సమర్ధతపై సందేహాలు.. రష్యా, చైనా టీకాలు వద్దు బాబోయ్ అంటున్న అమెరికా!

చైనా, రష్యాలు అభివృద్ధి చేస్తున్న వ్యాక్సిన్‌ల భద్రతపై అనుమానాలు వ్యక్తమవుతున్నాయి. క్లినికల్ ట్రయల్స్ జరగకుండానే నేరుగా మార్కెట్‌లోకి విడుదల చేసే ఈ వ్యాక్సిన్‌లు ప్రమాదకరమని అంటున్నారు. ఈ కొవిడ్‌-19 టీకాలను కొనుగోలు చేసేందుకు అమెరికా సుముఖంగా లేదని తెలుస్తోంది. విస్తృతంగా క్లినికల్‌ ట్రయల్స్‌ జరపకుండానే ముందుగానే మార్కెట్లో విడుదల చేయడంపై అనేక సందేహాలు వ్యక్తం చేస్తోంది. అవి సురక్షితమో కాదో తెలియదని ఆందోళన చెందుతోంది. ఈ నేపథ్యంలో ఈ టీకాలను కొనుగోలు చేయరాదని నిర్ణయానికి వచ్చినట్టు సమాచారం. వందేళ్లకు ఒకసారి ఇలాంటి మహమ్మారులు పుట్టుకొస్తాయని, కరోనా వైరస్‌ ప్రభావం దశాబ్దాల వరకు ఉంటుందని డబ్ల్యూహెచ్ఓ పేర్కొన్న విషయం తెలిసిందే. కొవిడ్‌-19 ప్రపంచ మహమ్మారిగా ప్రకటించి ఆరు నెలలు పూర్తయిన సందర్భంగా డబ్ల్యూహెచ్ఓ చీఫ్ టెడ్రోస్‌ అధ్నామ్ మాట్లాడుతూ.. పై విధంగా స్పందించారు. ఈ నేపథ్యంలో పశ్చిమ దేశాల స్థాయిలో పారదర్శకంగా లేని ఔషధ నియంత్రణ సంస్థలున్న దేశాల టీకాలను తాము వాడటం కష్టమేనని అమెరికా అంటు వ్యాధుల చికిత్సా నిపుణుడు ఆంటోని ఫౌచి అన్నారు. ఓ మీడియా సమావేశంలో ఫౌచీ మాట్లాడుతూ..‘ఇతరులకు విక్రయించడానికి అనుమతులు పొందేముందు వ్యాక్సిన్‌ను చైనా, రష్యా విస్తృతంగా పరీక్షిస్తాయనే అనుకుంటున్నా. అయితే, పరీక్షించకుండానే సరఫరా చేసేందుకు సిద్ధమవుతున్నారని వార్తలు వస్తున్నాయి. అలా చేస్తే సమస్య కచ్చితంగా మరింత జటిలం అవుతుంది’వ్యాఖ్యానించారు. సొంతంగా వ్యాక్సిన్ల అభివృద్ధికి ఫార్మా దిగ్గజాలు సనోఫి, గ్లాక్సోస్మిత్‌కెలైన్‌ (జీఎస్‌కే)కు 2.1బిలియన్‌ డాలర్లు అమెరికా చెల్లించిన సంగతి తెలిసిందే. మరోవైపు, ప్రపంచంలోనే తొలి కరోనా వ్యాక్సిన్ తీసుకొచ్చేది తామేనంటూ రెండు రోజుల కిందట రష్యా పునరుద్ఘాటించింది. కరోనా టీకాను ఆగస్టు 12లోగా విడుదల చేయనున్నట్లు రష్యా చెబుతోంది. రష్యాకు చెందిన గామాలెయ ఇన్‌స్టిట్యూట్‌, రష్యా డైరెక్ట్ ఇన్వెస్ట్‌మెంట్ ఫండ్ సంయుక్తంగా ఈ టీకాను రూపొందిస్తున్నాయి. డ్రగ్ రెగ్యూలేటర్ల నుంచి అనుమతి లభిస్తే సాధ్యమైనంత త్వరగా కోవిడ్19 వ్యాక్సిన్‌ను మార్కెట్లోకి తీసుకురానున్నట్లు ‘బ్లూమ్‌బర్గ్‌’ ఒక కథనం ప్రచురించింది. అయితే, కోవిడ్19 వ్యాక్సిన్ ట్రయల్స్‌కు సంబంధించిన ఎలాంటి ఫలితాలను విడుదల చేయకపోవడం అనుమానాలకు తావిస్తోంది. మనుషులపై ప్రయోగాల్లో భాగంగా జులై 27న ఐదుగురు వాలంటీర్లకు రష్యా వైరాలటీ ఇన్‌స్టిస్టూట్ ఈ టీకాను ఇవ్వగా.. ప్రస్తుతానికి ఏ అనారోగ్య సమస్యలను ఎదుర్కోలేదని తెలిపింది. కరోనాకు టీకాను అతి త్వరగా తీసుకురావాలన్న యోచనతో ఆరోగ్య ప్రమాణాలను రష్యా పట్టించుకోవడం లేదని విమర్శలు వస్తున్నాయి.

By August 02, 2020 at 08:00AM

Read More https://telugu.samayam.com/latest-news/international-news/us-says-it-is-unlikely-to-use-china-russia-coronavirus-vaccines/articleshow/77310633.cms