కరోనా సార్స్ కంటే డేంజర్.. 811కి చేరిన మృతుల సంఖ్య.. 37 వేల మందికి వైరస్
చైనాలో మృతుల సంఖ్య 811కి చేరిందని ఆ దేశ జాతీయ ఆరోగ్య కమిషన్ పేర్కొంది. 2002-03లో వచ్చిన సార్స్ వైరస్ కన్నా ఎక్కువగా కరోనా వైరస్ మృతుల సంఖ్య ఉండటం ఆందోళన కలిగిస్తోంది. చైనాలో మొత్తం 37,198 మందికి కరోనా వైరస్ సోకిందని నేషనల్ హెల్త్ కమిషన్ తెలిపింది. గత 24 గంటల్లోనే ఈ వైరస్ కారణంగా 89 మంది ప్రాణాలు కోల్పోగా... 2656 మందికి ఈ వైరస్ సోకడం ఆందోళన కలిగిస్తోంది. వీరిలో చాలా మంది వుహాన్ నగరం ఉన్న హుబేయ్ ప్రావిన్స్కు చెందిన వారే. సార్స్ వైరస్ కూడా చైనాలోనే మొదలైంది. అప్పట్లో ఈ వైరస్ కారణంగా ప్రపంచవ్యాప్తంగా 774 మంది ప్రాణాలు కోల్పోయారు. కరోనా కారణంగా చైనాలో చనిపోయిన వారి సంఖ్యను తగ్గించి చూపిస్తున్నారని చాలా మంది వైద్య నిపుణులు భావిస్తున్నారు. కరోనా కారణంగా హాస్పిటళ్లు, టెస్టింగ్ సెంటర్లు, లాబోరేటరీలపై తీవ్ర ఒత్తిడి ఉంది. కొత్త కేసులు నమోదవుతున్నా చైనాలో పరిస్థితి అదుపులోనే ఉందని ప్రపంచ ఆరోగ్య సంస్థ తెలిపింది. వుహాన్, హుబేయ్ ప్రావిన్స్లలో వైరస్ తీవ్రత చాలా ఎక్కువగానే ఉందని ప్రకటించింది. కరోనా కారణంగా చైనా వెలుపల ఇద్దరు మరణించారు. హాంగ్ కాంగ్లో ఒకరు, ఫిలిప్ఫిన్స్లో మరొకరు చనిపోగా.. భారత్ సహా 25 దేశాల్లో కరోనా కేసులు నమోదయ్యాయి. మన దేశంలో కేరళలో మాత్రమే 3 కేసులు నమోదు కాగా.. మిగతా ప్రాంతాలకు ఈ వైరస్ వ్యాపించకుండా కేంద్ర, రాష్ట్ర ప్రభుత్వాలు జాగ్రత్త చర్యలు చేపడుతున్నాయి. భారత్లో పరిస్థితులను ఎప్పటికప్పుడు సమీక్షించడం కోసం కేంద్రం మంత్రులతో టాస్క్ఫోర్స్ను ఏర్పాటు చేసింది. ఇప్పటి వరకూ వుహాన్ నుంచి 1000 మంది భారతీయులను స్వదేశానికి తీసుకొచ్చారు.
By February 09, 2020 at 09:24AM
No comments