ప్రత్యక్ష ఎన్నికల ర్యాలీలపై ఎంపీ హైకోర్టు సంచలన నిర్ణయం.. సుప్రీంకోర్టుకు ఈసీ
మధ్యప్రదేశ్‌లో 28 అసెంబ్లీ స్థానాలకు ఉప-ఎన్నికలు జరుగుతుండటంతో బీజేపీ, కాంగ్రెస్‌లు ప్రతిష్ఠాత్మకంగా తీసుకున్నాయి. ఇదిలా ఉండగా.. రాజకీయ పార్టీల ర్యాలీలపై నిషేధం విధిస్తూ సంచలన నిర్ణయం తీసుకుంది. కరోనా వైరస్ కారణంగా ఉప ఎన్నికలు జరిగే 9 జిల్లాల్లో నేరుగా ర్యాలీలు చేపట్టరాదని, విర్చువల్‌గా ప్రచారం చేసుకోవాలని గ్వాలియర్ ధర్మాసనం బుధవారం ఆదేశించింది. ఏ అభ్యర్థి లేదా రాజకీయ పార్టీకి అనుమతి ఇవ్వరాదని ఆయా జిల్లాల కలెక్టర్లకు ధర్మాసనం సూచించింది. హైకోర్టు నిర్ణయంపై ఎన్నికల కమిషన్ తీవ్ర అభ్యంతరం వ్యక్తం చేస్తూ సుప్రీంకోర్టును ఆశ్రయించింది. ఇద్దరు బీజేపీ అభ్యర్థులు కూడా దీనిని సుప్రీంలో సవాల్ చేశారు. ఎన్నికలు నిర్వహించడం తమ పరిధిలోదని, హైకోర్టు ఆదేశాలు ఎన్నికల విధానంలో జోక్యం చేసుకోవడమేనని ఈసీ వాదిస్తోంది. కోర్టు ఉత్తర్వులు ఎన్నికల ప్రక్రియను పక్కదారి పట్టించేలా ఉందని పేర్కొంది. ఈ ఆంక్షలు అభ్యర్థులపై క్షేత్రస్థాయిలో ప్రభావం చూపుతాయని ఈసీ స్పష్టం చేసింది. అటు మధ్యప్రదేశ్ ప్రభుత్వం సైతం హైకోర్టు ఉత్తర్వులపై సుప్రీంను ఆశ్రయించాలని నిర్ణయించింది. హైకోర్టు ఉత్వర్వులతో అర్ధాంతరంగా తన ప్రచారాన్ని ముఖ్యమంత్రి శివరాజ్ సింగ్ చౌహన్ రద్దుచేసుకున్నారు. షాదోరా, భండేర్ నియోజకవర్గాల్లో గురువారం ప్రచారం నిర్వహించాల్సి ఉండగా.. కోర్టు బుధవారం ఉత్తర్వులు జారీచేసింది. ‘హైకోర్టు నిర్ణయాన్ని గౌరవిస్తాం.. కానీ ఈ నిర్ణయం సుప్రీంకోర్టులో సవాల్ చేస్తాం.. ఎందుకంటే ఒకే చోట రెండు చట్టాలు అమలు జరగవు’ అని సీఎం చౌహన్ పేర్కొన్నారు. ‘మధ్యప్రదేశ్‌లోని కొన్ని ప్రాంతాల్లో ప్రత్యక్ష ర్యాలీలకు అనుమతి ఉంది.. మరికొన్ని చోట్ల లేదు.. బిహార్‌లో భౌతిక ర్యాలీలు జరుగుతున్నాయి.. కానీ, మధ్యప్రదేశ్‌లో అనుమతించడంలేదు.. న్యాయం కోసం సుప్రీంకోర్టుకు వెళ్తాం’ అని తెలిపారు. ఇదిలా ఉండగా.. కేంద్ర మంత్రి నరేంద్ర సింగ్ తోమర్, మాజీ సీఎం కమల్ నాథ్‌‌లపై కేసు నమోదయ్యింది. అలాగే, రాజకీయ పార్టీల ర్యాలీలపై కఠిన చర్యలు తీసుకోవాలని హైకోర్టు ఆదేశించింది. విర్చువల్ ప్రచారం సాధ్యం కాని పక్షంలో క్షేత్రస్థాయిలో పరిస్థితి అనుకూలంగా ఉందని భావిస్తే భౌతిక ర్యాలీలకు కలెక్టర్ అనుమతించాలని పేర్కొంది.
By October 23, 2020 at 10:48AM
No comments