క్రిమినల్స్‌కు ఎన్నికల్లో టిక్కెట్లు.. రాజకీయ పార్టీలకు సుప్రీం సూటి ప్రశ్న
నేర చరితులకు ఎన్నికల్లో టిక్కెట్లు కేటాయించడంపై రాజకీయ పార్టీలు వివరణ ఇవ్వాలని సర్వోన్నత న్యాయస్థానం గురువారం ఆదేశించింది. నేరస్థులకు రాజకీయ పార్టీలు ఎన్నికల్లో టిక్కెట్లు ఇవ్వకుండా నిరోధించడానికి సరికొత్త విధానం తీసుకొచ్చేలా ఈసీని ఆదేశించాలని కోరుతూ బీజేపీ నేత, సీనియర్‌ లాయర్ అశ్విని ఉపాధ్యాయ్ దాఖలుచేసిన పిటిషన్‌‌పై గురువారం విచారణ చేపట్టింది. ఈ సందర్భంగా రాజకీయ పార్టీలకు న్యాయస్థానం కీలక సూచనలు చేసింది. క్రిమినల్ రికార్డులు ఉన్నవారికి ఎందుకు టిక్కెట్లు కేటాయిస్తున్నారో గల కారణాలను తమ పార్టీల అధికారిక వెబ్‌సైట్‌లలో పొందుపర్చాలని సూచించింది. నేర చరితులకు టిక్కెట్లను కేటాయించే విషయంలో సర్వోన్నత న్యాయస్థానం గతంలో పలు ఆదేశాలు జారీచేసినా, అంతగా ఫలితం లేకపోయింది. దీంతో ఈ అంశాన్ని మరోసారి పరిశీలించడానికి ఇటీవల సమ్మతించిన సుప్రీం.. జాతీయ ప్రయోజనాల దృష్ట్యా ఈ సమస్యను నియంత్రించడానికి ఏదో ఒకటి చేయాల్సిన అవసరం ఉందని ఎన్నికల కమిషన్ అభిప్రాయపడుతున్నట్టు జస్టిస్ ఆర్ఎఫ్ నారిమన్, జస్టిస్ ఎస్ రవీంద్ర భట్ ధర్మాసనం వ్యాఖ్యానించింది. రాజకీయాల నుంచి నేరస్థులను పారద్రోలడానికి గతంలో సుప్రీంకోర్టు ఇచ్చిన తీర్పులు ఎలాంటి ప్రభావం చూపలేదని ధర్మాసనం పేర్కొంది. జనవరి 24నాటి విచారణ ఈ సందర్భంగా ఎన్నికల కమిషన్, పిటిషనర్ అశ్విని ఉపాధ్యాయ్‌లను దీనికి సంబంధించి ఓ ప్రతిపాదన రూపొందించి వారంలో రోజుల్లో సమర్పించాలని ధర్మాసనం సూచించింది. ‘నేర ఆరోపణలు ఎదుర్కొంటున్నా దోషిగా నిర్ధారించబడని వ్యక్తిని ఎన్నికల్లో పోటీచేయకుండా నిషేధించడం అంటే రాజ్యాంగబద్ధతను ప్రశ్నించడమే అవుతుంది. ఏదేమైనా, తీవ్రమైన నేరారోపణలు ఎదుర్కొంటున్న వ్యక్తులను ఎన్నికలలో పోటీ చేయకుండా నిరోధించాలని అవసరం ఉందని’ న్యాయస్థానం అభిప్రాయపడింది. ఎన్నికల్లో పోటీచేసే అభ్యర్థులు, పార్టీలు తమపై ఏవైనా క్రిమినల్ కేసులు ఉంటే తప్పనిసరిగా నామినేషన్ పత్రాల్లో పొందుపరచాలని 2018లో సుప్రీంకోర్టు తీర్పు వెలువరించింది. దీనిని అమలుచేయడంలేదంటూ తాజాగా అశ్విని ఉపాధ్యాయ్ కోర్టు ధిక్కారణ పిటిషన్ దాఖలు చేశారు.
By February 13, 2020 at 11:25AM
No comments