అల్‌ఖైదాకు చెందిన మరో కీలక ఉగ్రవాదిని హతమార్చిన అమెరికా

అల్‌ఖైదా ఉగ్రవాద సంస్థకు చెందిన మరో కీలక నేతను అమెరికా హతమార్చింది. అరేబియా ద్వీపకల్పంలో అల్‌ఖైదా నాయకత్వ బాధ్యతలు నిర్వహించే ఖాసీం అల్‌-రైమీని హతమార్చినట్లు అమెరికా అధ్యక్షుడు డొనాల్డ్‌ ట్రంప్‌ శుక్రవారం ప్రకటించారు. ఫ్లోరిడా నౌకా స్థావరంలో కాల్పులకు పాల్పడింది తామేనంటూ అల్ రైమీ ప్రకటించిన కొన్ని రోజులకే ఈ పరిణామం చోటుచేసుకోవడం గమనార్హం. ‘యెమెన్‌లో ఉగ్రవాదుల ఏరివేతలో భాగంగా జరిపిన దాడుల్లో అరేబియా ద్వీపకల్పం అల్‌ఖైదా(ఏక్యూఏపీ) వ్యవస్థాపకుడు ఖాసీం అల్‌-రైమీని హతమార్చాం. రైమీ నేతృత్వంలో ఏక్యూఏపీ సామాన్య పౌరులపై వికృత హింసాకాండకు పాల్పడింది. అతడి మృతితో అల్‌ఖైదా కార్యకలాపాలపై తప్పకుండా ప్రభావం చూపుతుందని భావిస్తున్నాం’ అని ట్రంప్ తన ప్రకటనలో వెల్లడించారు. అయితే ఉగ్రవాది ఖాసీంను ఎప్పుడు హతమార్చిందీ, తదితర వివరాలను వెల్లడించలేదు. సెప్టెంబరు 6న ఫ్లోరిడాలోని అమెరికా నౌకాదళానికి చెందిన పెన్సకోలా వైమానిక స్థావరంపై ముష్కరులు కాల్పులకు తెగబడ్డారు. ఈ ఘటనలో సౌదీ అరేబియాకు చెందిన ఓ సైనికాధికారి మృతిచెందగా, మరో ఎనిమిది మంది తీవ్రంగా గాయపడ్డారు. ఈ దాడికి పాల్పడ్డ ఉగ్రవాదిని అమెరికా వెంటనే మట్టుబెట్టింది. కాగా, ఈ దాడికి బాధ్యతవహిస్తూ ఏక్యూఏపీ గత ఆదివారం ప్రకటన విడుదల చేసింది. మహ్మద్‌ అల్‌షమ్రానీగా గుర్తించిన అతడు దాడికి ముందు అమెరికాపై తన విద్వేషాన్ని వెళ్లగక్కుతూ ఓ వీడియో విడుదల చేసినట్లు తెలుస్తోంది. ప్రపంచవ్యాప్తంగా ఓ వర్గంపై జరుగుతున్న హింసకు అమెరికా సహకరిస్తోందని.. అందుకే తాను ఆ దేశాన్ని ద్వేషిస్తున్నానని అతడు పేర్కొన్నట్లు అంతర్జాతీయ మీడియాలో కథనాలు వెలువడ్డాయి. ఈ దాడికి ప్రతీకారంగా అమెరికా తాజాగా జరిపిన దాడుల్లో ఖాసీం అల్‌-రైమీ హతమయ్యాడు. నేత గతవారం అమెరికా జరిపిన డోన్ల దాడిలో చనిపోయి ఉంటాడని వాల్ స్ట్రీట్ జర్నల్ సహా కొన్ని అంతర్జాతీయ పత్రికలు పేర్కొన్నాయి. అయితే, ఈ దాడులు ఎప్పుడు నిర్వహించారనే దానిపై స్పష్టత లేదు. మరోవైపు, అమెరికా సైన్యం డోన్ దాడులు నిర్వహించలేదని కొందరు అధికారులు అంటున్నారు. అమెరికాకు చెందిన ఓ స్థానిక మీడియా మాత్రం యెమెన్‌లోని మారిబ్ ప్రావిన్సుల్లో అమెరికా సైన్యం జనవరి 25న డ్రోన్ల దాడి నిర్వహించినట్టు తెలిపింది. ఇక, రైమీ గురించి సమాచారం అందించినవారికి 10 మిలియన్ డాలర్ల పారితోషం ఇస్తామని అమెరికా గతంలోనే ప్రకటించింది. ఖాసీం అల్ రైమీ 1990ల్లో అఫ్గనిస్థాన్‌లోని ఉగ్రవాదులకు శిక్షణ ఇచ్చి, అక్కడ నుంచి యెమెన్ చేరుకున్నాడు. అయితే, యెమెన్‌లో సైన్యానికి చిక్కిన రైమీ.. 2006లో జైలు నుంచి తప్పించుకున్నాడు. తర్వాత మూడేళ్లలో ఏక్యూఏపీని పునఃనిర్మించి అరేబియా ద్వీపకల్పంలో కార్యకలాపాలను ముమ్మరం చేశాడు.

By February 07, 2020 at 11:45AM

Read More https://telugu.samayam.com/latest-news/international-news/us-kills-qasim-al-raymi-in-yemen-who-is-leader-of-al-qaeda-in-arabian-peninsula/articleshow/74001016.cms