పాదయాత్రలో తనవెంట ఉన్న వైద్యుడికి జగన్ కీలక బాధ్యతలు!
వైఎస్ కుటుంబంపై ఎనలేని అభిమానం చూపించే ఓ వైద్యుడు షర్మిల, జగన్ పాదయాత్రల సమయంలో వారి వెంట చివరి దాకా నడిచారు. 2013లో షర్మిలతో కలిసి 3,112 కిలోమీటర్లు, పాదయాత్రలో 3,648 కిలోమీటర్లు నడిచారు. తనను నమ్మినవారికి జగన్ అన్యాయం చేయరని గుర్తింపు ఉంది. ఇటీవల ఏపీ ఎన్నికల్లో విజయం సాధించిన తర్వాత కష్టకాలంలో తనవెంట ఉన్నవారికి కీలక పదవులను కట్టబెట్టారు. తాజాగా పాదయాత్రలో తనవెంటన నడిచిన పీడియాట్రీషియన్ హరికృష్ణను కీలక పదవిలో నియమించారు. ఏకంగా సీఎం క్యాంప్ కార్యాలయంలో ప్రత్యేక అధికారిగా పనిచేసే అవకాశం కల్పించారు. అనంతపురం జిల్లా కొత్తచెరువులో క్లీనిక్‌ నడిపే డాక్టర్ హరికృష్ణకు వైఎస్ కుటుంబం అంటే విపరీతమైన ప్రేమ. ప్రజాసంకల్ప యాత్ర పేరుతో 2017 సెప్టెంబరులో వైఎస్ జగన్ పాదయాత్రను ప్రారంభించారు. ఈ సమయంలో డాక్టర్ హరికృష్ణ జగన్ అడుగులో అడుగేశారు. జగన్కు పాదయాత్రలో ప్రజలు ఇచ్చే వినతులను ఆయనే స్వీకరించేవారు. అలాగే పాదయాత్రలో ఎంతో మందికి వైద్యసేవలు అందజేశారు. జగన్కు అన్నివేళలా అందుబాటులో ఉంటూ కీలకమైన సమాచారం ఏదైనా ఉంటే ఆయనకు అందజేశారు. ఆంధ్రప్రదేశ్ ఎన్నికల్లో ఘన విజయం సాధించిన అధికారంలోకి వచ్చిన నేపథ్యంలో పాదయాత్రలో తన వెన్నంటి ఉన్న హరికృష్ణను ప్రత్యేక అధికారిగా జగన్ నియమిస్తూ ఉత్తర్వులు జారీ చేశారు. దీంతో తమ ప్రాంతానికి చెందిన వైద్యుడికి కీలక హోదా లభించిందని కొత్తచెరువు ప్రాంత వాసులు హర్షం వ్యక్తం చేస్తున్నారు. డాక్టర్ ముక్తపురం హరికృష్ణ.. వైఎస్ మరణించిన నాటి నుంచి జగన్‌తోనే ఉంటున్నారు. అనంతపురం జిల్లాకు చెందిన ఆయన కర్నూలు మెడికల్ కాలేజీలో ఎంబీబీఎస్ చేశారు. ఉస్మానియా యూనివర్సిటీ నుంచి పెడియాట్రిక్స్‌లో పీజీ పూర్తి చేశారు. తర్వాత ప్రాక్టీస్ మొదలుపెట్టిన ఆయన.. వైఎస్ ఆకస్మిక మరణంతో వైద్యాన్ని వదిలేసి జగన్ ఫ్యామిలీతోనే ఉండిపోయారు. ఎలాంటి రాజకీయ ప్రయోజనం ఆశించకుండా.. పదేళ్లపాటు వైఎస్ కుటుంబంతోనే ఉన్న హరికృష్ణ.. షర్మిల, జగన్ వెంట పాదయాత్ర చేసిన ఏకైక నేత. జగన్ 3648 కి.మీ. పాదయాత్ర, షర్మిల చేపట్టిన 3112 కి.మీ. పాదయాత్రలో హరికృష్ణ వారి వెంట నడిచారు. చదువుకునే రోజుల్లో ఏపీ జుడా రాష్ట్ర అధ్యక్షుడిగా ఉన్న హరికృష్ణకు జగన్‌తో సన్నిహిత సంబంధాలు ఉన్నప్పటికీ.. ఎలాంటి రాజకీయ ప్రయోజనం ఆశించలేదు. దీంతో జగన్ ఆయనకు సీఎంవో ద్వారా ప్రజాసేవ చేసే అవకాశం కల్పించారు.
By June 23, 2019 at 09:28AM
No comments