పెళ్లైన నెలకే ‘లేడీ డాక్టర్‌’కి గర్భం.. అదేనా ఆమె చేసిన పాపం.! హిందూపురంలో ఘోరం

కోటి ఆశలతో వైద్య విద్యలో చేరిన యువతి జీవితం అర్ధాంతరంగా ముగిసిపోయింది. పెళ్లి రూపంలో వచ్చిన కష్టాలు భరించలేక కడతేరిపోయింది. చదువు మధ్యలోనే మంచి సంబంధమంటూ కుటుంబ సభ్యుల తొందరపాటు ఆమెను అగాథంలోకి నెట్టేసింది. వేయి ఊసులతో అత్తారింట్లో అడుగుపెట్టిన యువతికి అడుగడుగునా అవమానాల పాలైంది. మాతృమూర్తిని కాబోతున్నానన్న సంతోషమూ మిగల్చలేదు. పెళ్లైన నెలకే గర్భం దాల్చిందంటూ తోడేళ్లలా వేధించారు. భర్త అనుమానానికి ప్రతిఫలంగా కార్లు, ఆస్తులు అదనపు కట్నంగా తేవాలని పీడించడం మొదలుపెట్టారు. చివరికి జీవితంపై విరక్తి పుట్టిన కాబోయే డాక్టర్ కష్టాల కడలిలో చిక్కుకుని అనుమానాస్పదంగా కాటికి చేరింది. ఈ అత్యంత దారుణ ఘటన జిల్లా హిందూపురంలో జరిగింది. మడకశిరకు చెందిన అక్తర్‌జాన్ కుమార్తె అర్షియా(26) డాక్టర్ కలను నిజం చేసుకునేందుకు ఎంబీబీఎస్‌లో చేరింది. చదువు మధ్యలో ఉండగానే కుటుంబ సభ్యులు పెళ్లి సంబంధాలు చూడడం మొదలుపెట్టారు. మంచి సంబంధం కుదిరిందంటూ ఆర్టీసీ కాలనీకి చెందిన సాఫ్ట్‌వేర్ ఇంజనీర్‌ నూరుల్లాతో గతేడాది వైభవంగా వివాహం జరిపించారు. పెళ్లి సమయంలో కట్నకానుకల కింద భారీగానే ముట్టజెప్పారు. అరకిలో బంగారం, ఐదు లక్షల నగదు ఇచ్చి ఘనంగా పెళ్లి చేశారు. వైవాహిక జీవితంపై కోటి ఆశలతో అత్తారింట్లో అడుగుపెట్టిన అర్షియాకి అడుగడుగునా అవమానాలే ఎదురయ్యాయి. నెల తిరక్కుండానే భర్త, అతని కుటుంబ సభ్యుల నుంచి వేధింపులు మొదలయ్యాయి. ఈలోగా ఆమె గర్భం దాల్చింది. తాను తల్లిని కాబోతున్నానన్న సంతోషించేలోపే మరో పిడుగునెత్తిన పడింది. పెళ్లైన నెలకే గర్భం దాల్చిందంటూ భర్తను అనుమాన భూతం ఆవహించింది. అనుమానానికి ప్రతిఫలంగా అదనపు కట్నం కోసం వేధించడం మొదలుపెట్టారు. కారు, స్థిరాస్తులు తీసుకురావాలని తోడేళ్లలా పీక్కుతిన్నారు. పసిబిడ్డ పుట్టాక కూడా వారిలో మార్పురాలేదు. అనూహ్యంగా శవమై.. అత్తింటి వేధింపులతో అల్లాడిపోతున్న అర్షియా అనూహ్యంగా శవమై తేలింది. అనుమానాస్పద స్థితిలో మృతి చెందింది. రెండు రోజల ముందు ఆమె పుట్టిన రోజు నాడు తల్లి ఫోన్ చేస్తే ముభావంగా మాట్లాడింది. తాను మళ్లీ ఫోన్ చేస్తానని పెట్టేసింది. రెండు రోజులకే హిందూపురంలో ఉంటున్న వారి బంధువులు అర్షియా లేవడం లేదంటూ ఫోన్ చేయడంతో హుటాహుటిన కూతురు మెట్టినింటికి చేరుకున్నారు. మంచంపై నిర్జీవంగా పడి ఉన్న కూతురిని చూసి తల్లి గుండెబద్దలైంది. అల్లుడిని అడిగితే ఉరేసుకుని చనిపోయిందంటూ నిర్లక్ష్యంగా సమాధానం చెప్పడంతో ఆగ్రహం కట్టలు తెంచుకుంది. ఇరువర్గాల మధ్య ఘర్షణ చోటుచేసుకుంది. Also Read: సమాచారం అందుకున్న పోలీసులు సంఘటన స్థలానికి చేరుకుని మృతదేహాన్ని పరిశీలించారు. అత్తింటి వారే తన కూతురిని హత్య చేసి ఆత్మహత్యగా చిత్రీకరిస్తున్నారని తల్లి ఫిర్యాదు చేయడంతో అనుమానాస్పద మృతిగా కేసు నమోదు చేసి దర్యాప్తు చేపట్టారు. ఇంటికి తాళాలు వేశారు. మృతదేహాన్ని పోస్టుమార్టం కోసం ఆస్పత్రికి తరలించారు. కాబోయే డాక్టర్ కట్టుకున్నోడి వేధింపులకు బలవ్వడం స్థానికులను తీవ్రంగా కలచివేసింది. తమకు న్యాయం చేయాలంటూ అర్షియా తల్లి, సోదరుడు అధికారులను వేడుకోవడం కంటతడి పెట్టించింది. Read Also:

By November 26, 2020 at 11:00AM

Read More https://telugu.samayam.com/andhra-pradesh/news/medical-student-suspicious-death-in-hindupur-of-anantapur/articleshow/79421869.cms