మిరాకిల్.. బుల్లెట్ బారి నుంచి కానిస్టేబుల్ రక్షించిన పర్స్!
జేబులోని పర్స్ బుల్లెట్ను నిలువరించి, ఓ కానిస్టేబుల్ ప్రాణాలను రక్షించింది. ఈ ఘటన ఉత్తరప్రదేశ్లోని ఫిరోజాబాద్లో శనివారం చోటుచేసుకుంది. పౌరసత్వ సవరణ చట్టం, ఎన్ఆర్సీ అమలు ప్రతిపాదనను నిరసిస్తూ ఉత్తర్ప్రదేశ్లోని పెద్ద ఎత్తున ఆందోళనలు నిర్వహించారు. ఈ ఆందోళనల్లో మొత్తం 18 మంది ప్రాణాలు కోల్పోయిన విషయం తెలిసిందే. ఫిరోజాబాద్లో శనివారం కొందరు ఆందోళనలు నిర్వహించడంతో పోలీసులు భారీ బందోబస్తు ఏర్పాటుచేశారు. ఈ సమయంలో నిరసనకారులు పోలీసులపై దాడికి ప్రయత్నించారు. వారిని అదుపు చేస్తుండగా నిరసనకారుల్లో ఒకరు తుపాకీ పేల్చడంతో బుల్లెట్ ఒకటి దూసుకొచ్చి కానిస్టేబుల్ విజేందర్ కుమార్ (24) ఛాతీ భాగానికి తగిలింది. దీంతో ఒక్కసారిగా అక్కడ కలకలం రేగింది. అయితే, వెంటనే తేరుకున్న విజేందర్ తన ఛాతీ భాగాన్ని తడిమి చూసుకుని ఆశ్చర్యపోయాడు. విజేందర్ ధరించిన జాకెట్ను చీల్చుకుంటూ లోపలకు వెళ్లిన బుల్లెట్ అతడి చొక్కా జేబులో ఉన్న పర్స్లో చిక్కుకుపోయింది. సంభ్రమాశ్చర్యానికి గురైన విజేందర్ పట్టరాని సంతోషానికి గురయ్యాడు. పర్సులో నాలుగు ఏటీఎం కార్డులు, శివుడి ఫొటో, కొన్ని నాణేలున్నాయి. ఆవే అతడిని బుల్లెట్ నుంచి రక్షించాయి. ఆందోళనలు సమయంలో ఫిరోజాబాద్ ఎస్పీకి ఎస్కార్ట్గా విజేందర్ కుమార్ వెళ్లగా.. నిరసనకారులు ఇదే సమయంలో కాల్పులు జరిపారు. ఈ కాల్పుల్లో మరో కానిస్టేబుల్ ధర్మేంద్ర గాయపడగా, కుమార్ త్రుటిలో తప్పించుకున్నారు. దీనిపై కుమార్ మాట్లాడుతూ.. ఇది నాకు పునర్జన్మని, ఆ భగవంతుడి దయవల్లే ఇలా జరిగిందని సంతోషం వ్యక్తం చేశారు. ఆందోళనకారులు రాళ్లవర్షం కురుపించడంతో వారిని తరిమివేయడానికి ప్రయత్నిస్తుంటే కాల్పులు జరిపారని, ఓ బుల్లెట్ తన ఛాతీవైపు దూసుకొచ్చి చొచ్చుకెళ్లిందని అన్నారు. ధరించిన జాకెట్ కాపాడలేకపోయినా శివుడి ఫోటో, నాణేలు, ఏటీఎం కార్డులతో ఉన్న జేబులోని పర్స్ రక్షించిందని అన్నారు. ఆందోళనకారుల కాల్పుల్లో గాయపడిన ధర్మేంద్ర ప్రస్తుతం హాస్పిటల్లో చికిత్స పొందుతున్నారు. ఫిరోజాబాద్ ఎస్పీ సచీంద్ర పటేల్ మాట్లాడుతూ.. ఆందోళనకారులు పెద్ద సంఖ్యలో కాల్పులకు తెగబడ్డారని, ఈ ఘటనలో కానిస్టేబుల్ విజేందర్ అదృష్టవశాత్తూ తప్పించుకున్నారని అన్నారు. ఈ కాల్పుల్లో స్టేషన్ ఆఫీసర్లు, ఎస్సై, కానిస్టేబుల్ సహా 40 మంది పోలీసులు గాయపడ్డారని తెలిపారు.
By December 23, 2019 at 10:42AM
No comments