమ్ అటవీ ప్రాంతంలో దాక్కున్నట్లు ఓ పుకారు సృష్టించాయి. దీంతో హిడ్మా ఆ ప్రాంతంలో ఉన్నాడని భావించిన భద్రతా దళాలు అక్కడ కూంబింగ్ చేపట్టి వారి వ్యూహంలో చిక్కుకున్నాయి. తారెమ్ అటవీ ప్రాంతంలో మావోలు ‘U’ అక్షరం ఆకారంలో మోహరించారు. ఓవైపు నుంచి భద్రతా సిబ్బంది ప్రవేశించగానే.. మూడు వైపుల నుంచి బుల్లెట్ల వర్షం కురిపించారు. అయితే, మడ్వి హిడ్మా ఎవరు? అతడి పేరును భద్రత బలగాలపై దాడికి ఎందుకు వాడుకున్నారు? అనేది సర్వత్రా చర్చనీయాంశమవుతోంది. మోస్ట్ వాంటెడ్ మావోయిస్ట్ నేత హిడ్మా స్వస్థలం ఛత్తీస్‌గఢ్‌లోని బస్తర్ జిల్లా పూవర్తి గ్రామం. అతడి వయసు 50 ఏళ్లు ఉంటుంది. మావోయిస్ట్ దళంలో 1990ల్లో చేరిన మడ్వి హిడ్మా. పీపుల్స్ లిబరేషన్ గెరిలా ఆర్మీ (PLGA) మొదటి బెటాలియన్‌కు హెడ్‌గా ఉన్నాడు. అంతేకాదు, మావోయిస్ట్ సౌత్ సబ్-జోనల్ కమాండ్‌గానూ బాధ్యతలు నిర్వర్తించాడు. బస్తర్‌లో మావోయిస్ట్‌లు జరిపిన అతిపెద్ద దాడులకు హిడ్మా నేతృత్వం వహిస్తున్నాడు. అంతేకాదు మావోయిస్టు దండకారణ్య స్పెషల్ జోనల్ కమిటీలో సభ్యుడిగానూ ఉన్నాడు. హిడ్మా నేతృత్వంలో గతంలో ఎన్నో మావోయిస్టు దాడులు జరిగాయి. ఇతడిపై రూ.45 లక్షల రివార్డు కూడా ఉంది. మోస్ట్ వాంటెడ్‌గా ఉన్న హిడ్మా కోసం భద్రతా దళాలు చాలా ఏళ్లుగా గాలిస్తున్నాయి. దాదాపు 250 మంది మావోయిస్టులకు నాయకత్వం వహిస్తున్నాడు. 2013లో ఝిరామ్ ఘాటీ వద్ద కాంగ్రెస్ నేతల ఊచకోత, 2017 ఏప్రిల్‌లో 24 మంది సీఆర్పీఎఫ్ జవాన్ల హత్య సహా కనీసం 26 దాడుల్లో కీలకంగా ఉన్నాడు. హిడ్మాను దేవా అని కూడా పిలుస్తారు. బస్తర్‌లో భద్రతా దళాలు ఎవరినైనా పట్టుకోవాలనుకుంటే అందులో హిడ్మాదే తొలిస్థానం. సెప్టెంబరు 2018లో పోలీసులకు లొంగిపోయిన పహద్ సింగ్ అనే మాజీ మావోయిస్ట్ చెప్పిన వివరాల ప్రకారం.. హిడ్మాను అరెస్ట్ చేస్తే మావోయిస్ట్‌ తిరుగుబాటు ఉద్యమానికి వెన్నుముక విరిగిపోయినట్టేనని అన్నారు. దక్షిణ సుక్మా ప్రాంతంలోనే తన స్థావరాన్ని ఏర్పాటుచేసుకున్న హిడ్మామకు నాలుగంచెల భద్రత ఉంటుందని పోలీస్ వర్గాలు పేర్కొన్నాయి. అతడి కదలికలపై ఇంటెలిజెన్స్ సమాచారంతో ఇటీవల అతడికి సంబంధించినవిగా భావిస్తోన్న స్థావరాలపై పోలీసులు దాడులు చేశారు. ‘అతడి బహుళంచెల భద్రతను చేధించడం కష్టం, ఎందుకంటే హిడ్మా తప్పించుకునేటప్పుడు అంగరక్షకులు భద్రతా దళాలను ఏమార్చుతాయి... అయినప్పటికీ, మోస్ట్ వాంటెడ్ తప్పించుకునే క్రమంలో అతడి సన్నిహితులు చాలా మందిని మట్టుబెట్టాం... ప్రస్తుతం అతని సహాయక వ్యవస్థ బలహీనపడింది’ అని బస్తర్‌లో విధులు నిర్వర్తించే ఓ పోలీస్ అధికారి అన్నారు.


By April 05, 2021 at 11:16AM


Read More https://telugu.samayam.com/latest-news/india-news/who-is-madvi-hidma-mastermind-of-chhattisgarh-naxal-ambush-on-security-personnel/articleshow/81907511.cms

No comments