స్వలింగ వివాహాలపై మీ వైఖరేంటి? గుర్తించాలా? వద్దా? కేంద్రానికి ఢిల్లీ హైకోర్టు ప్రశ్న
ప్రత్యేక వివాహ చట్టం(ఎస్ఎంఏ), విదేశీ వివాహ చట్టం(ఎఫ్ఎంఏ) కింద స్వలింగ వివాహాలను గుర్తించాలా? వద్దా? అన్న అంశంపై వైఖరి తెలియజేయాలని కేంద్ర ప్రభుత్వాన్ని బుధవారం కోరింది. ఈ మేరకు రెండు జంటలు దాఖలు చేసిన పిటిషన్లపై జస్టిస్‌ ఆర్‌.ఎస్‌.ఎండ్లా, జస్టిస్‌ ఆశా మీనన్‌ల ద్విసభ్య ధర్మాసనం కేంద్రంతో పాటు ఢిల్లీ ప్రభుత్వానికి నోటీసు జారీ చేసింది. ఎనిమిదేళ్లుగా సహజీవనం చేస్తున్న ఇద్దరు మహిళలు, అమెరికాలో వివాహం చేసుకున్న ఇద్దరు భారతీయ యువకులు వేర్వేరుగా పిటిషన్లు దాఖలు చేశారు. రాజ్యాంగంలోని ఆర్టికల్‌ 21 ప్రకారం.. నచ్చిన వ్యక్తిని వివాహం చేసుకొనే హక్కు ఉందని, అది స్వలింగ సంపర్కులకైనా వర్తిస్తుందని ఈ రెండు జంటలు పేర్కొన్నాయి. దీంతో ఈ అంశంపై కేంద్రం, ఢిల్లీ ప్రభుత్వం, అమెరికాలోని భారత కాన్సులేట్ జనరల్‌ వైఖరిని తెలియజేయాలని కోరుతూ ధర్మాసనం నోటీసులు జారీచేసింది. అనంతరం ఈ కేసుల విచారణను జనవరి 8కి వాయిదా వేసింది. పిటిషన్ నిర్వహణకు సంబంధించి ఎటువంటి సందేహాలు లేవని పేర్కొన్న ధర్మాసనం.. కానీ, వివాహం అనే భావన స్వలింగ వివాహాలను గుర్తించని ఆచారమే చట్టాల నుంచి ఉద్భవించిందని వ్యాఖ్యానించింది. ఈ వివాహం ఎస్ఎంఏ, ఎఫ్ఎంఏ కింద నిర్వచించబడలేదని, ప్రతి ఒక్కరూ ఆచార చట్టాల ప్రకారం వివాహం అంటే ఏంటో అందరూ అర్థం చేసుకుంటారని పేర్కొంది. ‘ఆచార చట్టాల ప్రకారం గుర్తించిన తరువాత, దీనిని ఎస్ఎంఏ, ఎఫ్ఎంఏ వంటి ఇతర చట్టాలను అనుసరిస్తాయి.. వివాహ నిర్వచనాన్ని సవాల్ చేసిన పిటిషనర్ల అభ్యర్ధనలలో ఏమైనా మార్పులు చేయాలనుకుంటే, ప్రస్తుతం కాకుండా తర్వాత విచారణలో అవకాశం ఉంటుంది’అని ధర్మాసనం స్పష్టం చేసింది. మతాంతర, కులాంతర వివాహాలకు ఎటువంటి ఆచారాలు లేనందున ఎస్ఎంఏను అమలు చేసినట్లు కోర్టు తెలిపింది. పిటిషనర్ల తరఫున సీనియర్ న్యాయవాది మేనక గురుస్వామి వాదనలు వినిపించారు. ఆచార లేదా మత చట్టాల నుంచి ఉపశమనం కోరుకోవడంలేదని, ఎస్ఎంఏ, ఎఫ్ఎంఏలను మతాంతర, కులాంతర సహా అన్ని వివాహాలకు వర్తింపజేయాలని కోరుతున్నారని వాదించారు. అంతేకాదు, ఎస్ఎంఏ, ఎఫ్ఎంఏలు ఆచార చట్టాల ఆధారంగా రూపుదిద్దుకోలేదని అన్నారు. ఈ సందర్భంగా కేంద్ర ప్రభుత్వం తరఫున హాజరైన రాజ్‌కుమార్ యాదవ్ మాట్లాడుతూ.. 5వేల సంవత్సరాల చరిత్ర కలిగిన సనాతన ధర్మం తొలిసారి ఇటువంటి పరిస్థితిని ఎదుర్కొంటోందని అన్నారు.
By October 15, 2020 at 07:13AM
No comments