Breaking News

బంగ బంధు, ఒమన్ సుల్తాన్‌లకు గాంధీ శాంతి పురస్కారాలు


2019, 2020 సంవత్సరానికి గానూ గాంధీ శాంతి బహుమతిని కేంద్రం సోమవారం ప్రకటించింది. 2020 ఏడాదికి దివంగత బంగబంధు షేక్‌ ముజిబుర్‌ రహ్మాన్‌, 2019 ఏడాదికి ఒమన్‌ సుల్తాన్, దివంగత కబూస్‌ బిన్‌ సయిద్‌ అల్‌ సయిద్‌లను ఎంపిక చేసింది. ఈ ఏడాదే బంగబంధు శత జయంతి ఉత్సవాలు జరగనుండగా ఆయనకు భారత్ అరుదైన గౌరవం ఇచ్చింది. భారత్‌-ఒమన్‌ మధ్య సంబంధాలు మెరుగుదలకు చేసినందుకుగాను దివంగత సుల్తాన్‌ కబూస్‌కు పురస్కారాన్ని ప్రకటించింది. భారత్-ఒమన్ దేశాల మధ్య స్నేహ సంబంధాలను బలోపేతం చేయడంతో పాటు ప్రాంతీయంగా శాంతి, శ్రేయస్సు కోసం ఖబూస్ కృషిచేశారు. బంగ్లాదేశ్ తొలి అధ్యక్షుడిగా, తర్వాత 1975లో హత్యకు గురయ్యే వరకూ ప్రధానిగా ముజిబూర్ రహమాన్ సేవలందించారు. అవామీలీగ్ పార్టీని స్థాపించారు. ఆయన కుమార్తె షేక్ హసీనా ప్రస్తుత బంగ్లాదేశ్ ప్రధానిగా ఉన్నారు. ముజిబూర్ రహమాన్ శత జయంతి ఉత్సవాల వేళ ఆయనకు ప్రకటించడంపై బంగ్లాదేశ్‌లో హర్షాతిరేకాలు వ్యక్తమౌతున్నాయి. మహాత్మా గాంధీ 125వ జయంతిని పునస్కరించుకుని 1995లో భారత ప్రభుత్వం అంతర్జాతీయ గాంధీ శాంతి బహుమతిని ప్రారంభించింది. సామాజిక, ఆర్థిక, రాజకీయ రంగాల్లో అహింసా మార్గంలో పనిచేసిన వ్యక్తులకు, సంస్థలకు ఈ బహుమతి ప్రదానం చేస్తారు. ముఖ్యంగా గాంధీ సిద్ధాంతాలను అనుసరించినవారికి ఈ బహుమతి ఎంపికలో ప్రాధాన్యత ఉంటుంది. ఈ బహుమతి కింద కోటి రూపాయల నగదు, ఓ ప్రశంసాపత్రం, ఓ జ్ఞాపిక అందజేస్తారు. మొదటి గాంధీ శాంతి బహుమతికి టాంజానియా గాంధీ జులియస్ నైరేరీని ఎంపిక చేశారు.


By March 23, 2021 at 08:07AM


Read More https://telugu.samayam.com/latest-news/india-news/gandhi-peace-prize-for-sheikh-mujibur-rahman-late-sultan-of-oman/articleshow/81642837.cms

No comments