రాహుల్కి స్థిరత్వం తక్కువ.. శరద్ పవార్ సంచలన వ్యాఖ్యలు
![](https://blogger.googleusercontent.com/img/b/R29vZ2xl/AVvXsEhr2RcoK5Nf9NTRnPrStQ3-ZEfWwNyAVOOY6PB6ANhCKZnZochRr_RqPaaDi69eUIGsDRKvoByMaFr3cDoUjes5s8YnYK1JmNBBqqCvhrWe7EYyAph699mJoYmlAtAa9N1iUdMDhRpkjdA/s1600/telugu+news.png)
![](https://telugu.samayam.com/photo/79560560/photo-79560560.jpg)
మహారాష్ట్రలో శివసేన-ఎన్సీపీ-కాంగ్రెస్ సంకీర్ణ ప్రభుత్వం ఏర్పడి ఏడాది పూర్తయ్యింది. ఈ నేపథ్యంలో అధినేత ఓ ఇంటర్వ్యూలో మాట్లాడుతూ.. కాంగ్రెస్ నేత రాహుల్ గాంధీపై చేసిన వ్యాఖ్యలు చర్చనీయాంశమవుతున్నాయి. నాయకత్వానికి దేశం సిద్ధంగా ఉందా? అన్న ప్రశ్నకు పవార్ స్పందిస్తూ.. ఆయనను జాతీయ నేతగా అంగీకరించేందుకు కొన్ని సందేహాలు ఉన్నాయని సమాధానం ఇచ్చారు. ‘రాహుల్ గాంధీని జాతీయ నేతగా అంగీకరించేందుకు దేశానికి కొన్ని ప్రశ్నలు ఉన్నాయి.. ఆయనకు స్థిరత్వం తక్కువగా ఉన్నట్లు కనిపిస్తోంది.. కాంగ్రెస్ అధ్యక్షురాలు సోనియా గాంధీ, ఆ కుటుంబంతో నాకు విభేదాలు ఉన్నప్పటికీ, కాంగ్రెస్ సభ్యులకు ఇప్పటికీ గాంధీ-నెహ్రూ కుటుంబం పట్ల అభిమానం ఉంది’ అని వ్యాఖ్యానించారు. ఇటీవల అమెరికా మాజీ అధ్యక్షుడు బారక్ ఒబామా తన పుస్తకం ‘ఏ ప్రామిస్డ్ ల్యాండ్’లో రాహుల్ గురించి వ్యాఖ్యలు చేసిన విషయం తెలిసిందే. రాహుల్కు ఏ అంశాన్ని లోతుగా తెలుసుకోవాలనే కుతూహలం లేదని అన్నారు. దీనిపై కూడా పవార్ స్పందిస్తూ.. ఆయన అభిప్రాయాలతో ఏకీభవించాల్సిన అవసరం లేదన్నారు. విదేశీ నేతల పనితీరుపై వ్యాఖ్యానించదలచుకోలేదని పవార్ పేర్కొన్నారు. శరద్ పవార్ వ్యాఖ్యలపై కాంగ్రెస్ అధికార ప్రతినిధి సచిన్ సావంత్ స్పందించారు. ‘పవార్ ఏ సందర్భంలో ఈ అభిప్రాయం వ్యక్తం చేశారో తమకు తెలియదు...కానీ, ఇంకా చెప్పాలంటే కాంగ్రెస్, మా నేత రాహుల్ గాంధీ.. ఆర్ఎస్ఎస్, మోదీ ప్రభుత్వాన్ని వ్యతిరేకిస్తున్న ఇతర పార్టీలకన్నా ఎక్కువ స్థిరంగా ఉన్నారు..ముఖ్యంగా రాజ్యాంగ సంస్థల నిర్వీర్యం, వాటి స్వతంత్రత, విశ్వసనీయత కోల్పోవడం, ప్రజాస్వామ్య నిబంధనలను తొక్కడం వంటి విషయాలలో ప్రతిపక్షాల గొంతు నొక్కి గందరగోళానికి గురిచేస్తున్నప్పుడు కేంద్రానికి వ్యతిరేకంగా ధైర్యంతో మాట్లాడుతున్న అతికొద్ది మంది రాజకీయ నేతలతో రాహుల్ గాంధీ ఒకరు’ అని సావంత్ అన్నారు. అలాగే, మీ కుమార్తె సుప్రియా సూలే మహారాష్ట్రకు తొలి మహిళా ముఖ్యమంత్రి అవుతారా? అన్న ప్రశ్నకు పవార్ స్పందిస్తూ... ఆమె తొలి నుంచి జాతీయ రాజకీయాలపైనే ఆసక్తి చూపుతున్నారని అన్నారు. జాతీయస్థాయిలో అనేక అవార్డులను సొంతం చేసుకున్నారని వివరించారు. రాష్ట్ర రాజకీయాలపై సుప్రియా ఆసక్తిగా లేరని స్పష్టం చేశారు.
By December 04, 2020 at 11:25AM
No comments