ఇన్స్టాగ్రామ్ ప్రియుడికి కారు కొనేందుకు చోరీ.. పోలీసులకు చిక్కిన ఇంటి దొంగ
ఇంటి దొంగను ఈశ్వరుడైనా పట్టుకోలేడన్నది సామెత. కానీ కాలం మారింది. టెక్నాలజీ సాయంతో బయటి దొంగలనే కాదు ఇంటి దొంగలను సైతం పోలీసులు పట్టుకుని కటకటాల్లోకి నెట్టుతున్నారు. ఈ కోవలోనే ప్రియుడికి కారు కొనేందుకు తాత ఇంట్లోనే బంగారు నగలను చోరీ చేసిన యువతి రెండు నెలల తర్వాత పోలీసులకు చిక్కింది. చదువు కోసం తన ఇంట్లో ఉంటున్న మనవరాలే ఈ చోరీకి పాల్పడిందని తెలిసి కుటుంబసభ్యులు షాకయ్యారు. ఈ ఘటన తెలంగాణలోని జిల్లా కేంద్రంలో చోటుచేసుకుంది. సూర్యాపేటకు చెందిన ఓ యువతి తన తాత ఇంట్లో ఉంటూ పట్టణంలోనే ఎం.ఫార్మసీ చదువుతోంది. సోషల్మీడియాలో యాక్టివ్గా ఉండే యువతికి తూర్పుగోదావరి జిల్లా సమీపంలోని కేంద్ర పాలిత ప్రాంతమైన యానాంకి చెందిన కర్రి సతీష్ అనే యువకుడు ఇన్స్టాగ్రామ్ ద్వారా పరిచయమయ్యాడు. కొంతకాలం ఛాటింగ్ చేసుకున్న తర్వాత ఇద్దరూ ప్రేమలో పడ్డారు. యువతి పూర్తిగా తన మాయలో పడిందని గ్రహించుకున్న సతీష్ మోసానికి తెరదీశాడు. తనకు కారు కొనుక్కోవాలని ఉందని డబ్బు సాయం చేయాలని సతీష్ కోరడంతో యువతి తన తాత ఇంట్లో ఉన్న 20 తులాల బంగారు నగలను చోరీ చేసి అతడికి ఇచ్చింది. ఆ డబ్బుతో సతీష్ కారు కొనుక్కుని జల్సాలు చేయడం ప్రారంభించాడు. మరోవైపు బీరువాలో ఉన్న 20 తులాల బంగారు ఆభరణాలు కనిపించకపోవడంతో యువతి తాత ఏప్రిల్ 14న సూర్యాపేట పోలీసులకు ఫిర్యాదు చేశాడు. తన ఇంట్లో అద్దెకు ఉంటున్న మహిళతో పాటు చుట్టుపక్కల వారిపైనా అనుమానం వ్యక్తం చేస్తూ ఫిర్యాదులో పేర్కొన్నాడు. అయితే విచారణలో ఎవరికీ సంబంధించి ఆధారాలు లభించకపోవడంతో పోలీసులు తలలు పట్టుకున్నారు. తమకు దొరికిన క్లూల ఆధారంగా ఇంటి దొంగల పనిగా అనుమానించి ఆ దిశగా దర్యాప్తు చేపట్టారు. ఈ కేసును ప్రతిష్ఠాత్మకంగా తీసుకున్న సూర్యాపేట పోలీసులు కుటుంబసభ్యుల సెల్ఫోన్ నంబర్లు సేకరించి వారి కాల్స్డేటాను పరిశీలించారు. ఇంటి యజమాని మనవరాలు యానాంకి చెందిన సతీష్ అనే యువకుడితో తరుచూ మాట్లాడుతున్నట్లు గుర్తించి ఆ దిశగా విచారణ చేపట్టారు. దీంతో ఇద్దరిని అదుపులోకి తీసుకుని విచారించగా అసలు విషయం వెలుగులోకి వచ్చింది. సోషల్మీడియాలో పరిచయమైన యువకుడి కోసం ఏకంగా 20 తులాల బంగారాన్ని యువతి చోరీ చేయడంతో పోలీసులతో పాటు కుటుంబసభ్యులు షాకయ్యారు.
By July 01, 2019 at 08:53AM
No comments