కశ్మీర్‌లో అర్ధరాత్రి హైడ్రామా.. గృహ నిర్బంధంలో ముఫ్తీ, ఒమర్‌ అబ్దుల్లా
కశ్మీర్ విషయంలో కేంద్రం కీలక నిర్ణయం తీసుకోనుందనే ప్రచారంతో పరిణామాలు వేగంగా మారుతున్నాయి. రెండు రోజుల కిందట అమర్‌నాథ్ యాత్రను అర్ధాంతరంగా నిలిపివేసి, యాత్రికులు వెనక్కు వెళ్లాలని కేంద్రం సూచించింది. అలాగే శ్రీనగర్‌లో నిట్ క్యాంపస్‌ను నిరవధికంగా మూసివేస్తున్నట్టు ప్రకటించింది. పర్యాటకులు సైతం శ్రీనగర్ విడిచి వెళ్లాలని ఆదేశించింది. కాగా, ఆదివారం అర్ధరాత్రి మరో అనూహ్య పరిణామం చోటుచేసుకుంది. కొన్ని ప్రాంతాల్లో 144 సెక్షన్ విధించిన అధికారులు, మాజీ ముఖ్యమంత్రులు మెహబూబా ముఫ్తీ, ఒమర్‌ అబ్దుల్లాలను గృహ నిర్బంధంలోకి తీసుకున్నారు. ఇంటి నుంచి వారిని బయటకు రానివ్వబోమని అధికారులు స్పష్టం చేశారు. దీంతో జమ్మూకశ్మీర్‌లో పరిస్థితులు మరింత వేడెక్కాయి. గృహ నిర్బంధంపై సోషల్ మీడియాలో స్పందించారు. ప్రజలంతా శాంతంగా ఉండాలని ట్వీట్‌ ద్వారా ఒమర్‌ విజ్ఞప్తి చేశారు. ‘రేపు ఏం జరగబోతోందో దేవుడికే తెలియాలి. ఈ రాత్రి సుదీర్ఘంగా ఉండబోతోంది’ అని ట్విట్టర్‌లో మెహబూబా పేర్కొన్నారు. తమను పోలీసులు అరెస్టు చేశారని కాంగ్రెస్‌ నేత ఉస్మాన్‌ మాజిద్‌, సీపీఎం ఎమ్మెల్యే ఎం.వై.తరిగామి వెల్లడించారు. అయితే, వారి అరెస్టును మాత్రం పోలీసులు ధ్రువీకరించలేదు. కాగా,, జమ్మూకశ్మీర్‌ రాష్ట్ర ప్రభుత్వ ప్రధాన కార్యదర్శి, డీజీపీ, కశ్మీర్ ఐజీలతో గవర్నర్‌ సత్యపాల్‌ మాలిక్‌ ఆదివారం అర్ధరాత్రి ప్రత్యేక సమావేశం నిర్వహించారు. రాష్ట్రవ్యాప్తంగా అన్ని విద్యాసంస్థలను సోమవారం మూసివేస్తున్నట్లు అధికారులు ప్రకటించారు. కశ్మీర్ లోయలో ముందస్తుగా ఇంటర్నెట్ సేవలను నిలిపివేశారు. సాధారణంగా బుధవారాల్లో సమావేశమయ్యే కేంద్ర కేబినెట్‌ ప్రత్యేకంగా సోమవారం భేటీ అవుతుండటంతో ఏదో అనూహ్య నిర్ణయం తీసుకోబోతున్నట్లు ప్రచారం జరుగుతోంది. దీంతో తాజా పరిణామాలు మరింత ఉత్కంఠను రేకెత్తిస్తున్నాయి. మరోవైపు.. జమ్మూకశ్మీర్‌కు ప్రత్యేక ప్రతిపత్తి, హక్కులు కల్పిస్తున్న ఆర్టికల్ 370, ఆర్టికల్ 35 ఏ రద్దు, రాష్ట్రాన్ని ముక్కలు చేయడానికి ఏదైనా ప్రయత్నం జరిగితే గట్టిగా ప్రతిఘటించాలని అఖిలపక్షం సమావేశంలో తీర్మానించారు. రాజ్యాంగ ప్రతిపత్తిని కాపాడుకునేందుకు ఐక్యంగా ఉద్యమించాలని వీరు పిలుపునివ్వడం మరింత వేడి రాజేసింది. అలాగే, కశ్మీర్ లోయలో ఉద్రిక్తతల్ని పెంచే ఎలాంటి చర్యలకూ పాల్పడకూడదని భారత్‌, పాకిస్థాన్‌లకు స్పష్టం చేసింది. జమ్మూకశ్మీర్‌లో ఎలాంటి అవాంఛనీయ పరిస్థితులు తలెత్తినా ఎదుర్కొనేందుకు భద్రతా బలగాలు సిద్ధమయ్యాయి. శ్రీనగర్‌తోపాటు కీలక ప్రదేశాల్లో అడుగడుగునా బలగాలను మోహరించారు. రాష్ట్రంలో అంతర్జాల సేవల్ని నిలిపివేశారు. ఇదే సమయంలో భారత్‌లోకి చొరబడేందుకు ఉగ్రవాదులు కాచుకుకూర్చున్నట్లు నిఘా వర్గాలు హెచ్చరించాయి. ఇప్పటికే పలు ప్రాంతాల్లో ఉగ్రవాదుల చొరబాటు యత్నాలను సైన్యం సమర్థంగా తిప్పికొట్టింది. అయినా, కొంతమంది ఉగ్రవాదులు మన భూభాగంలోకి ప్రవేశించినట్లు తెలుస్తోంది. పర్యాటకులు, విద్యార్థులు, ఇతర రాష్ట్రాలవారిని స్వస్థలాలకు పంపించి వేస్తున్నారు.
By August 05, 2019 at 08:22AM
No comments