భార్యపై అలక... పెళ్లయిన నాలుగు నెలలకే టెక్కీ సూసైడ్
భార్యపై అలక చెందిన సాఫ్ట్‌వేర్ ఇంజినీర్ పెళ్లయిన నాలుగు నెలలకే ఆత్మహత్య చేసుకున్న ఘటన హైదరాబాద్‌ రాజేంద్రనగర్ పోలీస్‌స్టేషన్ పరిధిలోని హైదర్‌గూడలో శనివారం జరిగింది. మనస్పర్థలతో తాను బతకలేనంటూ ఉరి వేసుకొని ప్రాణాలు తీసుకున్నాడు. భార్య ప్రవర్తన కారణంగానే చనిపోతున్నానంటూ సూసైడ్ నోట్‌ రాశాడు. పెళ్లయిన కొత్తలో ఎంతో అన్యోన్యంగా సాగిన వీరి కాపురం ఇలా ముగియడంతో కుటుంబసభ్యులు, బంధువులు, స్నేహితులు కన్నీరుమున్నీరవుతున్నారు. రంగారెడ్డి జిల్లా యాచారం మండలం గున్‌గల్‌ గ్రామానికి చెందిన జనార్దన్‌రెడ్డి కుమారుడు సుమంత్‌రెడ్డి (27)కి శంషాబాద్‌కు చెందిన స్వప్నారెడ్డితో గత ఫిబ్రవరి 14న వివాహం జరిగింది. దంపతులిద్దరూ హైదర్‌గూడలోని న్యూ ఫ్రెండ్స్ కాలనీలోని లహరి అపార్ట్‌మెంట్లో కాపురం పెట్టారు. భార్య భర్తలిద్దరూ సాఫ్ట్‌వేర్ ఉద్యోగులే. పెళ్లయిన కొత్తలో ఒకరిని విడిచి ఒకరు బతకలేనంతగా సాగిన వీరి కాపురం క్రమంగా మనస్పర్థలతో చికాకుగా మారింది. ఇద్దరూ చీటికీమాటికీ గొడవ పడేవారు. వారం క్రితం స్వప్నకు ఫుడ్‌ఫాయిజన్‌ కావడంతో సుమంత్ శంషాబాద్‌లోని ఆమె పుట్టింట్లో వదలివచ్చాడు. ఆరోగ్యం కుదుట పడేవరకు ఉద్యోగానికి వెళ్లొద్దని భర్త చెప్పినా వినకుండా స్వప్న ఆఫీసుకు వెళ్లింది. ఈ విషయం తెలుసుకున్న సుమంత్ ఈ నెల 20వ తేదీన స్వప్నకు ఫోన్ చేయగా ఆమె లిఫ్ట్ చేయలేదు. కొద్దిసేపటి తర్వాత స్వప్న ఫోన్ చేయగా సుమంత్ ఎత్తలేదు. అదేరోజు రాత్రి ఇద్దరూ ఫోన్లో మాట్లాడుకుంటూ గట్టిగా అరుచుకున్నారు. దీంతో సుమంత్ ఫోన్ కట్ చేసేశాడు. ఆ తర్వాత స్వప్న ఎన్నిసార్లు ఫోన్ చేసినా భర్త ఎత్తలేదు. దీంతో అనుమానం వచ్చిన ఆమె పక్క ప్లా్‌ట్‌లో వారికి సమాచారం ఇచ్చింది. వారు సుమంత్ ప్లాట్‌కి వెళ్లి ఎన్నిసార్లు తలుపు తట్టినా తీయలేదు. దీంతో వారు పోలీసుల సాయంతో లోనికి వెళ్లగా సుమంత్ గదిలో ఉరేసుకుని చనిపోయి ఉన్నాడు. పోలీసులు అతడి మృతదేహాన్ని కిందికి దించి పోస్టుమార్టం నిమిత్త ఆస్పత్రికి తరలిచారు. తన ఆత్మహత్యకు భార్య స్వప్న, అత్త పద్మ, స్వప్న కజిన్ శ్రీ, ఆమె బాబాయే కారణమంటూ సుమంత్ రాసిన సూసైడ్ నోట్‌ను పోలీసులు స్వాధీనం చేసుకున్నారు. ఈ ఘటనపై రాజేంద్రనగర్ పోలీసులు కేసు నమోదు చేసుకుని దర్యాప్తు చేపట్టారు. ఎన్నో ఆశలతో మొదలైన వారి వివాహ బంధం అలకలతో విషాదాంతంగా ముగియడంతో బంధువులు ఆవేదన చెందుతున్నారు.
By June 23, 2019 at 09:41AM
No comments