పార్లమెంట్ క్యాంటీన్‌లో సబ్సీడీ ఎత్తివేత.. ఫేవరేట్ హైదరాబాద్ బిర్యానీ ధర ఎంతో తెలుసా?
పార్లమెంటు హౌస్ కాంప్లెక్స్ క్యాంటీన్‌లో రాయితీపై అందజేసే ఆహారానికి కేంద్రం స్వస్తి పలికింది. పార్లమెంటు క్యాంటీన్‌లో ఎంపీలకు ఇచ్చే సబ్సీడిని తొలగించినట్టు స్పీకర్ ఓం బిర్లా గతవారం ప్రకటించిన విషయం తెలిసిందే. రాయితీలు ఎత్తివేయడంతో పార్లమెంట్ క్యాంటీన్‌లో ఆహార పదార్థాలు ధరలు పెరిగాయి. రాయితీ ఎత్తేసిన త‌ర్వాత కొత్త ధ‌ర‌లతో మెనూను సిద్ధం చేశారు. ఈ మేరకు అధికారులు గురువారం ఓ ప్రకటన విడుదల చేశారు. లోక్‌సభ బిజినెస్‌ కమిటీలోని అన్ని పార్టీల సభ్యుల ఏకాభిప్రాయం మేరకు సబ్సిడీ తొలగింపుపై నిర్ణయం తీసుకున్నారు. క్యాంటీన్‌లో ఆహారంపై ఇచ్చే రాయితీ గురించి రెండేళ్ల కిందట పెద్ద ఎత్తున చర్చ జరిగింది. లోక్‌సభ బిజినెస్‌ అడ్వైజరీ కమిటీలో దీనిపై చర్చించారు. అన్ని పార్టీలూ ఒకే అభిప్రాయాన్ని చెప్పడం ద్వారా సబ్సిడీని రద్దు చేయడానికి అంగీకరించారు. తాజా నిర్ణయంతో క్యాంటీన్‌లో లభించే ఆహారం నిర్ణీత ధరకు లభిస్తుంది. ఎంపీలు ఇప్పుడు తాము తీసుకునే ఆహారానికి ధరలను మెనూ ప్రకారం చెల్లిస్తారు. పార్లమెంట్ క్యాంటీన్‌కు ఏటా సుమారు రూ.17 కోట్ల సబ్సిడీ కింద చెల్లిస్తున్నారు. సబ్సిడీని ఎత్తివేయడం వల్ల లోక్‌సభ సెక్రటేరియట్‌కు ఏడాదికి రూ.8 కోట్లకుపైగా ఆదా అవుతుంది. ఇప్పుడు అందిన సమాచారం మేరకు.. క్యాంటీన్ రేటు జాబితాలో చికెన్ కర్రీని రూ.50 లకు, వెజ్ థాలిని రూ.35 లకు అందిస్తారు. మూడు కోర్సుల భోజనం ధర రూ.106 లుగా నిర్ణయించబడింది. ఇక దక్షిణాది అల్పాహారం సాదా రూ. 12లకు లభిస్తుంది. ఈ నెల 29 నుంచి ప్రారంభమయ్యే పార్లమెంటు బడ్జెట్‌ సమావేశాల నుంచే ఈ సబ్సిడీలను ఎత్తివేయాలని నిర్ణయం తీసుకున్నారు. పార్లమెంటు క్యాంటీన్లను ఇకపై ఉత్తర రైల్వే స్థానంలో ఐటీడీసీ నిర్వహించనున్నట్లు సమాచారం. జనవరి 29 నుంచి అమల్లోకి రానున్న విధానం ప్రకారం.. మార్కెట్ ధరలను క్యాంటీన్‌లో వసూలు చేస్తారు. రోటీ రూ.3,శాకాహార భోజనం రూ.100, వెజ్ బ‌ఫే రూ. 500, నాన్-వెజ్ లంచ్ రూ.700, హైదరాబాద్ మటన్ బిర్యానీ రూ.150, ఉడికించిన కూరగాయలు రూ.50లకు లభిస్తాయి. సబ్సిడీపై హైదరాబాద్ మటన్ బిర్యానీ రూ.65, ఉడికించిన కూరగాయలు రూ.12లకు లభించేవి. క్యాంటిన్ నిర్వహణ బాధ్యతలు ఐఆర్‌సీటీసీ లేదా ఐటీడీసీకి అప్పగించనున్నారు.
By January 28, 2021 at 01:48PM
No comments