పుల్వామా దాడితో ఎవరికి ప్రయోజనం కలిగింది? కాకరేపుతున్న రాహుల్ ట్వీట్

పుల్వామాలో జవాన్ల కాన్వాయ్‌పై ఉగ్రవాదులు జరిపిన ఆత్మాహుతి దాడిలో 40 మంది సైనికులు అమరులయ్యారు. ఈ మారణహోమానికి సరిగ్గా నేటితో ఏడాది పూర్తయ్యింది. ఈ నేపథ్యంలో అమర జవాన్లకు దేశం యావత్తు నివాళులర్పిస్తోంది. ఈ ఘటనపై కాంగ్రెస్ నేత మరోసారి కేంద్ర ప్రభుత్వాన్ని తూర్పారబట్టారు. బీజేపీపై విమర్శలు గుప్పించిన ఆయన.. ఈ దాడి వల్ల ఎవరికి ప్రయోజనం కలిగిందంటూ ప్రభుత్వానికి మూడు ప్రశ్నలు సంధించారు. ‘పుల్వామా ఉగ్రదాడిలో అమరులైన 40 మంది సీఆర్పీఎఫ్‌ జవాన్లను మనం ఈ రోజు స్మరించుకుంటున్నాం. ఈ సందర్భంగా కేంద్రాన్ని మనం అడగాల్సినవి ఇవే.. 1. ఈ దాడితో ఎవరికి ఎక్కువ ప్రయోజనం చేకూరింది? 2. ఈ దాడిపై చేపట్టిన దర్యాప్తులో ఏం తేలింది. 3. దాడికి కారణమైన భద్రతా లోపాలకు బీజేపీ ప్రభుత్వంలో ఎవరు బాధ్యత వహిస్తున్నారు?’ అని రాహుల్‌ ట్విటర్‌ వేదికగా ప్రశ్నలు సంధించారు. గతేడాది ఫిబ్రవరి 14న జమ్మూ నుంచి శ్రీనగర్‌కు వెళ్తున్న సీఆర్పీఎఫ్‌ కాన్వాయ్‌పై పాకిస్థాన్‌కు చెందిన ఉగ్రవాద సంస్థ జైషే మొహమ్మద్ ఆత్మాహుతి దాడికి పాల్పడింది. పక్కా వ్యూహంతో అవంతిపుర సమీపంలోని లేథీపుర వద్ద సీఆర్పీఎఫ్ కాన్వాయ్‌లోకి ప్రవేశించిన ఉగ్రవాది ఆదిల్ అహ్మద్ దార్‌.. అందులోని ఐదో వాహనాన్ని ఢీకొట్టాడు. ఈ ఘటనతో యావత్ భారతావని ఒక్కసారిగా ఉలిక్కిపడింది. పుల్వామా దాడితో మన భద్రత, నిఘా వ్యవస్థపై అనేక సందేహాలు నెలకున్నాయి. ఈ దాడి తర్వాత కేంద్రంపై విమర్శలు వెల్లువెత్తాయి. కాగా, ఇటీవల ఉగ్రవాదులకు సాయం చేస్తూ పట్టుబడిన కశ్మీర్‌ పోలీసు అధికారి దవీందర్‌ సింగ్‌కు కూడా పుల్వామా దాడితో సంబంధం ఉందని కాంగ్రెస్‌ ఆరోపిస్తోంది. ఈ నేపథ్యంలో రాహుల్‌ చేసిన వ్యాఖ్యలు మరోసారి రాజకీయ వివాదానికి తెరతీసే అవకాశం కన్పిస్తోంది.

By February 14, 2020 at 12:22PM

Read More https://telugu.samayam.com/latest-news/india-news/who-benefitted-from-the-pulwama-attack-rahul-asks-three-questions-on-the-terror-attack-anniversary/articleshow/74130429.cms