జైషే మహ్మద్‌లోకి తాలిబన్లు.. కశ్మీర్లో ఆత్మాహుతి దాడులకు స్కెచ్
కశ్మీర్లోకి చొరబడాలన్న పాకిస్థాన్ బోర్డర్ యాక్షన్ టీం ప్రయత్నాలను భారత సైన్యం విజయవంతంగా తిప్పికొట్టింది. భారత కాల్పుల్లో 5-7 మంది ఉగ్రవాదులు హతమయ్యారు. పాకిస్థాన్‌కు చెందిన ఉగ్రవాద సంస్థలు జైషే మహ్మద్, లష్కరే తొయిబాలు భారీ సంఖ్యలో ఆత్మాహుతి దాడుల కోసం కశ్మీర్ లోయలోకి ఉగ్రవాదులను పంపే అవకాశం ఉందని ఇంటెలిజెన్స్ బ్యూరో హెచ్చరించింది. వీరంతా ఎల్ఓసీ వెంబడి మోహరించి ఉన్నారని తెలిపింది. భారత్‌‌ను టార్గెట్ చేయడం కోసం.. పాకిస్థాన్ ఆక్రమిత కశ్మీర్లో తాలిబన్ వెటరన్‌లు జైషే మహ్మద్‌లో చేరారని సమాచారం. వీరందరికీ ఉగ్రవాద సంస్థలు ఆయుధాలను సమాకూర్చాయని తెలుస్తోంది. నియంత్రణ రేఖ వెంబడి రెండు వారాలుగా కాల్పులు జరుగుతున్నాయి. చిన్న చిన్న సమూహాలుగా విడిపోయిన ఉగ్రవాదులు దక్షిణ కశ్మీర్లో చొరబడ్డారని తెలుస్తోంది. తెహ్రిక్ ఏ తాలిబన్ పాకిస్థాన్ (టీటీపీ)లో సుదీర్ఘకాలం పని చేసిన వారు జైషే మహ్మద్, లష్కరేల్లో చేరారని.. వీరంతా జమ్మూ కశ్మీర్లో దాడులకు కుట్రలు పన్నుతున్నారని సమాచారం. అమర్‌నాథ్ యాత్ర మార్గంలో ఎం24 అడ్వాన్స్ స్నిపర్‌ను భారత బలగాలు గుర్తించాయి. వీటిని గతంలో తాలిబన్లు ఉపయోగించేవారు. భారత్‌లో ఆత్మాహుతి దాడులకు ప్రణాళికలు రూపొందించడంలో పాక్ నిఘా విభాగం ఐఎస్ఐ కీలక పాత్ర పోషిస్తోందని సమాచారం. ఆగష్టు 15న స్వాతంత్ర్య దినోత్సవం సందర్భంగా జమ్మూ కశ్మీర్లోని గ్రామాల్లో నిర్వహించే త్రివర్ణ పతాక ఆవిష్కరణ వేడుకలను లక్ష్యంగా చేసుకునేలా ఐఎస్ఐ ప్లాన్ వేసింది. ఈ ఏడాది కశ్మీర్ లోయలోని గ్రామ పంచాయతీల్లో జాతీయ జెండాను ఎగరేసేలా హోం మంత్రి ప్రణాళిక రూపొందించారు. ఇది కశ్మీరీల్లో దేశభక్తిని పెంపొందిస్తోందని షా భావిస్తున్నారు. ఇది గిట్టకే ఐఎస్ఐ ఉగ్రవాదులను ఉసిగొల్పుతోందని భావిస్తున్నారు. పాక్ ఆర్మీ శిక్షణ ఇచ్చిన ఉగ్రవాదులు జమ్మూ కశ్మీర్లో చొరబాటుకు యత్నిస్తున్నారనే సమాచారంతో కేంద్రం వెంటనే అప్రమత్తమైంది. కశ్మీర్లో పరిస్థితులను సమీక్షించడం కోసం జాతీయ భద్రతా సలహాదారు, అత్యున్నత అధికారులు గతవారం శ్రీనగర్ వెళ్లొచ్చారు. ధోవల్ నివేదిక ఆధారంగానే కేంద్రం అదనపు బలగాలను పంపాలని, లోయలో భద్రతను కట్టుదిట్టం చేయాలని నిర్ణయించిందని సమాచారం. అమర్‌నాథ్ యాత్రను కూడా వెంటనే ఆపివేస్తూ నిర్ణయం తీసుకుంది.
By August 04, 2019 at 12:40PM
No comments