యుద్ధానికి సిద్ధంగా ఉండండి.. సైన్యానికి చైనా అధ్యక్షుడు పిలుపు
భారత్-చైనా సరిహద్దుల్లో దాదాపు ఆరు నెలలుగా కొనసాగుతున్న ఉద్రిక్తతలను తగ్గించడానికి ఇరు దేశాలూ చర్చలు, సంప్రదింపులు కొనసాగుతున్నాయి. ఇదే సమయంలో యుద్ధానికి సిద్ధం కావాలని చైనా అధ్యక్షుడు తన సైన్యానికి పిలుపునివ్వడం ప్రాధాన్యత సంతరించుకుంది. చైనా పీపుల్స్ లిబరేషన్ ఆర్మీ కొత్తగా అభివృద్ధి చేస్తున్న మెరైన్‌ కోర్‌ దళాన్ని జిన్‌పింగ్ మంగళవారం పర్యవేక్షించారు. ఈ సందర్భంగా వారినుద్దేశించి యుద్ధానికి సన్నద్ధం కావాలని పిలుపునిచ్చారు. చైనా అధికారిక మీడియాను ఉటంకిస్తూ సీఎన్ఎన్ వార్తా సంస్థ ఈ వివరాలను వెల్లడించింది. గ్యాంగ్డాంగ్‌లోని సైనిక స్థావరాన్ని సందర్శించిన జిన్‌పింగ్.. ‘యుద్ధానికి సన్నద్ధం కావడంపైనే మీ శక్తియుక్తులు, దృష్టినంతటినీ కేంద్రీకరించండి. అత్యంత అప్రమత్తంగా ఉండండి. దేశానికి పూర్తిస్థాయి స్వచ్ఛంగా, విధేయులుగా ఉండండి’ అని సైనిక దళాలకు స్పష్టం చేశారని సీఎన్ఎన్ వెల్లడించింది. అయితే, భారత్ లేదా అమెరికాను లేదా మరే ఇతర దేశాన్ని ఉద్దేశించి ఆయన ఈ వ్యాఖ్యలు చేశారనేది స్పష్టతలేదు. ఓవైపు దక్షిణ చైనా సముద్రంలో అమెరికాతోనూ, తూర్పు లడఖ్‌ ప్రాంతంలో భారత్‌‌తోనూ చైనా గిల్లికజ్జాలు కొనసాగుతున్న నెలకొన్న వేళ ఇది చర్చనీయాంశమైంది. పరివర్తన, నిర్మాణాలు, పోరాట సామర్థ్యాల మెరుగుదలను వేగవంతం చేయడం, బహుళ సామర్థ్యాలు, యుద్ధ క్షేత్రంలో వేగవంతమైన ప్రతిస్పందనతో బలమైన శక్తిని రూపొందించడానికి ప్రయత్నించాలని జిన్‌పింగ్ నొక్కిచెప్పినట్టు జున్హూ పేర్కొంది. దేశాన్ని మిలిటరీని సమగ్రంగా, కఠినంగా పరిపాలించడానికి సంపూర్ణ నాయకత్వాన్ని సమర్థించాల్సిన అవసరం ఉందని జి జిన్‌పింగ్ ఉద్ఘాటించారని తెలిపింది. సైన్యం పూర్తిగా నమ్మకమైన, స్వచ్ఛమైన, ఖచ్చితంగా నమ్మదగిందని నిర్ధారించుకోవాలని స్పష్టం చేసినట్టు వివరించింది.
By October 15, 2020 at 06:41AM
No comments