తెలంగాణలో పోలీసులకు వీక్లీ ఆఫ్.. కానీ కొన్ని కండిషన్లు!
ఏపీ మాదిరిగానే తెలంగాణలోనూ పోలీసులకు వీక్లీ ఆఫ్ విధానం అమలుచేయనున్నారు. దీనికి సంబంధించి ఇప్పటికే కసరత్తు ప్రారంభించారు. రాష్ట్రవ్యాప్తంగా ఓ విధానంగా అమలు చేయాలనే నిర్ణయం తీసుకోనప్పటికీ జిల్లాలు, కమిషనరేట్ల వారీగా అవకాశాన్ని బట్టి సిబ్బందికి వీక్లీ ఆఫ్ ఇవ్వాలనే దిశగా అధికారులు ఆలోచిస్తున్నారు. తుదిదశలో ఉన్న పోలీసు నియామక ప్రక్రియ పూర్తయి, కొత్త సిబ్బంది విధుల్లో చేరిన తర్వాత వారాంతపు సెలవులను తప్పనిసరి చేస్తూ ఉత్తర్వులివ్వాలని అధికారులు భావిస్తున్నట్లు తెలుస్తోంది. సాధారణంగా పోలీసు శాఖలో డీఎస్పీ, ఆపై అధికారులు వారాంతపు సెలవులను తీసుకుంటారు. క్షేత్రస్థాయిలో విధులు నిర్వర్తించే సీఐ నుంచి కానిస్టేబుళ్ల వరకూ వీక్లీ ఆఫ్ సాధ్యం కాదు. దీనికి అనేక కారణాలు సాకుగా చూపిస్తుంటారు. సిబ్బంది కొరత, విధులు పెరిగిపోవడం లాంటి కారణాలతో క్షేత్రస్థాయిలో పనిచేసే సిబ్బందికి వారాంతపు సెలవులు అమలు చేయడం సాధ్యం కాదని తేల్చేశారు. అయితే, ఎన్నికల సందర్భంగా ఇచ్చిన వాగ్దానం మేరకు జగన్‌మోహన్‌రెడ్డి ముఖ్యమంత్రి అయిన వెంటనే పోలీసులకు వారాంతపు సెలవులిస్తూ ఉత్తర్వులు జారీ చేశారు. దీంతో తమకు వీక్లీ ఆఫ్ అమలుచేయాలని తెలంగాణలోనూ డిమాండు మొదలైంది. కానీ, ఏపీలో మాదిరిగా తెలంగాణలో వీక్లీ ఆఫ్ తప్పనిసరి చేస్తూ ఉత్తర్వులు జారీ చేసే పరిస్థితి లేదని అధికారులు అంటున్నారు. దీనికి కూడా అనేక కారణాలు ఉన్నాయని పేర్కొంటున్నారు. ప్రస్తుతం పోలీసు శాఖలో 45 వేల మంది సిబ్బంది పనిచేస్తుండగా, హైదరాబాద్‌లో గణేశ ఉత్సవాలకు ఇంచుమించు ఇందులో సగానికిపైగా అంటే 25 వేల మందితో బందోబస్తు నిర్వహిస్తారు. బోనాలు, ఇతర మతపరమైన ఉత్సవాలకూ భద్రత అవసరం. ఈ నేపథ్యంలో రాష్ట్రవ్యాప్తంగా సిబ్బందికి వీక్లీ ఆఫ్ ప్రకటిస్తే రాజధానిలో భద్రత పరిస్థితి ఏంటనే ప్రశ్న ఉత్పన్నమవుతుంది. అందుకే అవకాశమున్న జిల్లాలు, కమిషనరేట్ల పరిధిలో మాత్రం దీన్ని ప్రయోగాత్మకంగా అమలు చేయాలని భావిస్తున్నారు. వరంగల్‌ కమిషనరేట్‌తో పాటు నల్గొండ, సూర్యాపేట జిల్లాల ఎస్పీలు వీక్లీ ఆఫ్ ఇవ్వాలని నిర్ణయం తీసుకున్నారు. భద్రాద్రి కొత్తగూడెం జిల్లా అధికారులు సైతం కసరత్తు మొదలుపెట్టారు. తెలంగాణ వ్యాప్తంగా ఈ విధానం అమలు చేయడానికి మరికొంత సమయం పడుతుంది. అన్నీ సవ్యంగా జరిగితే మరో రెండేళ్లలో దాదాపు 33 వేల మంది కొత్తగా విధుల్లో చేరనున్నారు. దాంతో సిబ్బంది కొరత చాలావరకూ తీరుతుంది. ఆ తరువాత కానీ పూర్తిస్థాయిలో వీక్లీ ఆఫ్ తప్పనిసరి చేయడం సాధ్యం కాదనేది ఉన్నతాధికారుల భావన.
By June 24, 2019 at 09:29AM
No comments