3 నెలలకు మించి వెయింటింగ్‌లో ఉంటే జీతం బంద్.. జగన్‌ సర్కారుపై బాబు ఫైర్
మూడు నెలలకు మించి వెయింటింగ్‌లో ఉన్న ప్రభుత్వ ఉద్యోగులకు జీతాలు చెల్లించమని సర్కారు ప్రకటించడం సరికాదని టీడీపీ అధినేత తెలిపారు. ఆరు నెలల కన్నా ఒక్క రోజు ఎక్కువగా వెయిటింగ్‌లో ఉన్నా అసాధారణ సెలవుగా గుర్తిస్తామనడాన్ని ఆయన ప్రభుత్వ కక్ష సాధింపునకు పరాకాష్టగా అభివర్ణించారు. వైసీపీ ప్రభుత్వ ఫాక్షనిస్ట్ ధోరణి రానురానూ పరాకాష్టకు చేరుతోందని బాబు మండి పడ్డారు. ప్రతిపక్ష నాయకులు, కార్యకర్తలపై కక్ష సాధింపుతో వైసీపీ నేతల ఉన్మాదం చల్లారలేదన్నారు. రైతులు, రైతుకూలీలు, మహిళలు, యువత, కార్మికులు అన్నివర్గాల ప్రజలను అష్టకష్టాలు పెట్టి, ఇప్పుడు ఏకంగా ప్రభుత్వ ఉద్యోగులపైనే ఫాక్షనిస్ట్ పంజా విసిరిందని విమర్శించారు. ‘‘3 నెలలకు మించి వెయిటింగ్ లో ఉంటే ప్రభుత్వ ఉద్యోగులకు జీతం చెల్లించం అంటూ ఉత్తర్వులు ఇవ్వడం, 6 నెలల కన్నా ఒక్కరోజు వెయిటింగ్ లో ఉన్నా అసాధారణ సెలవుగా పరిగణిస్తామని అనడం వైసిపి కక్ష సాధింపునకు పరాకాష్ట. అధికారులను భయభ్రాంతులకు గురిచేసి లొంగదీసుకోవాలనే ఈ ఉన్మాద చర్యలను ఖండిస్తున్నాం. పోస్టింగ్ లు ఇవ్వకుండా వందలాది పోలీసు అధికారులను, సిబ్బందిని గత 8 నెలలుగా తీవ్రంగా వేధిస్తున్నారు. ఇప్పుడు జీతాలు కూడా ఇచ్చేది లేదని ఉత్తర్వులు ఇవ్వడం దుర్మార్గ చర్య. ప్రభుత్వ ముందస్తు అనుమతి లేకుండా వెయిటింగ్ లో ఉంటే చర్యలు తీసుకోవాలిగాని, ప్రభుత్వమే వారిని వెయిటింగ్ లో ఉంచి, అవసరాల్లో సేవలు వాడుకుని, మళ్లీ వాళ్లపైనే చర్యలు చేపట్టడం అమానవీయం. ఇంత ఉన్మాద ధోరణిని పాలకుల్లో ఎప్పుడూ చూడలేదు. ఇంత కక్ష సాధింపు ప్రభుత్వాన్ని ఇప్పుడే చూస్తున్నాం. ప్రభుత్వం తప్పు చేసి, ఆ తప్పుకు ఉద్యోగులను శిక్షించడం ఎక్కడైనా ఉందా? ఎందుకు ఇంతమందిని, 8నెలల పైగా వెయిటింగ్ లో పెట్టారు? 3 నెలలు కాగానే జస్టిఫికేషన్ తో ప్రభుత్వ సమీక్షకు ఎందుకని పంపలేదు? పోస్టింగులు ఇవ్వకుండా నెలల తరబడి వెయిటింగ్ లో పెట్టి వేధించేది వీళ్లే, విధులకు హాజరు కాలేదని జీతాలు కోత పెట్టేది వీళ్లే. వెయిటింగ్ లో పంపినవాళ్లే, జీతాల్లో కోతపెట్టడం ఎప్పుడైనా జరిగిందా? ఇటువంటి వేధింపులు- బెదిరింపులు గతంలో ఉన్నాయా? ఇటువంటి దుర్మార్గ చర్యలను ప్రతి ఒక్కరూ ఖండించాల’’ని చంద్రబాబు నాయుడు పిలుపునిచ్చారు.
By February 10, 2020 at 10:29AM
No comments