ఆల్ ఈజ్ వెల్.. కశ్మీర్‌లో పరిస్థితులపై విదేశీ ప్రతినిధులు సంతృప్తి
జమ్మూ కశ్మీర్‌లో తాజా పరిస్థితులను పరిశీలించేందుకు విదేశీ ప్రతినిధుల బృందం రెండు రోజుల పర్యటన గురువారం సాయంత్రంతో ముగిసింది. ఈ సందర్భంగా కశ్మీర్‌లో నెలకున్న ప్రస్తుత పరిస్థితులపై వారు సంతృప్తి వ్యక్తం చేశారు. అయితే, వీరిలో కొంత మంది మాత్రం కొద్దిగా అసహనం వ్యక్తం చేసినట్టు తెలుస్తోంది. గత రెండు రోజులుగా జమ్మూ కశ్మీర్‌లోని వివిధ ప్రాంతాల్లో విదేశీ ప్రతినిధులు పర్యటించి, అక్కడ చేపట్టిన కార్యక్రమాలను అభినందించారు. జమ్మూ కశ్మీర్‌లో ప్రస్తుత భద్రతా పరిస్థితుల గురించి విదేశీ ప్రతినిధులకు 15కార్ప్స్ కమాండర్ లెఫ్టినెంట్ జనరల్ కేజేఎస్ థిల్లాన్ గురువారం ఉదయం వివరించారు. ఆ తరువాత జమ్మూకు వెళ్లిన ఈ బృందం.. అక్కడ లెఫ్టినెంట్ గవర్నర్ జీఎస్ ముర్ము, ప్రధాన కార్యదర్శి బీఆర్ సుబ్బూ, ఇతర సీనియర్ అధికారులను కలిశారు. అనంతరం జమ్మూలోని కొంత మంది పౌరులతో పాటు జమ్మూ కశ్మీర్ హైకోర్టు చీఫ్ జస్టిస్ గీతా మిట్టల్‌ను కలుసుకున్నారు. భారత్‌లో మెక్సికో రాయబారి ఎఫ్ఎస్ లోత్ఫే మాట్లాడుతూ.. ప్రస్తుతం కశ్మీర్‌లో ఏం జరుగుతుందో ఓ అవగాహనకు వచ్చామని తెలిపారు. అంతా సాధారణ స్థితికి చేరుకుంటున్నట్టు కనిపిస్తోంది, కానీ, ఎటువంటి ఇబ్బందులు లేవని కాదు.. పరిస్థితి మరింత మెరుగుపడాలని, ఇందుకు అధికారులు ప్రయత్నిస్తున్నట్టు అర్ధమవుతోందన్నారు. జమ్మూ కశ్మీర్ హైకోర్టు ప్రధాన న్యాయమూర్తి, లెఫ్టినెంట్ గవర్నర్, ప్రధాని కార్యదర్శితో సమావేశం చాలా బాగా జరిగిందని డిప్లమాటిక్ కార్ప్స్ డీన్ హాన్స్ డన్నేబర్గ్ కస్టేల్లెనోస్ వ్యాఖ్యానించారు. కశ్మీర్‌లో చేపట్టబోయే చర్యల గురించి కూలంకుషంగా వివరించారని తెలిపారు. జమ్మూ కశ్మీర్‌లో అభివృద్ధి జరగాలంటే ఆర్టికల్ 370 రద్దుచేయాల్సిన ఆవశ్యకత ఉందని విదేశీ రాయబారులు అభిప్రాయపడినట్టు ఆయన పేర్కొన్నారు. ప్రస్తుతం కశ్మీర్‌లో సాధారణ పరిస్థితులు నెలకున్నాయని అన్నారు. భద్రతపరంగా ఎలాంటి సమస్యలు లేవని, జమ్మూ, శ్రీనగర్‌లో దుకాణాలు తెరుచుకున్నాయన్నారు. ఆర్ధికవృద్ధి విషయంలో స్పష్టమైన విధానాలు చాలా కీలకమని, యువతకు విద్య, ఉద్యోగ అవకాశాలు కల్పించకుండా తీవ్రవాదాన్ని నిరోధించడం చాలా కష్టమని అభిప్రాయపడ్డాయి. శ్రీనగర్, జమ్మూలోని పౌర సమాజం, మీడియా, వ్యాపారవేత్తలతో మాట్లాడినట్టు రాయబారులు అంగీకరించారు. అయితే, కొన్ని చోట్ల మాత్రం ప్రజల నుంచి కొన్ని విమర్శలు ఎదురవుతున్నట్టు వివరించారు.
By February 14, 2020 at 09:36AM
No comments