పౌరసత్వ చట్టం.. కేంద్రానికి 50 వేల మంది శరణార్థుల జాబితా పంపిన యోగి సర్కారు

ఉత్తరప్రదేశ్ సీఎం 50 వేల మంది శరణార్థుల జాబితాను కేంద్ర హోం శాఖకు పంపారు. పాకిస్థాన్, బంగ్లాదేశ్, అప్ఘానిస్థాన్‌ల నుంచి వలస వచ్చిన వీరంతా యూపీలో దశాబ్దాలుగా నివసిస్తున్నారు. జనవరి 10న పౌరసత్వ చట్టం అమల్లోకి వచ్చిన నేపథ్యంలో.. శరణార్థుల జాబితాను యోగి కేంద్రానికి పంపారు. వారణాసి, లక్నో, గోరఖ్‌పూర్, ఆగ్రా, పిలిబిత్, కాన్పూర్, అమేథీ తదితర 19 జిల్లాల్లో వీరంతా నివసిస్తున్నారని యూపీ ప్రభుత్వం పేర్కొంది. పౌరసత్వ సవరణ చట్టాన్ని అమలు చేసేది లేదని కేరళ, పశ్చిమ బెంగాల్, పంజాబ్ రాష్టాలు చెబుతున్న వేళ.. ఈ చట్టం అమలు దిశగా అడుగులేసిన తొలి రాష్ట్రం ఉత్తర ప్రదేశ్ కావడం గమనార్హం. సీసీఏకు వ్యతిరేకంగా కేరళ ప్రభుత్వం మంగళవారం సుప్రీం కోర్టుకు వెళ్లింది. రాజ్యాంగంలోని ఆర్టికల్ 14, 21, 25లను నూతన సవరణ చట్టం ఉల్లంఘిస్తోందని కేరళ ఆరోపిస్తోంది. సెక్యులరిజానికి వ్యతిరేకమని.. దీన్ని రద్దు చేయాలని పినరయి విజయన్ తీర్మానం చేసింది. పంజాబ్‌లో పౌరసత్వ సవరణ చట్టాన్ని అమలు చేయనీయబోమని.. ఈ చట్టానికి వ్యతిరేకంగా కాంగ్రెస్ పోరాడుతుందని పంజాబ్ సీఎం అమరీందర్ సింగ్ గత నెలలో ప్రకటించారు. బెంగాల్ సీఎం మమతా బెనర్జీ కూడా పౌరసత్వ చట్టాన్ని తమ రాష్ట్రంలో అమలు చేయడానికి సుముఖంగా లేరు. ఇటీవలే ప్రధానితో భేటీ అయిన ఆమె సీఏఏ, ఎన్ఆర్సీలను బెంగాల్‌లో అమలు చేయడం తను బతికి ఉన్నంత వరకు సాధ్యం కాదన్నారు.

By January 14, 2020 at 02:14PM

Read More https://telugu.samayam.com/latest-news/india-news/caa-2019-uttar-pradesh-sends-refugees-list-to-centre/articleshow/73245540.cms