మోదీ విమానానికి నో చెప్పిన పాక్.. ఆ వైఖరి మానుకోమంటూ హెచ్చరికలు!
రాష్ట్రపతి రామ్‌నాథ్ కోవింద్ ఐర్లాండ్ పర్యటన సందర్భంగా ఆయన విమానానికి అనుమతి నిరాకరించిన విషయం తెలిసిందే. తాజాగా, ప్రధాని అమెరికా పర్యటనకు సైతం తమ గగనతలం మీదుగా అనుమతించబోమని పాక్ స్పష్టం చేసింది. దాయాది నిర్ణయంపై భారత్ తీవ్రంగా మండిపడింది. దీనిపై విదేశాంగ శాఖ అధికార ప్రతినిధి రవీశ్ కుమార్ మాట్లాడుతూ.. పాక్ నిర్ణయం అంత సబబుగా లేదని వ్యాఖ్యానించారు. వీవీఐపీ విమానాలను పాక్ ఇలా అడ్డుకోవడం రెండు వారాల్లో ఇది రెండోసారని, సాధారణంగా ఏ దేశమైనా అనుమతి మంజూరు చేస్తుందన్నారు. పాక్ నిర్ణయం విచారకరమని రవీశ్ కుమార్ పేర్కొన్నారు. విదేశీ సంబంధాల విషయంలో పాక్ ధోరణి సరిగ్గాలేదని, ఈ అలవాటును వారు మానుకోవాలని హితవు పలికారు. పొరుగు దేశాల ప్రముఖల విమానాలకు అనుమతివ్వకపోవడం అంతర్జాతీయ పౌరవిమానయాన సంస్థ (ఐసీఏఓ) నిబంధనలను ఉల్లంఘించడమేనని అన్నారు. భారత ప్రముఖుల విమానాల విషయంలో ఇంతకుముందు కూడా పాకిస్థాన్ ఇదే వైఖరిఅవలంబించింది. సెప్టెంబరు 21 నుంచి 27 వరకు అమెరికాలో పర్యటించనున్నారు. పాకిస్థాన్ గగనతలం మీదుగా మోదీ విమానం అమెరికా వెళ్లేందుకు ఆ దేశం అనుమతి కోరితే అందుకు నిరాకరించారు. మోదీ విమానానికి తమ గగనతలం మీదుగా అనుమతి ఇవ్వడంలేదంటూ పాక్ విదేశాంగ మంత్రి షా మహ్మద్ ఖురేషీ బుధవారం ప్రకటించారు. దీనిపై భారత్ తీవ్రంగా మండిపడింది. జమ్మూ కశ్మీర్‌కు ప్రత్యేక హక్కులు కల్పిస్తోన్న ఆర్టికల్ 370ను భారత్ రద్దుచేయడాన్ని పాకిస్థాన్ తీవ్రంగా వ్యతిరేకిస్తోంది. ఈ నేపథ్యంలో ఇరు దేశాల మధ్య ఉద్రిక్తతల తలెత్తడంతో తమ గగనతలంలోకి భారత విమానాలకు పాక్ అనుమతి నిరాకరించింది. కొద్ది రోజుల కిందట రాష్ట్రపతి మూడు దేశాల పర్యటన సందర్భంగా కూడా పాక్ అనుమతి ఇవ్వలేదు. భారత రాష్ట్రపతి తమ గగనతలంపై నుంచి వెళ్లేందుకు అనుమతించకూడదన్న నిర్ణయాన్ని స్వయంగా పాక్ ప్రధాని ఇమ్రాన్‌ ఖాన్‌ ఆమోదించారని ఆ దేశ విదేశాంగ మంత్రి వెల్లడించారు. ఈ చర్యను భారత్ ప్రయోజనం లేని ఏకపక్ష నిర్ణయంగా అభివర్ణించింది. కశ్మీర్‌పై భారత్ తీసుకున్న నిర్ణయంతో ఇరు దేశాల మధ్య దౌత్య సంబంధాలు పూర్తిగా క్షీణించాయి. మరోవైపు, అంతర్జాతీయ వేదికలపై కశ్మీర్ అంశాన్ని ప్రస్తావించి భారత్‌ను దోషిగా నిలబెట్టాలని పాక్ చేస్తున్న ప్రయత్నాలు సైతం విఫలమవుతున్నాయి.
By September 19, 2019 at 11:24AM
No comments