ఢిల్లీలో మహిళా ఎస్సై దారుణ హత్య.. ప్రేమించకపోవడమే తప్పా?
ఢిల్లీ: దేశ రాజధానిలో ఓ మహిళా పోలీసు అధికారి దారుణ హత్యకు గురయ్యారు. శుక్రవారం రాత్రి 9.30 గంటల సమయంలో ప్రీతి అహ్లవాట్ (26) అనే యువ ఎస్సై విధులు ముగించుకొని ఇంటికి తిరిగొస్తుండగా దుండగుడు కాల్పులు జరిపాడు. తలలోకి బుల్లెట్ దూసుకెళ్లడంతో ఆమె ప్రాణాలు విడిచారు. ప్రీతిని హత్య చేసింది పోలీసు అకాడమీలో ఆమె బ్యాచ్‌మెట్ అని భావిస్తున్నారు. సబ్ ఇన్స్‌పెక్టర్ అయిన దీపాన్షు రతి ఆమెను ప్రేమించాడని.. కానీ ప్రీతి అందుకు అంగీకరించకపోవడంతో.. ఆమెను హత్య చేశాడని వార్తలు వెలువడుతున్నాయి. విధులు ముగించుకొని రోహిణి ఈస్ట్ మెట్రో స్టేషన్ నుంచి ఇంటికి నడుచుకుంటూ వెళ్తుండగా.. ప్రీతిపై దుండగుడు కాల్పులు జరిపాడు. అనంతరం హర్యానాలోని సోనిపట్‌లో అతడు ఆత్మహత్య చేసుకున్నాడని తెలుస్తోంది. కాగా ప్రీతి ఓ రేప్ కేసును విచారిస్తున్నారని.. ఈ కేసు విషయమై ఆమెకు గతంలో బెదిరింపులు వచ్చాయని తెలుస్తోంది. దీంతో ప్రీతి మృతదేహాన్ని పోస్టుమార్టం కోసం తరలించిన పోలీసులు.. ఆమెపై కాల్పులు జరిగిన వ్యక్తిని గుర్తించడం కోసం సీసీటీవీ ఫుటేజీలను సేకరించారు. 2018లో పోలీస్ డిపార్ట్‌మెంట్‌లో చేరిన ప్రీతి అహ్లవాట్ తూర్పు ఢిల్లీలోని ప్రతాప్‌గంజ్ ఇండస్ట్రియల్ ఏరియా పోలీస్ స్టేషన్లో విధులు నిర్వహించేవారు. హర్యానాలోని సోనిపట్‌కు చెందిన ఆమె రోహిణి ఏరియాలో అద్దెకు ఉంటున్నారు.
By February 08, 2020 at 10:48AM
No comments