రేప్‌నకు పాల్పడితే రసాయనాలతో నపుంసకులుగా మార్చేస్తారు.. కొత్త చట్టానికి ప్రధాని ఆమోదం
మహిళలపై జరుగుతున్న అఘాయిత్యాలు, అత్యాచారాలను అరికట్టేందుకు పాకిస్థాన్ ప్రభుత్వం కఠిన చర్యలు తీసుకోడానికి వీలుగా త్వరలోనే కొత్త చట్టాన్ని అమల్లోకి తీసుకురానుంది. అత్యాచారానికి పాల్పడినవారిని రసాయనాల సహాయంతో నపుంసకులుగా మార్చేందుకు వీలు కల్పించే నూతన చట్టానికి పాక్ ప్రధాని ఇమ్రాన్ ఖాన్ మంగళవారం సూత్రప్రాయంగా అంగీకారం తెలిపినట్లు ఓ పాక్ పత్రిక వెల్లడించింది. అత్యాచార నిరోధక ఆర్డినెన్సు పేరుతో న్యాయ మంత్రిత్వ శాఖ ఈ ముసాయిదాను క్యాబినెట్ సమావేశంలో ప్రవేశపెట్టినట్లు తెలిపింది. లైంగిక వేధింపుల కేసుల్లో విచారణ పూర్తిచేసేలా, సాక్ష్యులకు రక్షణ కల్పించేలా కూడా అందులో పటిష్ఠ నిబంధనలు చేర్చినట్లు పేర్కొంది. అయితే- ఈ ముసాయిదా విషయంపై ఇంకా అధికారిక ప్రకటన వెలువడలేదు. ‘అత్యాచార ముసాయిదా చట్టానికి ఫెడరల్ క్యాబినెట్ అంగీకారం తెలిపింది... ఈ చట్టంలో ఎటువంటి లొసుగులు లేకుండా స్పష్టంగా ఉండాలని కోరుకుంటున్నాం’ అని పాక్ సమాచార మంత్రి షిబ్లి ఫరాజ్ వ్యాఖ్యానించారు. అత్యాచార నిరోధక ఆర్డినెన్స్, పాకిస్థాన్ శిక్షా స్మృతి (సవరణ) ఆర్డినెన్స్ 2020 గురించి మీడియాకు సంక్షిప్తంగా వివరాలను వెల్లడించారు. పంజాబ్ ప్రావిన్సుల్లో ఓ మహిళపై ఆమె పిల్లల ముందే కామాంధులు సామూహిక అత్యాచారానికి పాల్పడిన ఘటన సెప్టెంబరులో చోటుచేసుకోవడంతో దీనిపై తీవ్రంగా స్పందించిన ప్రధాని ఇమ్రాన్ ఖాన్.. ఇటువంటి కేసుల్లో నిందితులను కఠినంగా శిక్షించేలా చట్టం తీసుకురావాలని న్యాయశాఖకు సూచించారు. అలాగే, సింధ్ ప్రావిన్సుల్లో ఉద్యోగం ఇప్పిస్తామని చెప్పి ఓ మహిళ, ఆమె కుమార్తెపై గ్యాంగ్ రేప్‌నకు పాల్పడిన ఘటనపై ప్రధాని తీవ్రంగా కలతచెందారని మంత్రి ఫరాజ్ అన్నారు. దేశంలో అత్యాచార ఘటనలు పెరిగిపోతుండటంపై ఆందోళన వ్యక్తం చేస్తున్న ప్రధాని.. నిందితులను కఠినంగా శిక్షించాలంటే త్వరగా కొత్త చట్టం తీసుకురావాలని ఆదేశించారన్నారు. అత్యాచారం కేసులో నిందితులను రసాయనాల ద్వారా నంపుసకులుగా మార్చే ఆర్డినెన్స్ చట్టం రూపం దాల్చితే ఇండోనేషియా, పోలెండ్, రష్యా, ఎస్తోనియా వంటి దేశాల సరసన పాక్ చేరుతుంది.
By November 25, 2020 at 09:44AM
No comments