కోళ్ల అమ్మకాలపై కరోనా వైరస్ ఎఫెక్ట్.. భారీగా తగ్గిన చికెన్ ధరలు

ఎఫెక్ట్ అమ్మకాలపై పడింది. చికెన్ ద్వారా కరోనా వ్యాపిస్తుందనే ప్రచారంతో కోడి మాంసం విక్రయాలు భారీగా పడిపోయాయి. చికెన్ తినడానికి జనం జంకుతుండటంతో... దాని ప్రభావం విక్రయాలపై పడింది. ఫలితంగా వారం రోజుల్లోనే చికెన్ అమ్మకాలు సగం పడిపోయాయి. రోజుకు 80-100 కిలోల చికెన్ విక్రయించే షాపుల్లో ఇప్పుడు 50-60 కిలోలు మాత్రమే విక్రయిస్తున్నామని దుకాణదారులు వాపోతున్నారు. డిమాండ్ తగ్గడంతో చికెన్ ధరలు కూడా తగ్గాయి. మన దగ్గర కిలో చికెన్ ధర రూ.180 నుంచి రూ.140కి పడిపోయింది. మరోవైపు కోళ్లకు వైరస్ సోకుతుందనే కారణంతో పశ్చిమ గోదావరి జిల్లా తణుకులో బుధవారం నుంచి వారం రోజులపాటు చికెన్ అమ్మకాలు నిలిచిపోనున్నాయి. చికెన్ అమ్మకాలు జరగకుండా చూడాలని ఎమ్మెల్యే కారుమూరి వెంకట నాగేశ్వర రావు అధికారులను ఆదేశించారు. చికెన్ కారణంగా కరోనా సోకుతుందనే భయాందోళనల కారణంగా చాలా మంది జనం ఖరీదు ఎక్కువైనా మటన్ కొనుగోలు చేయడానికి ఆసక్తి చూపుతున్నారని షాపు యజమానులు తెలిపారు. దీంతో మటన్ ధరలు పెరిగాయి. తెలుగు రాష్ట్రాల్లో సగటున రోజుకు 5 లక్షల కిలోల చికెన్‌ విక్రయిస్తుంటారు. ఈ సీజన్లో డిమాండ్ ఎక్కువగా ఉండాల్సింది. కానీ కరోనా ఎఫెక్ట్‌తో సీన్ రివర్స్ అయ్యింది. తెలుగు రాష్ట్రాల్లోనే కాకుండా దేశంలోని పలు ప్రాంతాల్లో ఇదే పరిస్థితి నెలకొంది. కోళ్లు, గొర్రెలు, పందుల్లాంటి జంతువుల ద్వారా కరోనా వైరస్ సోకదని, ఆందోళన చెందాల్సిన అవసరం లేదని నిపుణులు చెబుతున్నారు. మాంసాన్ని బాగా ఉడికించి తినడం వల్ల జంతుమాంసం ద్వారా వచ్చే జబ్బులు రాకుండా చూసుకోవచ్చని సలహా ఇస్తున్నారు.

By February 12, 2020 at 10:09AM

Read More https://telugu.samayam.com/andhra-pradesh/news/chicken-prices-decline-amid-rumors-of-coronavirus-spreading-to-birds/articleshow/74092939.cms