యూరప్లో కోవిడ్ తొలి మరణం.. చైనాలో 1,665కి చేరిన మృతులు
చైనాలోని వుహాన్ నగరంలో వెలుగులోకి వచ్చిన కొత్తరకం (కోవిడ్ 19) ప్రపంచ దేశాలకు వేగంగా విస్తరిస్తోంది. మొత్తం 28 దేశాలకు వ్యాపించిన ఈ మహమ్మారి బాధితుల సంఖ్య 69,000కు చేరుకుంది. అలాగే, ఐరోపాలో కోవిడ్ తొలి మరణం చోటుచేసుకుంది. కరోనా వైరస్ కారణంగా ప్రపంచవ్యాప్తంగా 1,669 మంది ప్రాణాలు కోల్పోయారు. యూరప్లో తొలిసారి కరోనా వైరస్ మరణం చోటుచేసుకోవడంతో మరింత ఆందోళన వ్యక్తమవుతోంది. చైనా నుంచి ఫ్రాన్స్కు వచ్చిన ఓ పర్యాటకుడికి పరీక్షలు నిర్వహించగా కరోనా వైరస్ పాజిటివ్గా వచ్చిందని, చికిత్స పొందుతూ అతడు మృతిచెందాడని అధికారులు తెలిపారు. డైమండ్ ప్రిన్సెస్లో చిక్కుకున్న తమ పౌరులను స్వదేశానికి తరలించడానికి అమెరికా ప్రత్యేకంగా ఓ విమానాన్ని పంపింది. సింగ్పూర్లో కొత్తగా మరో ఐదుగురికి కరోనా వైరస్ ఉన్నట్టు తేలింది. దీంతో ఆ దేశంలో కరోనా వైరస్ బాధితుల సంఖ్య 72కి చేరింది. కొత్తగా కరోనా వైరస్ సోకిన వ్యక్తులు ఇటీవలి చైనాలో ప్రయాణించలేదని అధికారులు తెలిపారు. కరోనా వైరస్ నుంచి 18 మంది కోలుకున్నారని, వారిని హాస్పిటల్ నుంచి ఇళ్లకు పంపినట్టు సింగ్పూర్ ప్రభుత్వం తెలిపింది. మిగతా 56 మంది హాస్పిటల్లో చికిత్స పొందుతున్నారని, వీరిలో ఆరుగురి పరిస్థితి విషమంగా ఉందని వెల్లడించారు. అటు చైనాలో కరోనా మరణమృదంగం కొనసాగుతోంది. కోవిడ్ బారినపడి మృతిచెందినవారి సంఖ్య 1,665కు చేరింది. శనివారం మరో 139 మంది చనిపోగా, కొత్తగా మరో 2,009 కేసులు నమోదయినట్టు చైనా ఆరోగ్య కమిషన్ ప్రకటించింది. దీంతో, చైనాలో కరోనా బాధితుల సంఖ్య 68,500కి చేరింది. ఈ కేసులన్నీ హుబే ప్రావిన్సుల్లోనే నమోదయినట్టు అధికారులు పేర్కొన్నారు. హుబే ప్రావిన్సుల్లోని మొత్తం 56 మిలియన్ల మందికి బాహ్య ప్రపంచంతో సంబంధాలు దాదాపు తెగిపోయాయి. ప్రపంచ ఆరోగ్య సంస్థ తరఫున వైద్య బృందం ఇప్పటికే చైనాకు చేరుకోగా మరికొందరు ఉన్నతస్థాయి నిపుణులు త్వరలో రానున్నారు. రోగుల్లో సగం మందికి సంప్రదాయ చైనా వైద్యాన్నే అందజేస్తున్నారు. సాధారణ, సంప్రదాయ వైద్య విధానాలు రెండింటినీ సమన్వయపరచుకుంటూ వెళ్లడం వల్ల ఫలితాలు సానుకూలంగా వస్తున్నాయని అధికారులు చెబుతున్నారు. కరోనా బాధితులకు చికిత్స అందజేస్తున్న వైద్య సిబ్బందిలో 1700 మందికీ వైరస్ సోకింది.
By February 16, 2020 at 08:42AM
No comments