బంగాళాఖాతంలో ఏర్పడిన అల్పపీడనం.. తెలంగాణ, కోస్తాలో నేడు భారీ వర్షాలు

బంగాళాఖాతంలో శుక్రవారం ఏర్పడినట్టు హైదరాబాద్ వాతావరణ కేంద్రం వెల్లడించింది. వాయువ్య ప్రాంతంలో ఏర్పడిన అల్పపీడనానికి అనుబంధంగా 7.6 కిలోమీటర్ల ఎత్తులో ఉపరితల ఆవర్తనం కూడా ఏర్పడినట్టు తెలిపారు. ప్రస్తుతం ఇది పశ్చిమ్ బెంగాల్‌ ఉత్తర భాగం, దాని పరిసర ప్రాంతంలో 7.6 కి.మీ. ఎత్తువరకు ఆవర్తనం కొనసాగుతోందని పేర్కొంది. దీని ప్రభావంతో శుక్రవారం ఉదయం నుంచి ఏపీ, తెలంగాణల్లోని కొన్ని ప్రాంతాల్లో భారీ వర్షాలు కురిశాయి. శనివారం కూడా అక్కడక్కడా భారీ వర్షాలు కురిసే అవకాశం ఉందని వాతావరణ శాఖ అధికారులు పేర్కొన్నారు. అల్పపీడనం ప్రభాబంతో కోస్తాలో ఉష్ణోగ్రతలు తగ్గుముఖం పట్టాయి. శుక్రవారం అత్యధికంగా ఉర్లుగొండలో 7.9 సెంటీమీటర్లు, మధిరలో 7 సెం.మీ, అర్వపల్లిలో 6.8 సెం.మీ, నాగారంలో 6.7 సెం.మీ, నడిగూడెంలో 6.3, ఖానాపూర్‌లో 6.2 ప్రకాశ్‌నగర్‌లో 6 సెంటీమీటర్ల వర్షం కురిసింది. ఈ ఏడాది నైరుతి రుతుపవనాలు ఆలస్యంగా ప్రవేశించడంతో తీవ్ర ప్రభావం చూపుతోంది. దేశవ్యాప్తంగా నైరుతి రుతుపవనాల ప్రభావంతో విస్తారంగా వర్షాలు కురుస్తున్నా తెలుగు రాష్ట్రాల్లో మాత్రం పరిస్థితి భిన్నంగా ఉంది. ఈ ఏడాది సాధారణ వర్షాలు కురుస్తాయని వాతావరణ శాఖ చెప్పిన ముందస్తు అంచనాలు తలకిందులయ్యాయి. మరోవైపు, ఉత్తర భారతాన్ని వర్షాలు ముంచెత్తుతున్నాయి. రాజస్థాన్‌లో వర్షాలకు జనజీవనం స్తంభించింది. మొత్తం రాజస్థాన్‌లోని 16 జిల్లాల్లో సాధారణ వర్షపాతం, కొన్ని జిల్లాలో అత్యధిక వర్షపాతం నమోదయ్యింది. అటు, అసోంలో వరద బీభత్సం ఇంకా కొనసాగుతోంది. మొత్తం 30 లక్షల మంది వరద ప్రభావానికి గురికాగా, 70 మంది ప్రాణాలు కోల్పోయారు. కజిరంగా నేషనల్ పార్క్‌లో ఖడ్గమృగాలు, జింకల సహా 200 వరకు వన్యప్రాణులు మృత్యువాతపడ్డాయి. ఇటు ముంబయిలోనూ భారీ వర్షాలు కురుస్తున్నాయి. మరో రెండు రోజుల పాటు భారీ వర్షాలు కురుస్తాయని వాతావరణ శాఖ హెచ్చరికలతో అధికారులు అప్రమత్తమయ్యారు. కోస్తా ఆంధ్ర, తెలంగాణ, యానాం, ఝార్ఖండ్, కర్ణాటక, రాజస్థాన్, ఒడిశా, మధ్యప్రదేశ్, విదర్భ, చత్తీస్‌గఢ్, గుజరాత్, కొంకణ్, గోవాలోని కొన్ని ప్రాంతాల్లో భారీ నుంచి అతి భారీ వర్షాలు కురుస్తాయని భారత వాతావరణ శాఖ వెల్లడించింది.

By July 27, 2019 at 08:16AM

Read More https://telugu.samayam.com/latest-news/state-news/tropical-depression-form-in-west-bengal-coast-in-bay-of-bengal/articleshow/70404995.cms