వికలాంగుడు కాదు కామాంధుడు: రేప్ చేసినోడిని చంపేయాలని చెప్పి తానే రేప్ చేశాడు

ఒంగోలులో 16ఏళ్ల బాలికను ఐదు రోజుల పాటు నిర్బంధించి సామూహిక అత్యాచారానికి పాల్పడిన ఘటనలో నిందితుడైన వికలాంగ యువకుడు బాజీపై నెటిజన్లు మండిపడుతున్నారు. గతవారం తెలంగాణలోని హన్మకొండలో 9నెలల చిన్నారిపై హత్యాచారం ఘటనను నిరసిస్తూ ఫేస్‌బుక్‌లో పోస్ట్ పెట్టిన బాజీ.. తానే అత్యాచారం కేసులో ఇరుక్కున్నాడు. దీంతో అతడు పోస్టును స్క్రీన్‌షాట్స్ తీసిన నెటిజన్లు దుమ్మెత్తి పోస్తున్నారు. నీతులు చెప్పే నువ్వే ఇంతటి నీచపు పని చేశావా? అంటూ మండిపడుతున్నారు. ఒంగోలుకు చెందిన బాజీది పేద కుటుంబం. తండ్రికి మానసిక పరిస్థితి బాగోలేకపోవడంతో తల్లి ముగ్గురు పిల్లల్ని తీసుకుని సొంతూరైన సంతనూతలపాడు మండలం మైనంపాడుకు చేరుకుంది. కూలీనాలీ చేసుకుని పిల్లలను పోషిస్తూ బతుకీడుస్తోంది. ఏడేళ్ల వయస్సులో ఆడుకుంటూ కరెంట్ షాక్‌కు గురైన బాజీ రెండు చేతులు కోల్పోయాడు. ఆ కుటుంబ పరిస్థితి చూసి చలించిన ప్రజాసంఘాలు, ప్రజాప్రతినిధులు అప్పట్లో సాయం చేశారు. ఏ పనీ చేయలేక కొన్నాళ్ల పాటు భిక్షమెత్తుకున్న అతడు తర్వాత ఒంగోలు బస్టాండులోని ఓ షాపులో పనికి కుదిరాడు. వికలాంగుడైనా కష్టపడి తల్లికి సాయం చేస్తుండంతో బాజీ అంటే అందరూ అభిమానించేవారు. సమాజంలో జరిగే ఘటనలపై బాజీ సోషల్‌మీడియా ద్వారా స్పందించేవాడు. గత వారం హన్మకొండలో జరిగిన 9నెలల చిన్నారిపై హత్యాచారం ఘటనపై కూడా పోస్టు పెట్టాడు. ‘చిన్నారిపై అఘాయిత్యానికి పాల్పడిన నిందితుడిని చంపేయాలి’ అంటూ భావోద్వేగంతో జూన్ 21వ తేదీన ఫేస్‌బుక్‌లో పోస్ట్ చేశాడు. మైనర్ బాలికను 17వ తేదీనే ట్రాప్ చేసి రూమ్‌కి తీసుకెళ్లి రేప్ చేస్తూనే నాలుగు రోజుల తర్వాత మరో అత్యాచార ఘటనపై ఆవేదనగా స్పందించడాన్ని బట్టి అతడు మేకవన్నె పులి అంటూ నెటిజన్లు మండిపడుతున్నారు. పోలీసు అవుతానని చెప్పి.. ఆ పోలీసులకే చిక్కాడు మొదట్లో మంచి ప్రవర్తనతో అందరితోనూ సఖ్యతగా ఉండే బాజీ చెడు స్నేహాలతో ఆకతాయిగా మారిపోయాడు. ఎనిమిదేళ్ల వయస్సులో తనను పరామర్శించడానికి వచ్చిన ఎస్పీ స్థాయి అధికారితో తనకు పోలీస్ కావాలని ఉందని చెప్పడంతో ఆయన ఒంగోలు పోలీస్‌స్టేషన్‌ అధికారిగా ఒకరోజు వ్యవహరించే అవకాశం కల్పించారు. అలాంటి వ్యక్తి అత్యాచారం కేసులో ఇరుక్కోవడంతో పోలీసులే షాకయ్యారు. తన కొడుకులో కామాంధుడు ఉన్నాడని అతడి తల్లి తెలుసుకోలేకపోయింది. ఆదివారం పోలీసులు అతడిని అరెస్ట్ చేసిన విషయం టీవీ ఛానళ్లలో వచ్చేవరకు ఆమెకు ఈ విషయమే తెలియదని స్థానికులు చెబుతున్నారు. మొత్తానికి బాజీ ప్రవర్తన ప్రస్తుతం ఒంగోలులో చర్చనీయాంశమైంది. రెండు చేతులు లేక దీనంగా బతుకీడుస్తున్న యువకుడిలో మృగాడు దాగున్నాడని తెలుసుకుని అతడి పరిచయస్తులు, స్నేహితులు షాక్‌కు గురవుతున్నారు.

By June 24, 2019 at 09:03AM

Read More https://telugu.samayam.com/latest-news/crime/netizens-trolls-on-ongole-gang-rape-case-accused-sk-baji-facebook-post/articleshow/69921233.cms